1 Peteru 1:3 - Sateré-Mawé

³ Saꞌawyꞌi Aipotypot Iesui ikuꞌuro hawyi Tupana timoieineꞌen guꞌuro pyi. Saꞌawyꞌi yt watomohey hin i aikuꞌuro hawywiat aheineꞌen i hamuat hap. Maꞌato mesup koitywy watomohey kahato kat pote Aiꞌywot Tupana tihep taꞌyn Aikaꞌiwat ikuꞌuro hap kaipyi. Miꞌi pote koitywy -Waku kahato En Tupana. Poꞌog wakuat torannia kai urutoꞌe kat pote egyiꞌat kahato uruepe. Urukyꞌe kahato En. Poꞌog poꞌog torannia miitꞌin kai urukyꞌe hat En katupono etihep taꞌyn urukaꞌiwat hyp hawyi urutoꞌe.

1 Peteru 1:3 Referans Kwoze

1 Peteru 1:23

Kat pote aito Tupana saꞌyruꞌin sese Tupana sakiꞌytꞌin sese ewy aitoria katupono Tupana Paꞌãu aity ewy aimoherep pakup i raꞌyn. Saꞌawyꞌi aimoherep haria aity aiꞌywot. Aipiit nug hap taꞌatunug mekewat toꞌupiꞌa kaipyi mekewat iãꞌỹi kaipyi ainug. Miꞌi ti waku kahato wen maꞌato yt toineꞌen motꞌi i aipiit. Aikotã aipiit nug haria ewy aikuꞌuro neꞌi are. Meiũran ikuꞌuro raꞌyn iꞌatuminug aipiit maꞌato aiwemoherep pakup i hap Tupana kaipywiat mekewat hãꞌỹi Tupana ehay aity aiꞌywot ewy topyhuꞌat. Miꞌi ti ainug wuatꞌi eꞌat piat aimoieineꞌen hamuat. Yt karãpe i ikahuro Tupana ehay maꞌato toineꞌen wuatꞌi eꞌat pe. Miꞌi kaipyi aiwemoherep hawyi watoineꞌen wuatꞌi eꞌat pe are.

1 Iuwãu 5:4

Taꞌi yt niatpo hin i watunug Aiꞌywot ainapin hap koꞌi katupono Aiꞌywot mohey haria kahato aito pote. Karapeĩ iraniaꞌin ahãꞌãg yt naku i nug hamo miꞌi hawyi yt iꞌatuehay upi hin i watoineꞌen katupono Tupana mepytꞌin aito pote.

Humanu 15:13

-Tupana uito ti emipoꞌoro Pauru atikyꞌesat kahato etiꞌatupowyro iraniaꞌin ywania kape ekuap hamuat hap ete. Koitywy iꞌatuꞌarot potꞌi wywo tukupteꞌen. En yn waku iꞌatumowepiit kuap hanuat. Esaꞌyru kape yn teꞌeruwanetup taꞌatuhekatup haype are. Uiꞌywot mekewat ewat wuatꞌi eꞌat piat woꞌomowepiit hap yn waku etum iꞌatuepe. Esaꞌyru mohey hap kaipyi etum no iꞌatuepe iꞌatuwanetup saꞌag hap monik hap Esaꞌyru mohey hap kaipyi are. Papai etum o Epaꞌãu Wakuat iꞌatuepe poꞌog poꞌog yne eꞌat pe. Etimoesaika miꞌiria Epaꞌãu Wakuat kaipyi are. Epaꞌãu Wakuat kaipyi atikyꞌesat taꞌatuhekatup Esaꞌyru uut hap aat kaꞌap. Uruꞌywot Tupana etimowepiit kahato uheꞌywytꞌin uheinytꞌin tawa wato Huma piaria.

Ewesu 1:7

Taꞌi Emipoꞌoro uruporekuat no ikuꞌuro hawyi uruminug saꞌag po pyi urutuwẽtem naꞌyn iꞌewyte uruminug saꞌag haꞌawytewuat etiꞌatuwaure waure raꞌyn En. Waku kahato En. En ni poꞌog poꞌog torannia kai hegyiꞌat rakat urutoꞌe ewowi Tupana urutoꞌe. Esaꞌyru suu ti urukyiꞌat ewatnuat hap urutoꞌe.

