1 Kuriniu 4:6 - Sateré-Mawé

⁶ Miꞌi hap ewy ti uruto uiwyriaꞌin. Uito Pauru eimuꞌe hat iꞌewyte Apauru toineꞌen itote eimuꞌe hat. Waku eiwanetup kahato uruehay kape katupono wẽtup ehay yn urutoꞌe Iesui etiat yn uruimuꞌe eipe. Pyno atikyꞌesat kahato uruꞌewy eweikupteꞌen wẽtup sehay yn moherep haria Iesui moherep haria uruto ewy uruhẽku ewywuat urupusu ewywuat waku eweikupteꞌen hap atikyꞌesat urupotmuꞌeria. Urumimuꞌe wẽtup ok yn uruto typy ok pykai. Yt naku i eweiꞌe Uito Pauru mimuꞌe hawyi wẽtup ok -Uito yt Pauru upi i maꞌato uito Apauru upi uito paĩ an yt naku i eweiꞌe katupono Apauru uito wẽtup miit ewy hawyi wẽtup sehay yn eimuꞌe Iesui Aimimotypot moherep hap yn uruehay. Yt naku i watimohit wẽtup ok aimuꞌe hat hawyi yt naku i watunug wẽtup ok aimuꞌe hat Tupana wo e.

1 Kuriniu 4:6 Referans Kwoze

2 Kuriniu 11:4

Uimogyt kahato eipe katupono eweimohey yne miitꞌin mienoi koꞌi. Putꞌok e wẽtup ok itote hawyi wẽtup Iesui etiat eimuꞌe yt uruepiat eimuꞌe hap ewy hin i. Miꞌi hawyi -Pywo eweiꞌe kahato. Eꞌe hap ewy eweiꞌe tope. Miꞌi hawyi putꞌok e wẽtup i raꞌyn hawyi toꞌe ehepe -Atum neran wẽtup paꞌãu ehepe. Miꞌi hawyi -Waku mehin waku mimi eweiꞌe tope yt eiweꞌeg hin i. Miꞌi hawyi putꞌok e wẽtup ok wẽtup ehay enoi hat yt Aikaꞌiwat Iesui wakuat ewy hin i. Miꞌi hawyi -Pywo eweiꞌe miꞌi pote uimogyt sese eipe katupono -Pywo eweiꞌe yne eimuꞌe haria pe. Miꞌi pote eiweꞌeg wo o are ehepe.

2 Kuriniu 12:19

Yt karãpe i eipyꞌasetpe urutukupteꞌen turan paa urutoꞌe -Watiꞌatumaꞌat miꞌiria yt urutoꞌe i. Yt urueso i rat iꞌewyte Tupana tikuap yt urueso i hap. Iꞌewyte Aikaꞌiwat Iesui tikuap yt urueso i hap. Katupono yne uruminug koꞌi eimoesaika imohey hap etiat hamo. Miꞌi pote yt urueso i.

2 Kuriniu 12:6

Yt naku i areꞌe -Uito Iesui mohey poꞌog torannia kawiat are. Pywo kahato uito areꞌe kuap maꞌato yt kat hamo i areꞌe mio tã are. Areꞌe mio tã pote yt uiweꞌeg hin i. Miꞌi pote karãpe areꞌe teran tuereto hawyi arewanetup hawyi yt naku i arewanetup. Yt uiweꞌeg hin i areꞌe mio tã pote uiwanetup hawe. Yt naku i kahato miitꞌin uinug Tupana are uiwepe. Uhewaku hap waku miitꞌin teꞌeruwanetup uhowowi uito taꞌatuꞌewywuat rẽ hap are uiwepe. Waku uikuap aikotã uhewaku hap oktan maꞌato yt naku i uinug poꞌog.

Korosi 2:18

Yt eweiwat reiꞌo iꞌatuehay upi karapeĩ teꞌeroꞌe ehepe -Yt eweikupteꞌen i Tupana miehakyeraꞌat koꞌi katupono yt uruꞌewy i ehewaku hap. Poꞌog uruto eikai katupono atipy piaria ihay uruwywo urumuꞌetu iꞌatuꞌe. Urutaꞌakasa Tupana urumuꞌetu iꞌatuꞌe. Atipy piaria kuap haria uruto uruehay iꞌatuwywo iꞌatuꞌe. Miꞌi pote poꞌog uruto eikai iꞌatuꞌe. Tupana miehakyeraꞌat koꞌi sese uruto. Eipe yt hin i katupono uruto paa e haria sese iꞌatuꞌe. Maꞌato yt pywo pe i mio tã iꞌatuꞌe. Teꞌeruwemotypot hap yn iꞌatuwanetup hawe. Iꞌatuwanetup hap miit wanetup hap ewywuat yn. Maꞌato yt kat i Iesui motypot hap iꞌatupyꞌa piat pykai.

