Yelemiya 44:17 - Amazwi Yakwe Leza 2013

¹⁷ Swemo tumatwalilila ukucita vino twalaya. Tumaocelanga namwene wa mwiyulu ubani. Tumamupongolwelelanga na mawila ya vyakumwa. Vivi kwene sile vino twacitanga sweisikulu, ivikolwe vitu, yamwene itu, intunguluzi zitu, ndi vino antu yacitanga mu misumba yamu Yuda nu mu miseo yamu Yelusalemu. Pano lilyo lyene twakwatanga vyakulya ivivule, twayanga nu longo nupya ni syamo litatuponelanga, awe.

Yelemiya 44:17 Referans Kwoze

Yelemiya 7:18

Ana yakasweya inkwi, yaisi nayo yapemba umoto, anaci nayo yakandila umunya wakupangila namwene wa kwiyulu yakeke. Nupya yene yakapongolwela uwila wakwe waini kuli tuleza tuze apakuti yansosye.

Neemiya 9:34

Ivikolwe vitu, yamwene itu, intunguluzi zitu, na yasimapepo itu, yonsi yakanyile kulondela amasunde yako. Yakana ukuwaka amalamulo yako navino wayasokanga.

Ezekelo 20:8

Lelo yene yamfutatila, yakana nu kunguvwa. Yakana kusumba tuluwi twao utwipisye, yakana nu kufumya amano yao ku tuluwi, tuleza twaufi twamu Eguputo. Nani ali pakuyafululula uyi uyi mumu kwene mu Eguputo.

Malango 23:23

lelo ndi waitemelwa sile wenga ukulaya ukucita cimwi, lyene fwandi ulinzile wacicita.

Kufuma 16:3

Liyanena liti, “Ngani cazifile kuti Yawe aleke tufwile mu Eguputo. Kuku twalyanga inyama ni vyakulya vyuze tukwikuta. Lelo mwatuleta mu lwanga kuti swensi tufwe ni nzala.”

Filipi 3:19

ukuti antu yaa yalasumbwa kuzimo! Yene yakapepa inda zyao nu kuitumika pa vintu vino yalinzile ukuuvwa insonyi. Yene yakaelenganya sile pa vintu vya muno nsi.

Yelemiya 44:25

Yawe Wamaka yonsi, Leza wa ina Izlaeli akuti, ‘Mwe yamangu mwe, vino mwalaya apatunwa twinu mufwile mwavicita ni minwe yinu. Mukavwanga ndi vino mulafikilizya ivilayo vino mwalaya, ivyakocela Namwene wa Mwiyulu ubani, nu kumwitulwila uwila wa vyakumwa!’ Aleni fwandi mwalukuwaka ivilayo vinu nu kumwitulwila uwila wa vyakumwa!

Yelemiya 44:21

“Apa ubani uno mocelanga umu misumba yamu Yuda nu mu miseo yamu Yelusalemu, mwemwe pamwi ni vikolwe vinu, yamwene inu, intunguluzi zinu na antu amu mpanga, uzye mwemo mukwelenganya ukuti Yawe atamanyilepo cimwi, nanti mukuti wene wilila kweneko vwilini?

Yelemiya 19:13

Amang'anda amu Yelusalemu nga na mang'anda yakwe yamwene amu Yuda kumwi na mang'anda yonsi yano yakafutumwilamo ubani apa mapaala yao, apakuti yafutumukila mwiyulu mupela, umuli intanda nupya muno yapongolwela waini kuli tuleza tuze, yonsi kwene yalakoweziwa. Yalaya akowele wa musumba wa Tofeti.’ ”

2 Yamwene 17:16

Yonona amasunde yakwe Yawe Leza wao yonsi, yapanga ivimumbwa vya ng'ombe, yacipambasi yaili avyela, avino yamafukamila nu kupeela ntaizyo kuno vili. Yapanga nu unkolanya wakwe kaleza kanaci ka Asyela, nu kupepa intanda nu kuombela Baali.

Yakapingula 11:36

Mwana nawe avwanga ati, “Tata, ndi cakuti walaya mpiti kuli Yawe, lyene ulinzile uncitile wakwe muno walayile, pano Yawe watakulandwila anisi yako aina Amoni.

Mpendwa 30:12

Lelo ndi cakuti iya wiza uvwa vino cali, nga amulesya kufikilizya imilapo iyo kumwi nu kupeela cakwe kamukole, lyene ale ali ni nsambu ya kupasa imilapo ino walavile nanti cimwi cino wali nu kupeela cakwe kamukole, apaula ukwelenganya ningo. Yawe nawe alamwelela, pamulandu wakuti iya watamulesya kufikilizya icilayo cakwe.

