Yelemiya 22:18 - Amazwi Yakwe Leza 2013

¹⁸ Caleka Yawe wavwanga apamulandu wakwe Yosiya umwana umonsi wakwe Yeoyakimu, umwene waku Yuda, ati, “Kusi nanti umwi alamulosya, ‘Silolini vino caipa wakwe cimwi mwe yacuza yane!’ Kusi nanti umwi alamulila ati, ‘Mwene wane! Musambazi wane!’

Yelemiya 22:18 Referans Kwoze

Yelemiya 16:6

Akama na apina yalafwa mu mpanga kwene ii, lelo kusi umwi alayazika nanti kuyalosya, nanti uwakuicemba nanti ukupela ulukuzu apamulandu wao.

1 Yamwene 13:30

Alino atoola icala aciika mwi lindi lya mwi cele lyakwe, nga aliwe pamwi na ana yakwe aonsi ala yakumulosya yakuti, “Owe mwinane, mwinane we!”

Yelemiya 22:10

Mwe antu amu Yuda mutalilila umwene Yoaazi. Mutalilila imfwa yakwe. Lelo lililini Yoaazi, wino yakusenda ku uzya, pamulandu wakuti wene atalatala awele, nu kwiza lola impanga muno wavyalilwe.

Yelemiya 16:4

yalafwa imfwa ya ndwala ziipisye. Kutalaya wakuyalosya nanti ukuyaziika. Yalalala wa muvundo mu musili. Yalalowa ku lupanga nu ku cipowe. Ivyala vyao vilaya ivyakulya vya vyunyi vyamu lwelele ni vilyanyi vyamu mpanga.

Yelemiya 34:5

Lelo ulafwa umu mutende nu longo. Vino yociile ivikolwe vyako ubani, yamwene yampiti yano yakukolelile, ali vino yalocela nawe kwene, nu kukulosya yati, ‘Iye mwe kalanda kasikolo Umwene witu mwe!’ Vivyo avino nemweneco nalaya, Ivyalanda ne Yawe.”

2 Milandu 35:25

Kasema Yelemiya wasisile ulwimbo lwa ndosya ulwakulosezya Yosiya. Lulo luno yakiimba ya nyimbo aonsi na anaci yakaimba ukufika uwanda wilelo umu mpoma zyao umu kulosya Yosiya. Uo uli mwata wa ina Izlaeli, nu lwimbo lulo lukazanwa umu lupapulo lwa ndosya.

2 Samueli 1:26

Nakulosya, we mwinane Yonatani. Silola vino nakutemilwe wakwe cimwi. Icitemwiko cako kunondi cali icakuzunguka. Calusile icitemwiko ca anaci.

2 Yamwene 23:6

Yosiya afumya nu lucesi lucindamisye umu Ng'anda ikulu yakwe Yawe, luno yapepanga apa kucindika Asyela. Nalo kwene alusenda ukunzi ya musumba nu kulutwala uku Cifoloma ca Kiduloni, akuno yaya yalocela. Ni itwi alisansantila apapela ya malindi kuno yakazika umuntu ali wensi.

2 Yamwene 23:36

Yeoyakimu wali ni myaka yakuvyalwa amakumi yaili na isano apa nsita ino watandike ukuteeka, nga wateesile mu Yelusalemu imyaka ikumi na onga. Nyina wali a Zebida umwana wakwe Pedaiya, uwaku Lumaa.

2 Yamwene 24:6

Lyene Yeoyakimu asuka afwa, nga yamuzika. Alino Yeoyakini umwana wakwe umonsi amupyana pa cilimba ca wene.

2 Milandu 36:5

Yeoyakimu wali ni myaka yakuvyalwa amakumi yaili na isano lino watandike ukuteeka, nga wateesile mu Yelusalemu imyaka ikumi na onga. Wene wacitanga inkota pa manso yakwe Yawe Leza wakwe.

Yelemiya 22:12

Alaya akafwile umu mpanga ino yamusenda uku uzya. Atalatala alole impanga ino nupya.

1 Milandu 3:15

Ana aonsi yakwe Hosiya aeya: Yoanani uwali iyeli, wakwe ciili a Yeoyakimu, wakwe citatu a Zedekiya, wakwe ciini a Syalumu.

Yelemiya 21:11

Nupya Yawe anena kuti nene ang'anda ya wene wakwe Yuda inti, “Uvwini ku mazwi yano ne Yawe nkulanda.

Yelemiya 36:30

Cico kwene ali cino Yawe wavwanga pamulandu wakwe Yeoyakimu umwene waku Yuda wati, atalatala akwate umwi namuze uwakwikala pa cilimba cakwe Davidi, ni cala cakwe cilasumbwa ukunzi ku cipuki akasanya, alino nu ku mpepo usiku.