Yelemiya 11:15 - Amazwi Yakwe Leza 2013

¹⁵ Nupya Yawe avwanga ati, “Antu yano nemo natemwa ali antu yano yakucita ivintu viipe. Uzye insambu cii zino yakweti izyakuya mu Ng'anda yane ikulu? Uzye yene mu mano yao yakwelenganya ukuti ukulaya amalayo nu kutuula impolelwa ali vino vingayapususya ku uzanzo? Uzye cico cingayasansamusya?

Yelemiya 11:15 Referans Kwoze

Mapinda 2:14

yayo akazangila umu kucita iviipe, nu kusekelela lino yacita cimwi ica muselu.

Tito 1:15

Vintu vyonsi ivisanguluke kuli yao akwata myenzo isanguluke. Lelo kusi cimwi icisanguluke kuli yao akowela nupya atataila. Yene yakwata kwelengenya kukowele ni myenzo yao yakowela.

Yakobo 4:16

Lelo ndakai muli ni cilumba nupya mukuitumika. Kuitumika kwa musango uu konsi ukuluvyanya.

1 Kolinto 13:6

Kutemwa kusyazangila mu kucita viipe, lelo kukazangila mu cumi.

Loma 11:28

Pano yakana Ilandwe Lisuma, Ayuda yaya anisi yakwe Leza pamulandu wakwe mwemwe mwe Akulukuwa. Lelo pamulandu wakuti Leza uwayasolwile, Ayuda yene a yacuza yakwe pamulandu wa vikolwe vyao.

Luka 8:28

Lino walola Yesu apunda, afukama pa ngazo zyakwe Yesu alaizya ati, “Yesu we Mwana wakwe Leza uwa papelapela! Uzye ukulonda cani kunondi? Nakupapata, utancuzya!”

Mateo 22:11

“Lelo lino mwene wingilamo kukulola yano amilwe, alola umuntu umwi mwenemo, wino atazwite vizwalo vya pa winga.

Oseya 3:1

Yawe wanenyile ati, “Yanga, nupya ukalange icitemwiko ku muci wako cizelele wino akucita ulenzyo nu monsi muze. Umutemwe wakwe vino Yawe watemwa aina Izlaeli, nanti angala yene yakaya ku kupepa tuleza tuze nu kutemwa ukupeela amawila ya mukate ku tuluwi.”

Yelemiya 15:1

Lyene Yawe avwanga kunondi ati, “Nanti angala Mose na Samueli yangimilila apa manso yane nu kupapata, nemo ntange nezye ukuuvwila antu yaa uluse. Wemo uyazingile sile ukutali uleke yapita.

Yelemiya 12:7

Yawe walanda wati, “Natintazyela antu yane. Ninkana umutundu wane usololwe. Nasumba antu yane akundwe mu makasa ya anisi yao.

Yelemiya 3:14

“Si welulukini, mwe antu aula utailo mwe, pano nene indi Yawe Leza winu. Umu misumba inu yonsi, onga onga ndatolamo umuntu wenga. Nu mu nko zinu kwene namo ndatola yaili nu kuleta mwemwe uku Zioni.

Yelemiya 3:8

Waweni nakuno nazinzile umutalami Izlaeli apamulandu wa uzelele wakwe. Namupiile na kalata uwakumuzingila. Lelo Yuda, kaci wakwe, cizelele muze, wene atoofile foo. Waya wacita icili conga kwene.

Yelemiya 2:2

“Nkaiusya ukuti lino mwali ance mwali ni cuvwilo. Mwemo mwantemilwe wakwe cimwi muli unawinga winu. Yandondile umu lwanga, itupita suka tufika mu mpanga itatala yalimwa.

Ezaya 50:1

Yawe wavwanga wati, “Uzye kalata wakutaana wino natelilepo mayo winu ali kwi? Nanti uzye akuli weni uwankongwesizye, kuno nakazizye mwemwe? Awe, mwemo yamukazizye uku uzya pamulandu wa maifyo inu, nga nyoko nawe yamusenzile pamulandu wa nkota zinu.

Mapinda 28:9

Ndi umwi akakana ukuvwa isunde, ni pepo lyakwe kwene lyapatwa.

Mapinda 26:18

Umuntu akatumpoka umuze ati, “Awe nkuseka sile,

Mapinda 21:27

Yawe wapata impolelwa ya antu aipe, makamaka ndi yaipelela apamulandu umwi uwipe.

Mapinda 15:8

Yawe wapata uwila wa muntu mwipe, lelo ipepo lya antu asuma likamuzanzya.

Mapinda 10:23

Iciwelewele cene cikazangila mu kuluvyanya, lelo uku muntu akauvwikisya ningo ivintu akazangila mu mano.

Masamu 50:16

Lelo antu aipe ankota, yene Leza amayanenanga ati, “Icani cino mwemo mungavwangila apa masunde yane. Nanti cino mungavwangila apa upangano wane icani?

Masamu 60:5

Tutaasye fwandi uku maka yako, uuvwe ipepo litu apakuti antu yako, yano watemwisya, yakululwe.

Yelemiya 13:27

Wene wailolela kuno mukucita ivintu vino wapata. Umu myamba nu mu vyalo ali muno mukalondelela utuluwi, tuleza twa inamasi, ndi vino umonsi akacita wino akukumbwa umuci wa muze, ndi vino mfwalasi yakalume ikacita apakukokomela iya kaci. Kalanda kuno muli mwe ina Yelusalemu! Uzye alilaci lino mulakondolwa?

Yelemiya 23:11

Yakasema kumwi na yasimapepo nayo kwene yatiyasuula Leza. Natinjazanikizya yakucita ivitazifile umu ng'anda yane kwene.