1 Petulo 1:18

Pano mwamanya malipilo yano apilwe pakuti muye antungwa kufuma ku wikazi uwa ciwelewele uno mwasambilile ku vikolwe vinu. Malipilo yaa yatakoline wakwe siluva nanti zaabu wino akaononeka.

Mako 6:26

Cii, calenzile mwene kuya nu ulanda cuze. Lelo pamulandu wa milapo yakwe ino wacisile pa manso yakwe yao amilwe ku cimulo, atakanyile kumupeela cino walenzile.

Yelemiya 44:9

Uzye mwilila uyi wa vikolwe vinu, uyi wakwe yamwene aku Yuda nu wa aci yao, nu uyi winu mweisikulu nu wa aci inu, uno wacitike mu mpanga yakwe Yuda nu mu miseo yamu Yelusalemu.

Ezaya 48:5

Ali cino navisokolwile calimwi lino vitacili vifikile apakuti mutakize mukati, ‘Akaluwi kitu akano kaomba. Nanti muti unkolanya uno twapanzile, nanti uno twengulwile, auno walenga kuti vicitike.’

Masamu 106:6

Twaifizye kumwi ni vikolwe vitu, twaluvyanyizye nu kupulupunta twaifya kunuli.

Masamu 12:4

Aputole yayo akavwanga yati, “Amaka itu yaya umu lulimi lwitu, utunwa twitu tulatutaasya. Uzye aweni angatutonsya?”

2 Yamwene 22:17

Nemo yansangukila nupya yakupeela ni mpolelwa ku tuluwi. Akuli kuti yene yansosya umwenzo apa vicitwa vyao iviipe. Nasokela aikazi amu Yelusalemu, nupya ntalatala mbwezye umwenzo.

Mpendwa 30:2

Ayanena ukuti umuntu ndi walaya kuli Yawe icilayo nanti walaya ukucita icintu cimwi, ale wene asi nu kusenuka nupya umwi zwi lino wavwanzile ku kanwa kakwe. Fwandi alinzile kufikilizya consi cino walavile ukucita.

2 Milandu 28:23

Apela impolelwa kuli tuleza twaku Damasiko, utwamucimvizye. Pasi pano wene welenginye ati, “Pamulandu wakuti tuleza twa ene aku Alamu twatituyazwa, nani namapeela impolelwa kunotuli apakuti tungazwe.” Lelo tuleza tuto utwamuletelile wononesi, ituletelela na ina Izlaeli yonsi.

Yelemiya 1:16

Ndakalipila antu yane nu kuyapingwila uyi uyi apa kwifya kwao. Yene yatiyansangukila, yakocela tuleza tuze ubani nu kupepa ivicitwa vya minwe yao.

Yelemiya 11:12

Lyene antu amu Yuda nu mu Yelusalemu yamayanga kuli tuleza tuno yakaocela impolelwa. Lelo kusi nanti cimwi cino tulayazwilizya lino uzanzo wayaponela.

Yelemiya 18:15

Lelo antu yane yanjilila. Yene yakaocela utuluwi ubani, tuto utwayalenzile kupumeka umu nzila zino yalinzile ukupitamo. Yene yata ukulondela inzila zyampiti. Yakalondela tuzila twakwe tondo, ni miseo izyokoloke.

Ezekelo 8:16

Alino lyene ansenda nu kuntwala mukasi ka musolo wa Ng'anda yakwe Leza, nga kuku kwene apa wingililo wa Ng'anda ikulu yakwe Leza, pakasi ka lukungu na kavuwa, pali manye antu amakumi yaili na yasano. Yene yafutatile Ng'anda ikulu yakwe Leza ala ni vinso vyao vilozizye ku ufumondaka, nga ala yakupepa ilanzi lwaku ufumondaka.

Ezekelo 20:32

Mwemo mwapanga mpiti mu myenzo inu ukuya wa antu ya mitundu yuze, mwemo mwapanga ukuya wa antu yauze aikala mu mpanga zyuze, akapepa vimuti, amawe, lelo kuno muli citalatala ciye vivyo foo.”

Ezekelo 23:41

Nga lyene uwikala pa usanzi ukankala nu kwika itebulo pa nkolelo yakweo, apano utantika ubani wane na mafuta yane.

Habakuku 1:16

Acino lyene yakapela impolelwa ku masumbo yao, nu kocela ubani ku mato yao. Pamulandu wakuti vikwene ivikayapeela ivisuma nu kulya ningo.

Yelemiya 7:17

Uzye utakulola ivintu vino yakucita mu misumba yaku Yuda nga nu mu misolo yamu Yelusalemu?