2 Kuriniu 1:3

Urutuwehum ewowi Tupana. Waku kahato En Tupana katupono etipoꞌoro raꞌyn Iesui uruewawi. Koitywy emepytꞌin sese uruto are. Waku kahato En uruꞌywot. Uruhoꞌopot turan urukawiatno kahato hat En. Uruehakyꞌeꞌi kahato wuatꞌi eꞌat pe are.

1 Iuwãu 3:3

Miꞌi hap watomohey yne eꞌat pe pote ti yt kat i saꞌag aipit pit hap topyhuꞌat. Miꞌi hawyi ti maꞌato poꞌog poꞌog aikoho hap toineꞌen. Miꞌi hawyi ti watoineꞌen aikotã topiit kahu hap ewy ainug.

Humanu 12:12

Tupana tunug aru toꞌe hap ewy paĩ an watoꞌe. Mio tã watoꞌe pote aimowepiit hap topyhuꞌat aikotã Tupana wepiit hap ewy. Watimohey pote putꞌok e ahete hoꞌopot hap niatpo kahato hap. Miꞌi hawyi waku watoineꞌen motꞌi aiperup i hap wywo. Waku wahekatup tokosap aru hap -Yt watoiat hin i imohey hap aiꞌe hap wywo. Miꞌi pykai waku ahehay Tupana wywo aat kaꞌap aikope aikope ahewyry hap upi.

1 Iuwãu 2:29

Taꞌi watikuap kahato raꞌyn mekewat wakuap yn nug hat Aikaꞌiwat Tupana Saꞌyru. Miꞌi hawyi Aikaꞌiwat ewy wakuap nug haria aito pote iꞌewyte Tupana mepytꞌin sese wo raꞌyn watukupteꞌen are.

Ewesu 1:3

Taꞌi Aikaꞌiwat Iesui iꞌewyte Toꞌywot Tupana aiꞌatupoityro poityro kahato raꞌyn. -Waku kahato En watoꞌe Tupana pe iꞌewyte Aikaꞌiwat Iesui pe watoꞌe -Waku kahato En Tupana watoꞌe aito Iesui mohey haria. Taꞌi atipy kaipyi putꞌok e ahete aipoityro kahato hap. Ahehakyeraꞌat hap tutum naꞌyn ahepe. Wuatꞌi eꞌat piat aimoieineꞌen Tupana kapiat hap tutum ahepe towatnuaria aito pote are.

Ewesu 3:20

Taꞌi uiwyriaꞌin aheTupana hepap kahato aimiẽtup ium hamo poꞌog poꞌog iwato tutum kuap aimiẽtup koꞌi kai are. Yt karãpe i teke aiwanetup hawe kat kupitu kat kupitu hegyiꞌat hap are. Tutum poꞌog poꞌog kuap ahepiat hẽtup kuap hamo kai katupono Ipaꞌãu hesaika aikai ahepiat hẽtup hamo Tupana pe are.

Ewesu 1:17

-Uruꞌywot koro En ni urupotypot Iesui eTupana are. Etum no Epaꞌãu poꞌog tawa Ewesu piaria pe ekuap poꞌog poꞌog mono areꞌe Tupana pe. Uwe En sese hap kuap hamuat atikyꞌesat. Epaꞌãu kaipyi iweꞌeg kahato rakaria wo tukupteꞌen hap atikyꞌesat are. Etiꞌatumoẽtyhot ro iꞌatuwanetup hap are. Etihep yt iꞌatuehapytig i hap miꞌi hawyi heremo iꞌatuwanetup hawe etum Esaꞌyru mohey hap Tupana are.

1 Peteru 3:21

Miꞌi hap ewy kahato ahetꞌok hap topyhuꞌat. Yꞌy piat wateke aikotã Iesui ikuꞌuro hap ewy. Watuwẽtem yꞌy pyi hawyi aikotã Iesui tuwẽtem guꞌuro pyi hap ewy watoineꞌen. Maꞌato mekewat yꞌy yt aikoho kuap i aipit pit ok hap aiminug saꞌag koꞌi maꞌato ahetꞌok hap watunug hawyi yt kat i haty hap aiwanetup hawe kat pote Tupana mikyꞌesat ewy watunug aikotã Nuꞌe ewy yꞌy sakpo watuwat aheꞌyara puo hap ewy.

1 Timoteu 1:14

Sakpoꞌe hegyiꞌat kahato rat uhepe paĩ Uikaꞌiwat uheineꞌen ne wanikap nuat turan. Miꞌi hawyi tutum tomohey hamuat hap uhepe. Koitywy iwywo wẽtup piit hap ewy yn naꞌyn urutukupteꞌen.

