Yelemiya 43:10 - Amazwi Yakwe Leza 2013

¹⁰ Lyene uyanene uti Yawe Wamaka yonsi, Leza wa ina Izlaeli wavwanga wati, ‘Namatuma akuyasenda Nebukadineza, umwene waku Babiloni umuomvi wane. Nawe aliza ku kuteeka cilimba cakwe apa mawe yaa yano ninziika. Nawe alanzika cikuwalo cakwe pa wene wakwe.

Yelemiya 43:10 Referans Kwoze

Yelemiya 1:15

Pano nasya mpunde imitundu yonsi ino ikateekwa kuli yamwene aku kayeya. Yaliza yonsi pyu. Nacila wenga aliza aike icilimba cakwe ca wene apa mpongolo zyakwe Yelusalemu, na pa malinga yonsi yano yauzinguluka. Alino nu kunzi ya misumba yonsi yakwe Yuda.

Ezaya 44:28

Nene nkanena Kilusi inti, ‘Wewe kacema uwakwane, ulafikilizya amapange yane yonsi.’ Wene alavwanga ati, ‘Lekini Yelusalemu akuulululwe.’ Ni Ng'anda ikulu yakwe Leza nayo ulati, ‘Ikini umufula wakweyo.’ ”

Masamu 31:20

Ukayasungilila kunuli, nu kuyacingilila uku mapange aipe a antu. Ukayasunga umwi cele lyako, nu kuyafuntusya uku ntusi zya anisi yao.

Masamu 27:5

Umu nsita ya mazanzo, aliwe akansunga umu mutanda wakwe. Aliwe akamfisa umu Ng'anda yakwe ikulu nu kuntongamika apapelapela ya ciliwe.

Masamu 18:11

Acita imfinzi wa cintu cakuivimbilikizya mwenemo, amakumbi atikame amvula nayo ayasangula ica kuifupilizya mwenemo.

Mateo 22:7

Lelo Mwene asoka cuze, nga atuma asilika yakwe kuya koma inkomi zizyo nu kooca misumba yao iikulu.

Danieli 2:21

Wene akaangalila utusita ni viputulwa vya mwaka, akalasika antu apa wene nu kuyasisya penepo. Aliwe kwene akapeela amano ku antu yamano, nu kumanya kuli yayo akailuka.

1 Yamwene 20:16

Inkondo itandika lino ilanzi lyafika pa mutwe papela, lilyo ale Beni Hadadi pamwi na yamwene yano yuvwananga nawe yali mu mataalu yao yakumwa. Yamwene yaya yonsi pamwi yali 32.

1 Yamwene 20:12

Beni Hadadi auvwa amazwi yaa ale akumwa pamwi na yamwene yauze mu mataalu yao. Lyene apeela ilamulo ku antu yakwe ati, “Iteyanyini ku kulwa ulwi.” Acino antu yalya iyaitenyanya ku kulwisya umusumba.

Ezaya 45:1

Yawe wavwanga kuli Kilusi umusololwe wakwe, wino walemelela ikasa lyakwe lilunji, kuti acimvye imitundu yuze ya antu, nu kupokolola yamwene amaka, nu kupankula ivisasa kuti impongolo zitayalwa.

Yelemiya 43:9

“Tola amawe uyazike pa manso ya ina Eguputo yonsi mu musolo wa mawe, apa wingililo wi sano lyakwe Falao mu Tapenesi.

Yelemiya 46:13

Lino umwene Nebukadineza wizile ku kuzanza impanga ya Eguputo, Yawe wanenyile kasema Yelemiya ati,

Ezekelo 5:12

Antu yonsi yalapaatukana patatu, iumba lyonga lilafwila mu musumba ku mpungo nu ku cipowe. Lyakwe cili nalyo lilafwila kunzi ya musumba ku lupanga. Lyakwe citatu nalyo ndalisalanganyizizya mu muza alino nkalilondele nu lupanga.

Yelemiya 49:38

Indika ni cilimba ca wene wane mu Elamu Na makombe yane mwenemo. Ivyalanda ne Yawe.