Yelemiya 49:16 - Amazwi Yakwe Leza 2013

¹⁶ Icoopo cako ni cilumba camu mwenzo wako vyakusomba sile, wemuno ukaikala mu macele akuulwa apapela ya myamba itali. Lelo nanti ungaluka icinsanzo cako apapelapela wakwe lyang'anda'anda, ndakuponyezya pansi.” Ivyalanda ne Yawe.

Yelemiya 49:16 Referans Kwoze

Amosi 9:2

Ndi cakuti yangimba pansi mpaka yafike ku cifulo ca afwe, ikasa lyane lilayalema kuko kwene. Ndi cakuti yangakwela ukwiyulu kupela, ndayisya ukufuma kweneko.

Ezaya 49:25

Lelo Yawe wavwanga wati, “Endi, azya yalapokololwa mu minwe ya vita, ni visampwe vilapokololwa ku antu ankalwe. Nemo ndalwisya yayo akamulwisya, alino ndatuula na ana inu.

Yobo 39:27

Uzye wewe ukanena cipungu ukuti apapukile umwiyulu apatali, nu kuluka icinsanzo cakwe apapela ya mwamba apatali?

Mapinda 29:23

Icilumba ca muntu cikamuletelela mpaka acefiwa, lelo umuntu akaicefya wene yakamucindika.

Mapinda 16:18

Icilumba icikakolelela uononesi, ukuitutumula umu mwenzo, ukukakolelela ukuongoloka.

Ezaya 2:21

Lino wemo we Yawe uliza uku kutensya insi, antu yene yalafisama muli yapolowe nu mu macele, umu myamba apa kuutuka sile ukali wako nu ucindami wako.

Lwimbo lwakwe Solomoni 2:14

Wemo uli wa nkunda ino ikafisama mu macele yamawe, mu ncende zyakufisamamo mu myamba, sindangizya usyu wako, sileka nuvwe izwi lyako, pano izwi lyako ilisuma, nupya usyu wako wazipa.

Mapinda 18:21

Imfwa nu umi vyaya umu maka ya lulimi. Umuntu wino akaluomvya ningo alalya vino lwene lulamukwilila.

2 Yamwene 14:7

Lyene Amaziya akoma na ina Edomu amazimbi ikumi, umu Cifoloma ca Musilya. Lino yalwanga, Amaziya apokolola umusumba wa Sela, autemela ni zina lyakwe Yokotele, ndi vino ukaamwa na pilelo kwene.

Ezaya 10:14

Imitundu ya antu yali wa cinsanzo ca cunyi, nakuusanga ivyuma vyao ungati amayayi ya vyunyi, yano nkukusa. Cunyi citangecitale cikatusye nanti ilyapa lyaciko apa kundesya. Nanti sile ukwasamula umulomo apa kundilila, awe.’

Yelemiya 49:15

Lyene, namakucefya pa mitundu yuze, ulasulwa apa antu.

Yelemiya 50:29

“Amini yano yacenjela kufiika inceto yize yalwisye aina Babiloni. Mwame sile yonsi pyu yano yamanya kuzumba amalapwa. Zingulukini umusumba, mutaleka nanti wenga apuuke. Mulandule apa vicitwa vyao, ndi vino nayo yacisile. Pano kwene yacita icilumba kuli Yawe, Wamuzilo wilya wakwe Izlaeli.

Yelemiya 51:53

Babiloni nanti angakwela ukwiyulu, nu kukuula icele lyakwe litali uli, nemo ndamwisya pululu. Ndamutumila aononyi akumulwisya.” Ivyalanda ne Yawe.

Habakuku 2:9

“Kalanda ku antu yano yakalonkela umu kwiila auze pakuti alio yacingilile uwikalo wao, nu kuleuka uzanzo nu ucuzi pa mili yao.

Malaki 1:3

Lelo nakana Esau kumwi na amu mupanda wakwe, nga naleka kuti impanga yao ya myamba iye itongwa. Nupya kusi umwi akaikala mwenemo, suka sile yankusa.”

Yelemiya 48:14

Mwe ina Moabu, uzye mungalanda uli ukuti mwemwe vita vyamaka, yanyela uku kulwa inkondo?