Ewesu 2:4

Maꞌato saꞌag watunug tuete pykai aikyꞌe kahato te Tupana. Yt tuwepyk hin i katupono haty aikyꞌe hap tuete.

Tiaku 1:18

Tehay pywuat sese wo ainug tomepytꞌin koꞌi. Miꞌi hawyi aito watopyhuꞌat Tupana mowepiit kahato haria aikotã aimikoi pakup haat rakat aimowepiit hap topyhuꞌat. Miꞌi hap ewy aito Iesui mohey haria watopyhuꞌat Tupana mowepiit hanuaria wo sese katupono -Poꞌog poꞌog uimikyꞌeria eipe torannia uiminug koꞌi kai e Tupana ahepe tosaꞌyruꞌin me tosakiꞌytꞌin me.

Titu 2:13

Miꞌi hawyi Iesui putꞌok e hap eꞌat yn naꞌyn wahekatup Tupana motypot eꞌat sese raꞌyn. Taꞌi Uhetupana iꞌewyte Iesui Ahehakyeraꞌat hat poꞌog wuatꞌi kai putꞌok e irane. Putꞌok e hawyi ikahu hap sese watikuap taꞌyn. Mekewat eꞌat pe ti wahekatup kahato turan tuut.

1 Kuriniu 15:20

Pywo ti rat Aikaꞌiwat yt nem rakatno no hin i toineꞌen. Mio yt ikuꞌuro i koran katupono Tupana timoieineꞌen pakup i raꞌyn Aikaꞌiwat. Toihep Tosaꞌyru guꞌuro pyi aimuꞌe hamo -Aikotã atihep Uhaꞌyru miꞌi hap ewy worohoꞌohep eipe guꞌuro pyi e hamo toihep Tosaꞌyru.

1 Kuriniu 13:13

Pyno mesuwarotiat toineꞌen myẽꞌym nakat yn yt karãpe i ikahuro rakat. Wẽtup aiwoꞌomohey hap wẽtup -Waku pe aru topyhuꞌat e hap wẽtup aiwoꞌokyꞌe hap. Myẽꞌym miꞌiria wuatꞌi eꞌat piaria waku rakat. Wẽtup poꞌog torannia kai miꞌi ti aiwoꞌokyꞌe sese hap. Pyno waku watoꞌe Tupana pe -Uinug o woꞌokyꞌe hatno waku watoꞌe. Miꞌi hap Tupana wywuat miitꞌin nywuat aiwoꞌopotkyꞌe hap poꞌog hesaika torannia kai areꞌe.

1 Iuwãu 3:9

Uwe uwe tuwemoherep Tupana mepyt no miꞌi hat yt toikyꞌesat i Tupana piat iꞌaparap hap katupono Tupana Paꞌãu toineꞌen ipiit pe. Miꞌi pote Toꞌywot atipy piat ewy topyhuꞌat. Yt toikyꞌesat i poꞌog saꞌag nug hap Tupana mepyt pote ti raꞌyn.

1 Peteru 2:2

Kat pote Tupana sakiꞌytꞌin Tupana saꞌyruꞌin sok aito miꞌi pote waku watikyꞌesat kahato Tupana ehay aikotã aimepyt hit tikyꞌesat kahato mihy hap ewy. Pyno watuꞌu kahato Tupana ehay hawyi ahehãite aikap aipiit hesaika aimotag hap topyhuꞌat aikotã aimepyt pakup mihy ete itag hap ewy.

Epereu 3:6

Maꞌato Aipotypot Iesui poꞌog Muisei kai kat pote Tupana Saꞌyru sese pote. Miꞌi pote poꞌog waku topyhuꞌat iꞌyat piaria apykok hamo Haꞌyru pote. Muisei Tupana eropat hat maꞌato Iesui Haꞌyru sese. Pyno aito imohey haria Tupana yat piaria ewywuaria watoineꞌen. Taꞌi miꞌi tã aito watomohey potꞌi pote -Uito imohey hat watoꞌe yt aiwemoti hin i pote. Pywo ti rat Iesui yn aimiekatup aiꞌe pote. Iesui yn ahehakyeraꞌat kuap hat watoꞌe pote. Yt kat i aiwemogyt hap aikuꞌuro hap mesup watoꞌe. Mio tã aiꞌe pote Tupana yat piaria wuat aito.

