Zakaliya 14:16 - Amazwi Yakwe Leza 2013

¹⁶ Yonsi alasyala amu mitundu yonsi iyalwisizye Yelusalemu yalaya cila mwaka ku kupepa Yawe Leza Wamaka yonsi wa Mwene wao, nu kukuzevya Cimulo ca Nsakwe.

Zakaliya 14:16 Referans Kwoze

Ezaya 66:23

Ukufuma ku mwezi upya, ukufika nu ku mwezi upya uze, ukufuma kwi Sabata lyonga ukufika nu kwi Sabata lyuze, antu yonsi yalaiza ku kupepa kuno ku Yelusalemu. Kuu kuli kulanda kwakwe Yawe.

Yowelo 2:32

Lyene alino wensi wino alaama pi zina lyakwe Yawe alatuulwa. Pasi pano uku Mwamba wa Zioni nu ku Yelusalemu, na muli yayo yamwi asyala palazanwa yamwi yano Yawe alaama.”

Umbwilo 19:16

Pa mwingila wakwe na pa lupamba lwakwe palemvilwe zina lino likati, “Kateeka wakwe yakateeka nu Mwene wakwe yamwene.”

Umbwilo 11:13

Pa nsita kwene ilya kwali cilundumusi cikome cuze, nga ciputulwa conga mu viputulwa ikumi vya musumba ciwa conononeka, lyene na antu mazimbi cinimbali yafwile ku cilundumusi. Na antu yauze asile yuvwile intete cuze nu kulumbanya ukulu wakwe Leza wa mwiyulu.

Loma 11:26

Vii, ali vino aina Izlaeli yalatuulwa. Ndi vino calembwa mu malembelo cati, “Katuula alafuma mu Zioni nu kusisya ukakasi onsi kufuma pa vizikulula vyakwe Yakobo.

Loma 11:16

Pano ndi cimokolwa ca nkolelo ca mukate capeelwa kuli Leza, ale nu mukate onsi kwene uwakwakwe. Ndi misisi ya muti yapeelwa kuli Leza, ale ni misambo kwene iyakwakwe.

Loma 11:5

Avino cili na ndakai. Apano yali yamwi aina Izlaeli yano Leza wasolola pamulandu wa cikuku cakwe.

Milimo 15:17

Alino na antu yauze yonsi yalalonda Mwene, pamwi na Akulukuwa yonsi yano nama kuya antu yane.

Yoane 7:2

Lelo lino wanda wakuzezya Cimulo ca Nsakwe ca Ayuda wapalama,

Yoane 1:49

Natanaeli avwanga ati, “Kasambilizya wewe Mwana wakwe Leza! Wewe Mwene wa Izlaeli!”

Luka 19:38

ala likuti, “Walongo a kateeka akwiza mwi zina lya Mwene! Mutende uye mwiyulu, nu lulumbi kuli Leza mwiyulu papelapela!”

Malaki 1:14

Citipu ciye pa muntu umusomvi wino akapeela inyama yaciwelewele wa mpolelwa kunondi, mu cifulo ca nyama isuma ino walaya ukupeela kunondi! Pasi pano nene Mwene mukulu, nga antu amu nko zyonsi yakangoopa.”

Zakaliya 9:7

Antu yakwe yatalalya nupya inyama ino icikweti uwazi, nanti ukulya vyuze ivyaindwa. Yayo yonsi alasyalapo yalaya cili conga na antu yauze, yalaya wa luko longa lwa mutundu wa Ayuda. Aina Ekiloni yalaya cili conga na antu yauze, ndi vino aina Yebusi yali.

Oseya 12:9

Lelo nemo nene indi Yawe Leza winu, wiyo uwamufumizye mu Eguputo. Ndalenga kuti mwikale mu mataalu, ndi vino cali mu manda ya kuzevya vimulo vinu.

Yelemiya 51:57

Asambazi yakwe namayamwesya ivyakuti yakoleke, kumwi na alasi yakwe, yamusika yakwe ni vita vyakwe kwene. Yalapona mu tulo twa muyayaya, yatalatala yazyuke nupya. Ivyalanda ne Mwene wino izina lyakwe a Yawe. Izina lyane anene Yawe Wamaka yonsi.”