1 Tesaronika 1:5

Saꞌawyꞌi ti uruhenoi kahato ehepe sehay wakuat Iesui etiat maꞌato yt uruwat uruẽku kaipyi yn i maꞌato Tupana esaika hap kaipyi iꞌewyte Tupana Paꞌãu kaipyi uruiꞌatumuꞌe eipe. Taꞌi pywuat sese urutoꞌe. Urumimohey mesuwat sehay urutoꞌe uruhenoi ehepe turan. Eweikuap taꞌyn aikotã saꞌawyꞌi urutukupteꞌen eipyꞌasetpiat hap. Taꞌi eikyꞌe uruepiat hap yn ni toineꞌen urukai.

Humanu 12:3

Pyno uito Pauru Tupana uipoꞌoro einapin hamo. Tupana hegyiꞌat kahato hawyi uinug eimuꞌe hatno miꞌi pote worohoꞌonapin eipe. Yt naku i aiwanetup hawe -Uito poꞌog torannia kai aiꞌe hap kape. Waku -Uito en watoꞌoꞌewy kahato watoꞌe. Katupono aito wẽtup ok poꞌog imohey wẽtup ok yt maꞌato wẽtup sok yn aito pykai. Miꞌi pote yt ereꞌe kuap i -Uito poꞌog eikai hap ete.

2 Kuriniu 10:7

Tukupteꞌen aipyꞌasetpe -Uruto Aikaꞌiwat Iesui emiit sese e haria. Miꞌiria pe urutoꞌe -Eipe Iesui emiit sese pote miꞌi pote eweikuap meremo uruto eiꞌewywuaria te hap. Eiwehaꞌat ro urueko kape miꞌi hawyi eweikuap uruto Aikaꞌiwat eropat haria sio sese hap.

2 Kuriniu 4:15

Saꞌawyꞌi eipyꞌasetpe urutukupteꞌen turan miitꞌin mimosoꞌopot koꞌi wo uruto uruiꞌatumuꞌe eipe Iesui etiat pote. Miꞌi hawyi uruepiat hoꞌopot hap kaipyi eweikupteꞌen pywo e haria wo typyꞌi raꞌyn. Miꞌi hap kaipyi koitywy miitꞌin poꞌog poꞌog Tupana kapiat wehum haria wo tukupteꞌen. -Egyiꞌat kahato Tupana eweiꞌe. Yt uwe i eꞌewy hegyiꞌat hap eweiꞌe. Uruimotypot wuat waku rakat. Uruhewaku En eweiꞌe itote poꞌog poꞌog saꞌawyꞌi kai. Koitywy Tupana topyhuꞌat eimimotypot no raꞌyn uruepiat hoꞌopot kahato eimuꞌe hamuat rakirẽ.

1 Kuriniu 8:1

Mesup worohoꞌonapin neran tupanaria iãꞌãkap motypot hap miꞌu ete mekewat Wewato ahup auka tupanaria iãꞌãkap eꞌat piat koꞌi ete. Pyno mesuwat uimienoi kuap haria raꞌyn eipe maꞌato ti ahenoi pakup i teran ehepe ikuap i hamo. Pyno Uwe uwe toꞌe topyꞌa pe -Uito poꞌog atikuap tuwemowato teran tuwewanetup hawe maꞌato tuwemaꞌat haype katupono yt uwe i mimuꞌe wo topyhuꞌat iꞌewyte yt uwe i wy wo toineꞌen. Maꞌato uwe uwe toꞌe topyꞌa pe -Miitꞌin kyꞌe hat areineꞌen neran miꞌi e hat Tupana mipowyro topyhuꞌat hawyi yt aimaꞌat kuap i rakat toineꞌen.

1 Kuriniu 5:6

Pyno yt eiwekyryꞌi teiꞌo mekewat miit minug saꞌag ete. Yt naku i kahato watuwehum miꞌi tã nug hat ete katupono mekewat miit topyhuꞌat mani puk ewywuat eipyꞌaset pe maꞌato eipe eweipyhuꞌat ipyre ewy. Miꞌi pote aikotã watopag ipyre mani puk pe hawyi toimorem yne mani puk hap ewy miꞌi hap ewy waku eweihep o mekewat miit saꞌag eipyꞌasetpyi hawyi ti aru eweipyhuꞌat miit wakuaria ewywuat. Yt naku i hap yt mig hin i haria eipe. Pyno saꞌawyꞌi wuaria Iuteuria tuwenoꞌẽ taꞌatuewanikaptia yi Esituꞌin po kaipywiat turan iꞌatumiꞌu man iteneg nakat yn iꞌatumiꞌu yt kat i nem nakat ewy.