1 Tesaronika 1:3

Yt ehẽku kaipyi yn i ti tuwẽtem ehepiat Iesui mohey hap maꞌato yne kaipyi tuwemoherep. Miꞌi tupono urutuwehum kahato Aiꞌywot atipy piat kape. Yt waureꞌurutoꞌe hin i ti urukyꞌe ehepiat hap iꞌewyte miitꞌin kyꞌe ehepiat hap ete Aipotypot Iesui mohey hap kaipyi. Iꞌewyte eipotpap hap koꞌi yt uruiwaure hin i.

Korosi 1:27

Koitywy Tupana toꞌe -Saꞌawyꞌi yt uwe i kape atimoherep uhehay pakup e. Kurin ikuap haria saꞌawyꞌi maꞌato koitywy Uhaꞌyru mohey haria kape atimoherep taꞌyn uhehay ikahu kahato rakat sehay hekat rakat wuatꞌi ywania mesuwat yi totiat kapiat sehay wakuat e. Saꞌawyꞌi migꞌi wo toineꞌen maꞌato mesup atimoherep taꞌyn ehepe e Tupana ahepe. Etunug no Uhaꞌyru Eporekuat no eipyꞌa pe pote eweikupteꞌen aru uhehamo mesuwe atipy pe uimimotypot koꞌi wo e Tupana ahepe.

Humanu 8:24

Mio tã watoꞌe Tupana pe -Uruimohey kahato eꞌe hap ewywuat watoꞌe. Yne yne nug hat ereineꞌen hap uruimohey watoꞌe. Wuatꞌi -Atunug aru eꞌe hap koꞌi ewywuat hap uruimohey kahato watoꞌe. -Uimohey pote worohoꞌoehakyeraꞌat wuatꞌi eꞌat pe eꞌe hap ewywuat ti uruimohey watoꞌe. Maꞌato koitywy yt putꞌok e i te eꞌe hap ewywuat pykai uruimohey te watoꞌe. Yt karãpe i urutaꞌakasa Esaꞌyru urueha wywo te maꞌato uruimohey miꞌi yn uruehakyeraꞌat kuap hat urupyꞌa pe watoꞌe Tupana pe. Yt urutaꞌakasa i te Esaꞌyru wen urueha pe maꞌato miꞌi pykai uruimohey kahato tuut aru eꞌe hap ewywuat Tupana watoꞌe. Mesup sehay toineꞌen urumimohey mekewat eꞌat pe aru urutaꞌakasa eꞌe hap ewywuat heremo raꞌyn eꞌe hap watoꞌe. Maꞌato yt naku i watoꞌe Tupana pe -Urutaꞌakasa En urueha wo miꞌi pote uruimohey En yt naku i watoꞌe. Urutaꞌakasa Tupana kape aheha wo hawyi heremo raꞌyn toineꞌen aheha pe. Heremo raꞌyn toineꞌen aimimohey. Miꞌi tupono wẽtup aimimohey ewywuat toineꞌen yt saꞌawyꞌi wuat aimimohey ewy hin i. Heremo raꞌyn ahehamo Tupana pote yt wahekatup kuap i poꞌog tuut irane hap.

Humanu 8:11

Saꞌawyꞌi Tupana Paꞌãu timoieineꞌen Iesui piit ikuꞌuro hawyi. Taꞌi Tupana Paꞌãu hesaika kahato miitꞌin moieineꞌen hamo. Miꞌi ti toineꞌen ahepuo. Aipiit ikuꞌuro hawyi Tupana Paꞌãu toineꞌen aimoieineꞌen hamuat Iesui wat ewy. Pywo pe ti Iesui piit ewy Tupana Paꞌãu esaika hap toineꞌen aipiit moieineꞌen hamuat.

Iuwãu 1:13

Mio tã watoꞌe pote Tupana aiꞌywotno topyhuꞌat. Tupana yn aimoherep kuap tosaꞌyruꞌin wo tosakiꞌytꞌin no. Mesuwe toineꞌen aiꞌywot aiwemoherep hap kaipyi. Maꞌato watimohey hawyi Aiꞌywot atipy piat toineꞌen aiꞌywotno. Yt aiwekaipyi i watopyhuꞌat kuap Tupana mepytꞌin no. Yt watuwemoherep kuap i aiwekaipyi Tupana mepytꞌin no katupono Tupana kaipywiat yn imepytꞌin wo teꞌeruwemoherep.

