Malango 31:14 - Amazwi Yakwe Leza 2013

¹⁴ Lyene Yawe anena Mose ati, “Utakweti lyene amanda avule pano pansi. Wasya ufwe. Aama Yoswa mulete kuno mwi Taalu lya Ukongano pakuti imupele amazwi ya utunguluzi akusyalikizya.” Acino Mose na Yoswa iyaya kwi Taalu lya Ukongano.

Malango 31:14 Referans Kwoze

Mpendwa 27:13

Amala sile wailola, alino umafwa, wakwe vino munyonko Aaloni wafwile,

Malango 31:23

Lyene Yawe apeela ilamulo lii kuli Yoswa umwana umonsi wakwe Nuni, ati, “Uposye nupya uzyansye. Pano wewe uli nu kutungulula aina Izlaeli ku kupoka impanga ino nayalavile nu mulapo, nga nani namayanga nawe.”

Yuda 1:24

Kuli Leza wiyo angamucingilila kukuponela mu maifyo, wene angamulenga kwimilila panoli mu lulumbi lwakwe aulwa umulandu nupya aluzango.

Loma 12:1

Caleka inane, pamulandu uno Leza watuyela mizu cuze, nkumupapata kuti mupele mili inu kunoli wa mpolelwa zya umi, nu kuipelesya mu kumuombela nu kumuzanzya. Kuu, kuli kupepa kwa cumi kuno mulinzile mwacita.

Ezaya 38:1

Umu manda yalya umwene Hezekiya walwile uwakufwa. Alino kasema Ezaya umwana umonsi wakwe Amozi waile uku kumupempula. Aya amunenelapo na mazwi akuti, “Yawe akukunena ati, ungatantika vyonsi ningo, pano kwene wemo usikupusuka foo, umafwa.”

Kasambilizya 9:5

Endi, antu lino yacili nu umi yakamanya ukuti yalafwa. Lelo afwe yatamanya nanti acimwi. Yene yatakwata icilambu nacuze. Yene yililika pyu.

Yobo 2:1

Nu wanda uze kwene angeli yakwe Leza yiza ku kwizalolekela pa manso yakwe Yawe, nga Satana nawe kwene akuno wali.

Yobo 1:6

Uwanda umwi, ana yakwe Leza amwiyulu yizile uku kupempula Yawe. Na Satana kwene apano wali.

2 Yamwene 1:4

Acino muye mukanene umwene muti Yawe wavwanga wati, ‘Wemo casila usikupola, lelo icumi kwene umafwa!’ ” Alino Eliya apita.

1 Samueli 10:19

Lelo mwemo mwatimukana Leza winu, wino akamutuula ku ntazi zinu zyonsi na kuli vyonsi vino vikamusakamika. Mwemo mwavwanga mwati, ‘Awe! Tupele sile umwene uwakuti atuteeka.’ Acino fwandi yangini mutantame pa manso yakwe Yawe umu mitundu inu ni miiko inu.”

Yoswa 24:1

Lyene Yoswa akonganika antu amu mitundu yonsi ya ina Izlaeli ku Syekemu. Aama aikolo, ni ntunguluzi, na yakapingula nga na yamusika yonsi ya ina Izlaeli, nga nayo yiiza yimilila pa manso yakwe Yawe.

Yoswa 23:14

“Ndakai nemo lyene nasya mfwe. Mwemo mwensi mumanyile umu myenzo inu yonsi ukuti kusi nanti cimwi cisuma cino Yawe Leza winu wamulaya icitafikiliziwa. Vyonsi kwene vino walavile vyafikiliziwa.

Malango 34:5

Acino Mose umuomvi wakwe Yawe ali pa kufwila mumu kwene mu mpanga yaku Moabu, wakwe muno Yawe wavwanzile.

Malango 32:50

Wemo ulafwila pa mwamba kwene uwo wakwe vino umunyonko Aaloni wafwile pa Mwamba wa Holi,

Malango 31:2

“Ndakai natinkwata imyaka ukulingana 120. Nkuposiwa kuti ningamutungulula ningo. Lelo asi cico conga. Yawe watanena ukuti ntalalamba Luzi lwa Yodani.

Kufuma 34:2

Ukaiteyanye katondotondo, alino insita ya katondo kwene ukakwele Mwamba wa Sinai pakuti ukankomenkanye papela pa mwamba.

Utandiko 47:29

Lino Yakobo walola insita ya mfwa yakwe yapalama atuma uwakuya ama Yosefu umwana wakwe umonsi. Nga lino Yosefu wafika kunoli, Yakobo amunena ati, “Ndi wantemwa, pisya makasa yako mu mpamba zyane alino ulape mulapo ukuti ndi naca nafwa utalanzika muno mu Eguputo.

Kufuma 33:9

Mose ndi wingila mwi Taalu lili ikumbi liiza likala pa mulyango wi Taalu, alino Yawe atandika kuvwanga na Mose ukufuma mwi kumbi.

Mpendwa 27:12

Alino Yawe anena Mose ati, “Kwela umwamba uwamu myamba ya Abalimu pakuti ulole impanga ino namapeela aina Izlaeli.

Malango 4:22

Nemo ndafwila kuno kwene. Ntalalamba Luzi lwa Yodani. Lelo mwemo mwasya mulambe nu kupoka impanga iya ivunde nga mwikale mwenemo.

Malango 31:13

Mu musango kwene uu amu mupanda winu yano yatatala yuvwa isunde lii lyakwe Yawe Leza yaluvwa. Nayo ali vino yalasambilila ukumuyela pa manda yonsi yano yalikala mu mpanga ino mwasya mwingile mwenemo mu mbalama ya Luzi lwa Yodani.”

1 Samueli 26:10

Nalapa umwi zina lyakwe Yawe waumi ukuti Yawe umwisikulu alakoma Saulo lino insita yakwe ilafika, nanti alaya ku nkondo akuno imfwa ikamuzane.

1 Yamwene 2:1

Lino Davidi waya mu pipi nu kufwa, aama Solomoni umwana wakwe pakuti amunene amazwi yakwe akusyalikizya autunguluzi. Amunena ati,

Kufuma 33:11

Avino Yawe wavwanganga na Mose manso na manso wakwe vino umuntu wensi akavwanga na cuza wakwe. Lyene pacisila cakwe vii Mose aswilila ku nsakwe kuno walafumile. Lelo mulumendo umwi, zina lyakwe Yoswa umwana umonsi wakwe Nuni, wino wali kaazwa wakwe Mose asyala mwi Taalu.

Mpendwa 27:18

Caleka Yawe anena Mose ati, “Tola Yoswa umwana umonsi wakwe Nuni, wiyo ali nu mupasi, umwikepo amakasa.

2 Yamwene 20:1

Umu manda yaya umwene Hezekiya alwala indwala yakumutwala uku mfwa. Alino kasema Ezaya, umwana wakwe Amozi aya ku kumufwilizya, nga lino amunena ati, “Yawe Leza wavwanga wati cange cizipe utandike ukutantika ivintu ningo, pano indwala ii isi ningo foo, imakukoma sile.”