Milimo 26:16 - Amazwi Yakwe Leza 2013

¹⁶ Lelo katuka, imilila. Nati ndoleka kunuli kuti nkusole uye muomvi wane. Uli nu kupeela umboni kuli yauze pali vino walola na vino ndakulanga pacisila.

Milimo 26:16 Referans Kwoze

Danieli 10:11

Umungeli anena ati, “We Danieli, Leza wakutemwa wakwe cimwi. Katuka nu kusumbako amano kuli vino namakunena. Nintumwa kunuli.” Pacisila lino mungeli wilya walanda cii, inkatuka ala ncili nkuzakaza.

Ezekelo 2:1

Ngi zwi lilyo ilineena liti, “We mwana wa muntu, katuka ndande nawe!”

1 Timoti 1:12

Nkataizya Klistu Yesu Mwene witu, wino uwampile maka akuomba mulimo uu. Nkumutaizya apa kumpenda kuya uwa kutailwa nu kunsolola kuti namutumikila.

Galatiya 1:12

Ntalipokelile kufuma ku muntu, nupya kusi umuntu umwi uwansambilizye. Yesu Klistu umwisikulu uwalisokolwile kunondi.

Loma 15:16

lyakuya muomvi wakwe Yesu Klistu uwa kuombela Akulukuwa. Nkatumikila wakwe simapepo pa kukosola Ilandwe Lisuma kufuma kuli Leza, pakuti Akulukuwa yangaya wa mpolelwa iyapokelelwa kuli Leza, apalamikwa kunoli mu maka yakwe Mupasi Wamuzilo.

Kolose 1:25

Leza uwancita kuya muzya wi uvi, nupya uwampile mulimo uu pamulandu winu kuti mbombe nde nkosole izwi lyakwe.

Kolose 1:23

Mulinzile kutwalilila kuya acumi nupya akomeleke cuze mu utailo winu. Mutalinzile kuta upaalilo uno mwapokelile lino muvwile Ilandwe Lisuma. Lyene lyakosozilwe ku antu yonsi pano nsi, nga nani nemwisikulu nene muomvi wi Ilandwe kwene lii.

Galatiya 2:2

Napisile pamulandu wakuti Leza wasokolwile kunondi ukuti ndinzile mpite. Lino twakomenkine ni ntunguluzi mu nkama nalondolwile Ilandwe lino nakosozile ku Akulukuwa. Nalondanga kusininkizya vino mulimo wane pa mpiti nga nu mu nsita ikwiza utaya uwasilesile.

Milimo 23:11

Usiku wa wanda walondelela, Mwene aimilila apali Paulo ati, “Posya sile! Wakwe vino watupeela umboni uwa pali nene muno mu Yelusalemu, avino ulinzile upele nu ku Loma kwene.”

2 Timoti 4:5

Lelo wemo ulinzile kuisunga muli vyonsi. Uwaposya mu macuzi yonsi. Omba mulimo uwakukosola Ilandwe Lisuma nga nu kuomba ncito yako yonsi wa muomvi wakwe Leza.

1 Timoti 4:6

Ndi watungulula vii ku ina itu, lyene ulaya muomvi musuma wakwe Klistu Yesu. Lyene ulalanga ukuti wemo wimulwa na mazwi ya utailo nga nu usambilizyo usuma uno walondela.

1 Tesalonika 3:2

nu kutuma Timoti mwina witu kunomuli. Wene pamwi naswe akatumikila Leza pa kukosola Ilandwe Lisuma lya pali Klistu. Twamutumile kwiza mukomelezya nga nu kukomya utailo winu,

Kolose 1:7

Mwasambilile cikuku cakwe Leza kuli Epafula, muomvi unji mukundwe nupya uwacumi wino mucifulo cakwe sweswe akatumikila Klistu.

2 Kolinto 5:18

Leza aliwe uwacita vii vyonsi. Wene watumile Klistu kupanga mutende pakasi kakwe Leza naswe, nupya watupela mulimo uwa kupanga mutende pakasi kakwe umwisikulu na antu.

2 Kolinto 4:1

Leza mu mizu yakwe watupela mulimo uu kuti twaomba. Acino tusyatonta.

Loma 1:5

Kupitila muli Klistu amuno Leza wampeela isyuko lyakuya mutumwa pakuti ntungulule antu amu nko zyonsi kuti yataile nu kuyela Leza na kuti Klistu acindikwe.

Milimo 22:10

Lyene imuzya inti, ‘Uzye namacita uli Mwene?’ Mwene anena ati, ‘Katuka yanga ku Damasiko, akuno yayakunena vino Leza watakusolwela kuti ucite.’

Milimo 21:19

Paulo ayalamuka ayalandila vintu vyonsi vino Leza wacita pakasi ka Akulukuwa kupitila mu mulimo wakwe.

Milimo 20:24

Lelo ntasakamile pa umi wane, pano nkulonda sile kuti imale umulimo uno Mwene Yesu wampile ukucita, uwa kukosola Ilandwe Lisuma lya pamulandu wa cikuku cakwe Leza.

Milimo 6:4

Naswe, sweisikulu lyene, tumaipelesya ku kupepa nga nu mulimo wa kukosola.”

Milimo 1:25

kuti apyanile pa mulimo wa utumwa uno Yuda wasya nu kuya ku wikalo uno wasolwile umwisikulu.”

Milimo 1:17

Yuda wali uwa mwi umba litu pano wasolwilwe kutoola imbali mu mulimo witu.” (

Luka 1:2

Antu yaa yalemba vino tuvwile kuli yakambone aviweni kufuma ku utandiko, yano ali yakakosola.

Milimo 26:15

Alino nani inuzya inti, ‘Wewe weni Mwene?’ Nawe Mwene aasuka ati, ‘Anene Yesu, wino ukuzunya.

Efeso 3:3

Nupya kalata wi akumunena pamulandu wakwe vino Leza wasokolola kunondi vya nkama yakwe nga nu kuleka kuti manye.