1 Kuriniu 3:19

Iꞌatu kahato mesuwat yi tote -Uito poꞌog uiweꞌeg e haria maꞌato Tupana wanetup hawe yt kat i kuap haria ewy miꞌiria -Uito uiweꞌeg kahato iꞌatuꞌe pykai. Miwan me mio tã toꞌe -Uito poꞌog uiweꞌeg e haria teꞌeruwemaꞌat neꞌi taꞌatuweꞌeg saꞌag hamo hawyi taꞌatuweꞌeg poꞌog hap suki ewywuat topyhuꞌat taꞌatuꞌauka hamo pira ewy e Tupana saꞌawyꞌi miwan me.

2 Timoteu 2:10

Maꞌato yt uiwẽpohep hin i Iesui mohey hap ete waĩꞌiꞌatuꞌe pykai. Uiꞌauka pote uiꞌauka maꞌato yt uipohep hin i te. Katupono Tupana tiꞌatuehakyeraꞌat teran kahato tomiꞌairoria ahoꞌopot kahato Iesui mohey iꞌatuepiat hamuat pykai. Miꞌi hap kaipyi Tupana tiꞌatuehakyeraꞌat miꞌiria. Miꞌi hawyi Iesui kahu hap ewywuaria raꞌyn tukupteꞌen iwywo wuatꞌi eꞌat pe raꞌyn.

2 Kuriniu 10:15

Aikope aikope Tupana urupoꞌoro miꞌi hap kape yn urutuwat. Yt karãpe i uruipohari iraniaꞌin potmuꞌe neꞌi urupotmuꞌe wo. Iraniaꞌin teꞌeroꞌe ehepe -Eipe uruimuꞌe Pauruꞌin eꞌyian mete iꞌatuꞌe ehepe urupohari teran haype. -Eheso eweiꞌe o miꞌiria pe. Ehehãite sese Iesui mohey hap ete hawyi -Pauruꞌin uruꞌapykok haria eweiꞌe. Mio tã eweiꞌe hawyi uruto yt kat hamo i raꞌyn urutoꞌe i. Miꞌi hawyi wẽtup ywania kape urutuwat yt ikuap i te haria kape.

2 Kuriniu 10:12

Tukupteꞌen eipyꞌasetpe -Aito poꞌog iraniaꞌin kai iꞌatuꞌe toꞌope haria. Maꞌato uruto yt iꞌatuꞌewywuat hin i koꞌi urutoꞌe. -Uruto poꞌog eikai iꞌatuꞌe teꞌeruwanetup ahepiat pe. Miꞌi tã wanetup haria yt iꞌatuweꞌeg hin i katupono toꞌope toꞌoꞌakasa hap kaipyi teꞌeroꞌe -Uito poꞌog iꞌatuꞌe teꞌeruwanetup hawe. Yt iꞌatuweꞌeg hin i katupono yt teꞌeruwanetup hin i sio iꞌatuewaku hap putꞌok e sio yt Aikaꞌiwat ewaku hap oktan hap kape.

1 Kuriniu 13:4

Pyno watikyꞌe sese miitꞌin mote motꞌi watikyꞌe hawyi wuatꞌi eꞌat pe watikyꞌe. Yt Karãpe i watoiat iꞌatukyꞌe hap. Watiꞌatukyꞌe sese miitꞌin mote watoineꞌen iwese kahato rakatno wuatꞌi eꞌat pe. Karapeĩ aimikyꞌe topyhuꞌat poꞌog aikai hawyi yt kat i ahehayꞌywi hin i maꞌato watuwehum katupono watikyꞌesat aimikyꞌe motypot hap pote. Yt karãpe i -Uito poꞌog ekai watoꞌe aipyꞌa pe watiꞌatukyꞌe sese miitꞌin mote. -Waku uito poꞌog eikai wuatꞌi mimotypot no yt watoꞌe i watikyꞌe sese miitꞌin mote.

1 Kuriniu 9:23

Atiꞌatumuꞌe kahato miꞌiria Iesui ehay wakuat ete. Iꞌatuwyriaꞌin wo areineꞌen iꞌatumuꞌe hamo. Miꞌi hap ahenoi yne hawyi Tupana mipoityro wo miꞌiria tukupteꞌen iꞌewyte uito.

1 Kuriniu 5:2

Miꞌi hap ete ti yt tuwemoti hin i te maꞌato poꞌog ni uruto uruewaku toꞌe neꞌi saꞌag. Miꞌi hawyi eipe yt paa eweiꞌe hin i maꞌato -Waku miꞌi tã watunug eweiꞌe saꞌag. Uiwyriaꞌin waku waire waire nug haria eweiꞌatuꞌywyk eiweꞌatunug hap kaipyi.