1 Iuwãu 5:18

Uiwyriaꞌin karãpe watomohey Iesui hawyi Tupana ainug tosaꞌyruꞌin tosakiꞌytꞌin wo. Miꞌi hawyi imepytꞌin koꞌi wo watopyhuꞌat. Miꞌi hawyi Aiꞌywot ewy watoineꞌen yt kat i saꞌag yt kat i yt naku i hap watunug neran. Aheko yt watunug neran i poꞌog aiminug saꞌag koꞌi saꞌawyꞌi wuat aheko saꞌag koꞌi katupono Tupana ainug tomepytꞌin no Tosaꞌyru Paꞌãu wo aipytꞌatnug hawyi. Koitywy ahowapy kahato Tupana Paꞌãu wywo. Miꞌi hawyi Tupana eiam mo kahato watoineꞌen. Miꞌi hawyi karãpe ahiag ahãꞌãg neran kat saꞌag kat saꞌag nug hamo miꞌi hawyi Tupana Paꞌãu aiꞌauka kahato ainapin kahato aihep ahiag aimaꞌatꞌi maꞌatꞌi hap po pyi. Miꞌi hawyi yt kat i ahewaure ahiag ahãꞌãg hap kape -Yt reiꞌo yt reiꞌo watoꞌe ahiag me.

1 Iuwãu 5:1

Uwe uwe imohey Iesui Tupana Mipoꞌoro Aipotypot nuat miꞌi hat Tupana mepyt sese wo topyhuꞌat. Karãpe watikyꞌe Aiꞌywot mepytꞌin miꞌi hawyi Aiꞌywot mowepiit hatno watopyhuꞌat. Miꞌi hawyi watoineꞌen Aiꞌywot kyꞌe hatno sese.

Korosi 1:23

Pyno aiwy raꞌyn Tupana. Yt nakuap i watoiat raꞌyn hawyi waku aikyꞌe hat sese watomohey wuatꞌi eꞌat pe. Saꞌawyꞌi watikuap mekewat Iesui etiat sehay wakuat ehay hawyi watomohey raꞌyn Iesui. Miꞌi hawyi watoineꞌen aru wuatꞌi eꞌat pe e hap ewy watomohey. Miitꞌin teꞌeruwekyryꞌi ahetiat pykai imohey hap yt watoiat hin i. Iheg me kahato watoineꞌen imohey hap ete. Saꞌawyꞌi watomohey kahato. Pyno koitywy yt naku i raꞌyn imohey hap watoiat sehay waku kahato Iesui etiat. Miꞌi atikuap saꞌawyꞌi hawyi uheropat kahato aat kaꞌap wuatꞌi miitꞌin kape miꞌi moherep hamo aikope aikope miitꞌin tukupteꞌen hap upi yne ywania pe ahytpok miꞌi ehay wakuat mesuwat yi wato hap oktan. Miꞌi hamo yn uinug uito Pauru.

Humanu 5:10

Saꞌawyꞌi watunug Tupana ahewanikap mo maꞌato miꞌi pykai ainug towyriaꞌin wo kahato katupono Haꞌyru tokuꞌuro hamo aiꞌatupehik Toꞌywot kape -Koitywy yt ahewanikap mo i topyhuꞌat maꞌato aiwy ok wo raꞌyn. Koitywy Tupana wy kahato uito watoꞌe. Koitywy Tupana toineꞌen uipiit pe. Miꞌi kaipyi watikuap taꞌyn pywo ti aru areineꞌen wuatꞌi eꞌat pe aiꞌe hap katupono Iesui tuwẽtem guꞌuro pyi hawyi uimimoieineꞌen hap topyhuꞌat watoꞌe.

Humanu 4:25

Taꞌi watomohey kahato Tupana tiꞌapiheg Tosaꞌyru Iesui aiminug saꞌag upiatno e hap watomohey. Watimohey Tupana timoieineꞌen naꞌyn Tosaꞌyru hap toꞌe hap ewy. Miꞌi pote watomohey kahato wy Tupana aimoieineꞌen i hamuat waku hap ete toꞌe hap ewy watomohey. Koitywy watomohey kahato Tupana ainug tomohey hap kaipywiat wakuaria wo aikotã Tupana -Atunug aru e hap ewy watomohey. Aparãu ewywuaria watoineꞌen imohey hap saipepiaria aito. Aparãu mepytꞌin koꞌi aito. Miꞌi hap eꞌat pe Tupana toꞌe Aparãu me iꞌewyte ahepe -Waku pe ereineꞌen uhepe uimohey hat en mote e ahepe.

