Yoswa 5:13 - Amazwi Yakwe Leza 2013

¹³ Lyene lino Yoswa wali pipi nu ku Yeliko, asanzula amanso nga alola umuntu aimi ku nkolelo yakwe ala alemile ulupanga lwakwe mu minwe. Yoswa amulungama nga amuuzya ati, “We, uzye uli ku lusansa lwitu nanti uli ku lusansa lwa anisi itu?”

Yoswa 5:13 Referans Kwoze

Mpendwa 22:23

Lyene lino punda walola mungeli wakwe Yawe aimi mu museo ala alemile ulupanga lwakwe mu minwe, apambata apita mu mpanga. Alino Balamu amuma nu kumuswilizya mu museo.

Utandiko 18:2

Lino wasanzula amanso alola aonsi yatatu yaimi katalamukila lilyo kwene asimula ku kuyazengela, afika afukama pansi afupime,

Mpendwa 22:31

Lyene Yawe ali pakuleka Balamu alole mungeli aimilile papa kwene ala atazunzula ulupanga lwakwe. Icaleka Balamu afukama pansi afupime.

1 Milandu 21:30

Lelo Davidi waposiwe ukuya kweneko ku kuuzya kuli Yawe, pamulandu wakuti wali ni ntete zya kufwa ku lupanga lwa mungeli wakwe Yawe.

Danieli 10:5

Insanzula amanso nga ndola umuntu umwi ala azwite insalu isuma itelepelele nga nu musipi wakwe zaabu.

Kufuma 23:23

“Mungeli wane alakolela ku nkolelo inu, nupya alamutungulula ku mpanga ya ina Amoli, aina Hiti, aina Pelizi, aina Kenani, aina Hivi nga na Yebusi, nupya ndayonona yonsi.

Milimo 1:10

Yalanga yacili lolekesya kwiyulu lino akukwela, lolini antu yaili azwite vitiswe iimilila pipi nao,

Zakaliya 1:8

Mu nsita ya usiku nakweti icilolwa nga ndola umuntu akwezile pa mfwalasi iyenzu. Umuntu wiyo aimilila mu miti iyali mu cifoloma. Uku nsizi yakwe kwali imfwalasi, zimwi ziyenzu, na zimwi wakwe mulamba.

1 Milandu 21:27

Lyene Yawe apeela ilamulo ku mungeli, nga umungeli aswilizya ulupanga mu cituwo caluko.

Yakapingula 13:11

Manoa akatuka lili kwene nu kulondelela umuci. Lino wiza apali umuntu wilya, amuuzya ati, “Uzye awewe wino mwalandine nu muci wane?” Alino nawe aasuka ati, “Anene kwene.”

Danieli 8:3

Lino nalingamile umupela, indola suuku uwa mpembe ziili izitali, longa lwali ulutali nupya ulupya kuluta uluze. Suuku wilya waimi pipi nu luzi.

Yakapingula 13:22

Manoa anena umuci wakwe ati, “Owe, tumafwa, pano twatitulola Leza!”

Yoswa 6:2

Lyene Yawe anena Yoswa ati, “Lola, Natimpeela umusumba wa Yeliko nu mwene wauko nga ni vita vyakweo mu makasa yako. Wewe kumwi ni vita vyako mulinzile ukupita nu kuzinguluka umusumba ulya iila lyonga. Mulinzile ukucita ci pa manda mutanda.

Utandiko 33:5

Esau acelecensya monsi, nga alola ana na yanyina, nga auzya ati, “Uzye ya yonsi yano uli nayo aaweni?” Yakobo aasuka ati, “Mukwai, ya ana yane yano Leza wampa mu usuma wakwe.”

Utandiko 33:1

Yakobo asanzula amanso nga alola Esau akwiza na antu yakwe imyanda ini. Caleka aankanya ana yakwe muli yanyina, Leya, Lakeli nga na azya yakwe anaci yoili.

Umbwilo 1:13

lyene pakasi ka vyakutekapo inyali cinimbali pali wino walolike wa mwana wa muntu, ala azwite umwingila uwafisile na pa ngazo zyakwe, nupya wazwite cimusipi cakwe zaabu pa cifuwa.

Utandiko 18:1

Yawe aloleka kuli Abulaamu ku miti yamuzilo yakwe Mamule. Abulaamu watenzi pa mulyango wi taalu lyakwe mu nsita ino ilanzi lyatiliwalisya nu kukaya cuze.

Utandiko 28:16

Lino Yakobo wazyuka avwanga ati, “Mucumi Yawe ali pa cifulo ci, nani ntacimanyile!”

1 Milandu 12:22

Kweleula manda yonsi kwizilanga penepo antu nayauze ku kwiza azwa Davidi, suka inkambi yakwe izula wakwe cimwi, wa vita vyakwe Leza.