Yelemiya 2:36 - Amazwi Yakwe Leza 2013

³⁶ Uzye pacani cino mwemo mwayela namansenunsenu? Nkumunena mucumi ndi vino aina Eguputo yalamuzewanya ndi vino aina Asilya yamuzewanyizye.

Yelemiya 2:36 Referans Kwoze

Yelemiya 31:22

Uzye ulazingota mpaka lilaci, we mwanaci mutalami? Pano Yawe watacita icintu cipya panonsi. Aeci cakuti umwanaci wataswilila kuli iya.

Oseya 5:13

“Lino antu aku Efulemu yalola ukuti yakulwala, nga antu aku Yuda nayo yalola ivilonda vyao, antu aku Efulemu yaya iyaya ku ina Asilya, antu aku Yuda nayo yatuma amazwi ku mwene mukulu, kuti ayazwe. Lelo wene atakweti amaka akuyapozya nanti ukulwazya ivilonda vyao.

Oseya 12:1

Vyonsi vino Aluko lwakwe Efulemu yakacita ukutandikila akatondo mpaka usiku ivyasilesile, nupya vikaonona. Ucenjezi ni vicitwa vya usomvi vikusanduluka pakasi kao. Yene yakapangana na ina Asilya nu kucita uculuzi na ina Eguputo.

Yelemiya 2:23

Ungavwanga uli ukuti utaikowezya nupya utalondelanga Baali? Tala lola vino waifizye umu cifoloma ca Beni Hinoni, elenganya pali vino wacisile. Wemo icili conga ni ngamila yakaci ino ikusimula kuu na kuuku.

2 Milandu 28:16

Apa nsita ilya kwene umwene Aazi atuma amazwi ku mwene waku Asilya kuti aize amwazwilizye.

Oseya 14:3

Aina Asilya yatangatutuula, ni mfwalasi zya nkondo zitangatucingilila. Vino twapanga uku makasa itu tutalatala twame tuti, ‘Leza witu,’ pano wewe waya na mizu ku ana asyale.”

Oseya 10:6

Endi, unkolanya uo ulasendwa ku Asilya, kuti ukapelwe uwila ku mwene mukulu wakweneko. Aluko lwakwe Efulemu yalazewana. Aina Izlaeli yaluvwa insonyi pamulandu wa kulondela umpandamano wauko uwaufi.

Oseya 7:11

“Aluko lwakwe Efulemu yakoline wa nkunda, itumpe, iyaula amano. Yene yakaama aina Eguputo, nu kuya ku Asilya kukulenga uwazwilizyo.

Ezekelo 29:7

Ndi yailema ikontokela mu minwe yao nu kuyalepola iminwe yonsi. Ndi yasintilila kunuli uvunika, nu kusunkanya imisana yao.

Nyimbo zya ndosya 5:6

Tukatambilikizya amakasa itu ku Eguputo nanti ku Asilya apakulola icakulya kuti twikale aumi.

Nyimbo zya ndosya 4:17

Ukulunda pali cico, amanso itu yasusile yatonta. Twatwalilile ukulolela ukwazwiliziwa ukufuma ku luko luno lutange lututuule.

Yelemiya 37:7

“Yawe Leza wa ina Izlaeli wavwanga ukuti wasuke umwene wa ina Yuda uwatakutuma kunondi, uku kunguzya kuti indole ivita vyakwe Falao ivikwiza ku kutaasya nupya vyasya viswilile ku mpanga yao ku Eguputo.

Yelemiya 2:33

Iye mwe vino wamanya ningo imisango yakulondelela icitemwiko, nu kuyelezya ukupita na maifyo!

Yelemiya 2:18

Uzye ukusunta kuno mukusuntilila ukuya uku Eguputo ukukumwa amanzi ya muli Nailo, kukumuzipila cani? Nanti ukusunta kuno mukusuntilila uku Asilya, ukukumwa amanzi ya muli Yufulate, kukumutumbwila cani?

Ezaya 20:5

Lyene yayo yonsi asintilila mu mpanga ya Kusyi nu kuitanka pa ina Eguputo, yaluvwa intete nga ni nsonyi zilayalema.

Yelemiya 46:12

Mitundu yatiyuvwa pa lwakuzewana kwako. Impooma zyakukutezela zyatizilimba impanga. Icita conga cati cipempezyokela ku cuze nga na vyoili kwene vyativiponela pansi.”

Ezekelo 16:28

Wemo walongozyanga na ina Asilya, nu kutonta foo. Pano wapunukisye, utatazile uti cafula.

Yelemiya 22:20

Yangini ku Lebanoni mwe ina Yelusalemu mwe, akuno mukapunde, yangini ku mpanga ya Basyani. Yangini mukalaizye ukufuma mu myamba yaku Moabu, pamulandu wakuti yonsi yano mwalemana nayo yatiyacimviwa.

Yelemiya 22:22

Umuza umaululula intunguluzi zinu zyonsi. Yano mwalemana nayo yalayasenda ku uzya. Alino lyene mwemo insonyi zilamulema, mulapupana pamulandu wa uyi uno mwacita.