1 Iuwãu 4:7

Uiwyriaꞌin toꞌiro watoꞌokyꞌe katupono aiwoꞌokyꞌe hap nug hat Tupana. Woꞌokyꞌe haria wo watoineꞌen pote Tupana mepytꞌin no watukupteꞌen. Tupana kuap sese haria wo watopyhuꞌat.

1 Tesaronika 4:13

Uruwyriaꞌin uruikyꞌesat eweikuap kahato pywuat sehay aikotã ikuꞌuro rakaria tukupteꞌen hamuat hap. Yt uruikyꞌesat i eweikupteꞌen Iesui mohey ran haria wo neꞌi katupono taꞌatuwy kuꞌuro pote toꞌokakꞌi kahato -Yt karãpe i raꞌyn aru wataꞌakasa aiwy kape taꞌatuehaype.

Karasia 6:16

Miꞌi hap yn ahẽtup Tupana pe -Erehay moehakyꞌeꞌi ro Uiꞌywot iꞌatuehakyꞌeꞌi hap etiatno ipakup takaria upi inug hamo are. Etihep o iꞌatuehamanaꞌi hap are ehupiat pe. Iꞌewyte torannia Tupana emiitꞌin etiatno.

2 Tesaronika 2:16

Uruhẽtup kahato Aipotypot Aikaꞌiwat Iesui pe iꞌewyte Aiꞌywot hegyiꞌat rakat kape -Etiꞌatumoesaika ro emohey haria tawa Tesaronika piaria yt kat pupiat i iꞌatuwuwu hamo urutoꞌe. Etiꞌatumoesaika ro miꞌiria wakuap nug hamo iꞌewyte wakuap enoi hamo.

1 Peteru 1:13

Uiwyriaꞌin meiũran ti aru Tupana tipoꞌoro Aiporekuat nuat. Tuwemoherep mesuwat yi tote i raꞌyn wuatꞌi ehamo. Miꞌi pote waku aiwanetup hap Ahehakyeraꞌat hat kape yn watuwanetup. Yt naku i aiwanetup hap kowoꞌi kowoꞌi neꞌi. Waku wahekatup kahato Aipotypot huut hap kape iwemoherep hap kape katupono mekewat eꞌat pe tuut irane Ahehakyeraꞌat hat. Miꞌi hawyi iwese kahato ahete hegyiꞌat kahato ahepe tomohey haria aito pote. Miꞌi pote waku aikotã watopag aiweꞌok kytyt hap aipiit ete ahesokpe moheg hamo miꞌi hap ewy waku watimoheg kahato aiwanetup hap Iesui kape yn hap ewy are ehepe uiwyriaꞌin. Uito ti Peteru are.

1 Peteru 1:21

Miꞌi pote mesup yt niatpo hin i watomohey Tupana aipyꞌa pe kat pote uruehamo Aikaꞌiwat toihep guꞌuro pyi. Miꞌi hawyi Tupana toꞌe itote wuatꞌi ehamo -Miitꞌin Ehakyeraꞌat hanuat Miꞌi Miit e. Miꞌi pote koitywy Iesui yn watomohey ahehakyeraꞌat hamo. Waku watoꞌe tope -Uruimohey En yn Iesui uruehakyeraꞌat hanuat waku watoꞌe Iesui pe are.

1 Peteru 3:5

Iꞌatu kahato saꞌawyꞌi wuaria haryporiaꞌin Tupana mohey haria wakuap nug kahato haria are. Miꞌiria inug kahato taꞌatueꞌaito mikyꞌesat ewywuat. Taꞌatueꞌaito eropat haria kahato miꞌiria tukupteꞌen. Miꞌiria teꞌeruwepainug kahato Tupana mohey hap wywo.

1 Peteru 3:15

Waku poꞌog watimotypot Tupana aipyꞌa pe. Miꞌi hawyi waku watikat sehay wakuat aiwanetup hawe yne miitꞌin wesat hamuat hap. Karãpe putꞌok e wẽtup ok ahowawi hawyi toꞌe ahepe -Kat pote etimohey Iesui. Miꞌi hawyi waku watimoherep iꞌatuepe aimimohey Iesui ahehay perupꞌi puo yt kat i -Uito poꞌog eikai aiꞌe hap wywo. Maꞌato aikotã paa e haria ewy waku watiꞌatuekyi miitꞌin aimimohey Iesui kape.