Yelemiya 48:15

Ala nkumunena ukuti umononyi wakwe Moabu ni misumba yayamo wataiza ku kulwisya. Alumendo yaya kwene asopoloke aku Moabu yatiyatelemukila uku kukomwa.” Ivyalanda ne Yawe, Leza Wamaka yonsi.

Yelemiya 46:18

Lino nene ndi wa umi, ivyalanda Yawe, wino izina lyakwe a Yawe Wamaka yonsi. Kuliza umwi wiyo akoline na Taboli umwamba uno watalimpisya pa myamba yuze, wiyo akoline nu mwamba wa Kalimeli, uwaya mu nkumba yakwe yemba.

Ezaya 6:5

Nga alino nani ne Ezaya imvwanga inti, “Kalanda kunondi! Awe icumi ilelo lyene ali mpela yane! Pano kwene amazwi yonsi yano nkalanda yangaya aipe, nupya nikala na antu ya mazwi akanyengula umwenzo. Ilelo lyene casila nafwa, pano lyene nailolela na manso yane Yawe Wamaka yonsi.”

Ezila 3:4

Nu kuwaka yawakanga sana amanda ya uzevyo ndi vino uwanda wakuzevya Cimulo ca Nsakwe, nu kupeela impendwa ya mpolelwa zyakoca ndi vino calemvilwe ukupeela cila wanda.

2 Milandu 8:13

ndi vino yalondekwanga cila wanda. Wene wapeelanga impolelwa apakulondela amalamulo ndi muno calembelwa umu masunde yakwe Mose ukulingana na manda yi Sabata, na pa ndoleko ya mwezi, nga na pa vimulo vitatu vya cila mwaka, kuli kuti Cimulo ca Mukate usi na Citutumusi, Cimulo ca Uzombozi ni Cimulo ca Nsakwe.

Masamu 66:4

Aikalansi yonsi, awewe yakapepa. Awewe yakaimbila inyimbo zyaku kulumbanya, awewe yakalumbanya izina lyako umu nyimbo?

Ezaya 18:7

Pa nsita ilya kwene antu yaliza na mawila akutuulila Yawe Wamaka yonsi. Antu yaya yalaya atali nupya atelepelele inkanda, yano antu yauze akutali na amupipi kwene yakaoopa wakwe cimwi pano nsi, antu yano inguzi izili yanande ya mpanga yao. Yene yalaiza na mawila yao uku Mwamba wa Zioni kuno antu yakapepa Yawe Wamaka yonsi.

Ezaya 19:21

Yawe alaisokolola wenga uku ina Eguputo. Mu wanda ulya lino wene alacita cico, alino antu nayo yalamanya Yawe umucumi. Nupya ali lino yalamupepa nu kumupeela impolelwa na mawila ya mbezu. Alino yalamulaya ivilayo vya mpomvu nu kufikilizya vino yalaya.

Ezaya 27:13

Mu wanda ulya intandala ilalila, iyakwama aina Izlaeli yonsi yano yikala mu mpanga ya uzya, mu mpanga ya Asilya nu mpanga ya Eguputo. Yalawela nu kwiza pepela Yawe mu Yelusalemu, pa mwamba wakwe wamuzilo.

Mika 4:2

Antu amu nko zivule yaliza, nga yalavwanga yati, “Tuini tukwele uku mwamba wakwe Yawe, ku Ng'anda yakwe Leza wakwe Yakobo. Wene alatusambilizya vino akasi kuti twacita, nga naswe tumapitanga umu nzila zyakwe. Pano uku Zioni ukulafuma usambilizyo wakwe, uku Yelusalemu ukulafuma amazwi yakwe Yawe.”

Zakaliya 14:9

Alino lyene Yawe Leza awino alaateeka impanga yonsi, ala wenga mpo awino alaya Umwene, ni zina lyakwe lyonga mpo alino antu yalalumbula.