Yakapingula 4:15 - Amazwi Yakwe Leza 2013

¹⁵ Lino Balaki ni vita vyakwe yatandika kuzanza, Yawe avulunganya Sisela kumwi na maceleta ni vita vyakwe kwene. Sisela aika mwi celeta lyakwe nga atandika nu lwilo pansi.

Yakapingula 4:15 Referans Kwoze

Yoswa 10:10

Yawe nawe ayalenga ukupamviwa nu kuzakantika pa manso ya ina Izlaeli, yao ayacimvizye apa kuyakomola cipezya amano ku Gibyoni. Aina Izlaeli nayo iyayacocovya mu museo uwaya ku Beti Holoni nga iyayakomola nzila yonsi ukufika ku Azeka nu ku Makeda.

Ayebulai 11:32

Uzye vyuze vino ningalanda vyani? Nati nulilwa insita yakulanda pali Gidyoni, Balaki, Samusoni, Yefita, Davidi, Samueli na yakasema.

2 Yamwene 7:6

Yawe umwisikulu uwalesile ukuti aina Asilya yuvwe icongo. Umu kuvwa kwao cuvwisile ungati icongo ca vita ivingi sana ivisenzile imfwalasi na maceleta. Aina Asilya ali pakuvwanga yati, “Uvwini icongo, umwene waku Izlaeli watalalika umwene wa ina Hiti nu waku Eguputo pamwi ni vita vyao apakuti yize yatulwisye!”

Malango 7:23

Lelo Yawe alika anisi inu mu makasa inu nu kuyoofya mpaka yasuke yononwe.

1 Samueli 7:10

Lino Samueli wapeelanga uwila wakocela Yawe, aina Filisti nayo iyaya pa nkolelo ku kuzanza aina Izlaeli. Lelo pa kasita kaka kwene alino Yawe atuma ukupangalansya ku kalamba sana, cakuti aina Filisti iyavulungana, iyatandika nu kusimula cisimule simule.