Zakaliya 9:10 - Amazwi Yakwe Leza 2013

¹⁰ Yawe wavwanga wati, “Mu mpanga ya Izlaeli ndafumyamo amaceleta ya nkondo, nu mu musumba wa Yelusalemu ndafumyamo imfwalasi zyakulwilapo inkondo, na malapwa akulwilako umu nkondo nayo yalakontolwa. Umwene winu alateeka nu longo antu amu mitundu yonsi. Uteko wakwe ulatandikila kuli yemba wenga mpaka ukuyafika na kuli yemba muze, ukufuma uku Luzi lwa Yufulate ukuyafika nu kwapelela insi yonsi.”

Zakaliya 9:10 Referans Kwoze

Oseya 2:18

Mu wanda ulya ndacita upangano ni nyama zya mpanga, ni vyunyi vyamu lwelele, nga ni viumbwa ivikasela pansi, kuti vitakacitile antu yane iviipe. Nupya ndasisya ulapwa, lupanga, kumwi ni vyanzo vyuze vyonsi vya nkondo, nga nu kuvisisya umu mpanga iyo, kuti yene yikale umi wa mutende.

Oseya 1:7

Lelo nanti cili vivyo nemo ndatemwa amu mutundu wakwe Yuda, nupya ndayatuula uku maka yane, ne Yawe Leza wao. Ntalayatuula apakuomvya ulapwa, nanti amalupanga, nanti mfwalasi na asilika akakwela pa mfwalasi, ndi vino cikaya apakulwa inkondo, awe.”

Umbwilo 11:15

Nupya mungeli uwalenga cinimbali alizya ntandala yakwe, ngu mwiyulu muvwika mazwi akulu yati, “Ndakai akweti amaka akuteeka insi u Mwene witu na Katuula, nupya wene alateeka manda pe!”

Mika 5:4

Lino aliza, wene alaposya nupya alacema imfwele zyakwe mu maka yakwe Yawe, nu mu ucindami wi zina lyakwe Yawe Leza wakwe. Alino yene yalikala mu mutende, pano ukulu wakwe ulafika nu kumpela ya nsi kwene.

Ezaya 60:12

Ali vino antu ya mitundu yuze yano yalakana ukukuombela yene cazipa yace yasyamilile, yalowelele.

Ezaya 49:6

Yawe wavwanga wati, “Ukuya umuomvi wakututulula inko zyakwe Yakobo, nu kuwezya aina Izlaeli kwacepesya, kutakulinzile foo. Fwandi namalunda penepo nu kukucita uluswepo lwakukozezya ainamasi, apakuti ufyusi wane ufike uku mpela ya nsi.”

2 Kolinto 5:20

Twatumilwe kuya nkombe zyakwe Klistu, Leza umwisikulu akumupapata kuti mupange mutende pakasi kinu na aliwe.

2 Kolinto 5:18

Leza aliwe uwacita vii vyonsi. Wene watumile Klistu kupanga mutende pakasi kakwe Leza naswe, nupya watupela mulimo uwa kupanga mutende pakasi kakwe umwisikulu na antu.

Milimo 10:36

Mwamanya ilandwe lino watumile ku ina Izlaeli, ukukosola Ilandwe Lisuma ilya mutende kupitila muli Yesu Klistu, wino ali Mwene wa antu onsi.

Hagai 2:22

Indi nu kuwisya yamwene yonsi amitundu ya inamasi yonsi nga nu kulovya maka yao. Indi nu kuzangawalika amaceleta na akakwelapo yonsi. Indi nu kulovya imfwalasi zizi na akakwelapo yonsi yali nu kukomana.

Ezaya 11:10

Mu wanda ulya uwene nupya ukufuma ku cisinte cakwe Yese, ulimilila nu kuya wa cimanyililo uku mitundu. Imitundu ilakusika nu kwiza kolongana kuno ali, ni cifulo cakwe cilacindama.

Masamu 72:17

Antu yangala yateezya yamwilila, nu lulumbi lwakwe lwalu kuyelelela wi lanzi. Antu ya mitundu nayo kayalumba umwene wa mpanga yao, yapapata na Leza ukuti ayapolelele, ndi vino wapolelile umwene wa mpanga yao.

Masamu 72:3

Imyamba ni milundu vingaleka ukuti antu yako yaikala umutende ni syuko nu usuma penepo.

Malango 11:24

Ponsi pano mulalyata palaya pa ncende inu. Impanga inu ilatandikila ku lwanga ku kaeya ukufika nu ku Myamba ya Lebanoni ku katutu, nu kufuma ku Luzi lwa Yufulate ukufika kuli yemba waku uwondaka.

1 Yamwene 4:21

Uwene wakwe Solomoni watandikile ku Luzi lwa Yufulate mpaka nu ku mpanga ya ina Filisti, ukufika nu ku mupaka wa Eguputo. Antu amu mpanga zii yasonkanga imisonko kuli Solomoni nu kumutumikila amanda yonsi ya umi wakwe.

Masamu 85:8

Nemo nkukutika kuno Yawe akuvwanga, apamulandu wakutuletela ulongo swe antu yakwe, lelo cikulu sile tutaciwelela ku vya uwelewele.

Ezaya 2:4

Alapingwila imitundu yonsi iya antu, nupya aliwe alakaulula imitundu ivule wakwe cimwi, yace yasuke yatole ivipeni nu kusulamo amase, nga na masumo yao nayo yakasulemo ivikwakwa. Kutalatala nupya kuyeko umutundu ulakatukila uuze, nanti ukusambilila ivyankondo.

Mika 4:8

Lyene nawe we Yelusalemu, we lupungu lwakuwakilapo imfwele zyane, umwamba wa antu yane, utesi wako uwampiti ulya ulaweziwa kunuli. Uwene uwa uliza ku antu aku Yelusalemu.

Masamu 89:26

Amangamanga ati, ‘Wewe uli Tata, nupya wewe uli Leza wane, Ciliwe icikantuula.’

Oseya 2:20

Ndakutaisya muli ucumi, nga nawe ulamanya ukuti nene indi Yawe.”

Mika 5:9

Mwe ina Izlaeli mulalwa na anisi inu, nga anisi inu yonsi yalononwa.