Luka 13:19 - Amazwi Yakwe Leza 2013

¹⁹ Ukoline wa lumbezu lwakwe musunta, luno umuntu watile mu calo cakwe. Lyene lino lwamela luya musunta, nga akula aya umuti, ni vyunyi viluka vinsanzo mu misambo ya cisao cauko.”

Luka 13:19 Referans Kwoze

Danieli 4:12

Amafwa yakweco yali ayembe nupya casesile iviseekwa vivule sana vino antu yonsi umu nsi yangakumana ukulya. Inyama zya mpanga zyapuzilanga mu cisao cakweo, ni vyunyi vyapanganga vinsanzo mu misambo yakweco, nga nu musango onsi wa viumbwa walyanga iviseekwa vyakweco.

Danieli 4:21

Amafwa yakweco yali ayembe, nga naco cakweti iviseekwa vivule vino vingakumana wensi umu nsi ukulya. Inyama zya mpanga zyuwanga mu cisao cakweco, ni vyunyi vyapanzile vinsanzo vyakwevyo mu misambo yakweco.

Milimo 4:4

Lelo antu aingi auvwile Ilandwe lilya yataile, ni mpendwa ya alondezi ikulilako kufika manye mazimbi yasano.

Milimo 2:41

Lino aingi yuvwa ilandwe lyakwe, yalipokelela, nga yawatiziwa. Uwanda kwene ulya antu kulingana na mazimbi yatatu yailundanya kwi umba.

Zakaliya 2:11

Mu nsita kwene iyo antu ya mitundu avule yaliza kuli Yawe, uku kuya antu yakwe. Nawe alaikala apakasi kinu, nu kwiluka muliluka ndi vino Umweneco Wamaka yonsi aliwe wantuma kuno muli.

Ezekelo 31:6

Ivyunyi vyonsi vya mulwelele vyalusile ivinsanzo vyakwevyo mu misambo yakweo. Inyama zyonsi zyamu mpanga zyavyalile umwisika ya nsala zyakweo. Antu yonsi amu nko yatenzi mu cisao cakweo.

Ezaya 9:7

Uwene wakwe ulandalila konsi konsi. Ulasyukila ulongo ulutalasila. Wene alikala apa cifulo ca wene wakwe Davidi nga nu kuteeka uwene wakwe. Wene alausimpa nu kuukomya umu ulungami nu mu ololoke. Ukutandikila sile pali ndakai ukufika na pano insi ilasilila. Ee, cumicumi, avino Yawe Wamaka yonsi alafikilizya cico.

Milimo 21:20

Pacisila ca kumuvwa, yonsi yalumbanya Leza. Lyene yanena Paulo yati, “Mwina witu Paulo, watulola, vino Ayuda mazimbi aingi yati yataila muli Klistu nga nupya yaipelesya kuyela Masunde yakwe Mose.

Mateo 17:20

Alino nawe aasuka ati, “Apamulandu wakuti mukweti utailo unono.” Cumi namunena vino, “Ndi mukweti utailo nanti unono wa lumbezu lwakwe musunta, munganena umwamba uu muti, ‘Sungutila’ nga nao ulasungutila. Kusi cimwi cino mungaposiwa kucita.” [

Ezaya 58:11

Lyene nene ndamutungulula lyonsi sile, nu kumwimula ivintu visuma. Ndaamukomelezya nu kumusunga ningo, mulaya wa calo cino yakakontelela usaka. Mulaya wa kafukoka ka manzi yano yasiipwa.

Ezaya 53:10

Leza nawe ali pakuvwanga ati, Icacumi anene kwene nalonzile ukuti muomvi wane acule, apakuti ku mfwa yakwe akuno kuye impolelwa yakulipila pa ui, pano lyene angakwata impyanyi, angalengela na panonsi, na vino nemo nateinye angaleka ukuti vyacitika ningo.

Lwimbo lwakwe Solomoni 6:2

Mukundwe wane wali waya ku calo cakwe, lwakuli yamolwa ukwalemwa imiti ya mununko usuma. Akucemela ufyo wakwe mu calo, nupya akutema maluwa.

Umbwilo 11:15

Nupya mungeli uwalenga cinimbali alizya ntandala yakwe, ngu mwiyulu muvwika mazwi akulu yati, “Ndakai akweti amaka akuteeka insi u Mwene witu na Katuula, nupya wene alateeka manda pe!”

Loma 15:19

mu maka ya vinjelengwe ni vizungusyo, nga nu mu maka yakwe Mupasi Wamuzilo. Acino mukupita ulendo kufuma ku Yelusalemu kufika ku Ililikumu, nasalanganya Ilandwe Lisuma lya pali Yesu Klistu.

Yelemiya 31:12

Yaliza apa Mwamba wa Zioni, nu kulaizya ni nsansa, yalutukila ku visuma vyakwe Yawe, ivili wa ngano, waini, amafuta, imfwele ni ng'ombe. Umwenzo wao ulakola icalo cikontelelwe, yataluvwa ulanda.

Ezaya 61:11

Pano ndi wakwe vikwene vino umusili ukamezya imbezu nu kukuzya ivyativimela, ali vino na Yawe kwene akapususya antu yakwe cakuti na antu amitundu yonsi iyamulumbanya.

Ezaya 53:1

Antu nayo ali pakwasuka yati, “Wino angazumila ivintu vii vino tukulanda aweni? Nga wino angiluka ukuti Yawe ali wino akucita cii, aweni?

Lwimbo lwakwe Solomoni 8:13

We mukundwe wane, wemuno wikala mu calo, sileka nuvwe izwi lyako. Anji nayo yakulonda ukuvwa amazwi yako.

Lwimbo lwakwe Solomoni 4:16

Katuka we muza waku katutu, ndanga nawe we muza waku kayeya. Pungini pa calo cane pakuti umununko usuma uli mwenemo ulimbe monsimonsi, pakuti umukundwe wane aize aingile mu calo cakwe, alye iviseekwa visuma cuze ivyayamo.

Lwimbo lwakwe Solomoni 4:12

We kaci wane, nawinga wane, uli wa calo cipindilwe, uli wa calo cino yapindilila icimpinda, uli wa kafukoka kano yacingilila.

Luka 17:6

Mwene nawe ayanena ati, “Ndi mukweti utailo ukulu wa lumbezu lwakwe musunta, munganena umusamvu uu, muti, ‘Itukule wemwisikulu kumwi ni misisi, ukaileme muli yemba,’ nao ungamuyela.”

Mako 4:30

Yesu ayauzya ati, “Uzye Wene wakwe Leza tumaukolanya na cani? Uzye mulumbe ci uno tumaomvya pa kuulondolola?