1 Kuriniu 3:21

-Aito hekat rakaria ewy katupono Aiꞌywot Tupana sakpoꞌe hekat rakat pote. Yt kat i ahekat mesuwe pykai hekat rakaria watoineꞌen wuatꞌi eꞌat pe.

1 Kuriniu 1:31

Yt naku i watoꞌe aiwepe paĩ -Uito poꞌog Iraniaꞌin kai yt naku i watoꞌe aiwanetup hawe. Yt miꞌi tã hin i are. Poꞌog waku watoꞌe -Tupana ti waku poꞌog uikai waku watoꞌe. Miꞌi yn ni aipowyro kahato hat watoꞌe waku. Aikotã iꞌe hap ewy aru tutunug yne toꞌe hap waku watoꞌe aiperupꞌi hap wywo. Uito ti miitꞌin yt naku i rakat maꞌato Iesui miꞌairo kahato.

1 Kuriniu 1:19

Aikotã saꞌawyꞌi yianmiaria Tupana ehay moherep haria teꞌeroꞌe hap ewy -Meiũran ti aru atimoma raꞌyn eiweꞌeg kahato hap -Uito poꞌog kuap hat wuatꞌi kawiat hap e. Atimoweityk ti aru miitꞌin weꞌeg hap yt nakuat i koꞌi e. Miꞌi hawyi -Uito atikuap poꞌog e haria yt uwe i topyhuꞌat e Tupana saꞌawyꞌi tehay moherep hat Isaia miwan 29.14 piat pe.

1 Kuriniu 1:12

-Pyno itotiaria wẽtup wẽtup wanetup hap wywuaria iꞌatuꞌe. Yt toꞌoꞌewy hin i iꞌatuwanetup hap koꞌi. Miꞌi pote wuꞌuka hap yn itote iꞌatuꞌe uhepe ehetiat. Pyno atikuap taꞌyn eipyꞌasetpe tukupteꞌen -Uito ti aimuꞌe hat Pauru upi e haria maꞌato iraniaꞌin -Uito aimuꞌe hat Apauru upiaria e haria. Miꞌi hawyi iraniaꞌin -Uito aimuꞌe hat Peteru upi e haria tukupteꞌen. Maꞌato iraniaꞌin -Uito aimuꞌe hat Iesui upiaria e haria iꞌatuꞌe taꞌatuhenoi uhepe õꞌẽ haria. Miꞌi tã hap kaipyi ti eiwuꞌuka hap topyhuꞌat.

Iesui Potmuꞌeria 18:24

Wẽtup eꞌat pe hawyi mehin Apauru putꞌok e tawa Ewesu pe Aresãteria piat iꞌywaĩꞌĩ rakat saꞌawyꞌi te wuat Tupana etiat miwan kuap hat putꞌok e.

Iesui Potmuꞌeria 19:1

Uruwy Apauru tiꞌatumuꞌe kahato tawa Kurintiu piaria pe turan Pauru hewyry kahato yityꞌok totiat muap upi tawa Ewesu kape. Putꞌok e itote turan toiꞌatupuẽti itotiaria imohey haria.

2 Kuriniu 12:20

Pyno areto i raꞌyn wyti ehewowi aikotã itotiat hap kuap hamo. Arekenꞌẽ kahato putꞌok uiꞌe turan eiwuꞌuka hap pupi. Yt worohoꞌopuẽti teran i yt eiwoꞌowese i turan neꞌi. Maꞌato worohoꞌopuẽti eiwoꞌoehay ewaĩ ewaĩ turan neꞌi pote arekenꞌẽ kahato areineꞌen eiꞌapiheg hatno neꞌi tet pupi. Yt naku i worohoꞌopuẽti eiwoꞌoehaꞌywyi ehekat koꞌi etiat turan neꞌi. Iꞌewyte eiwoꞌope eimopyꞌahak turan neꞌi yt naku i worohoꞌopuẽti yt eiwoꞌowesat i eiwoꞌope turan neꞌi. Iꞌewyte yt naku i eiwoꞌoewa pe eiwoꞌowese maꞌato eiwoꞌoꞌokpe wo ehehay saꞌag hap ete turan neꞌi worohoꞌopuẽti hap. Yt naku i worohoꞌopuẽti eiwoꞌoweukaꞌi turan neꞌi. Iꞌewyte eiwoꞌohoiro hoiro turan neꞌi. Arekenꞌẽ wuꞌuka hap etiat -Uito poꞌog eikai eiꞌe turan neꞌi.