Filipi 2:1 - Amazwi Yakwe Leza 2013

¹ Caleka ndi Klistu akumukomelezya, ndi nu kutemwa kwakwe kukamutekezya myenzo, ndi muli nu utandano wa Mupasi Wamuzilo, nga nu kusakamala nu kuya ni nkunkunsi na antu yauze,

Filipi 2:1 Referans Kwoze

Kolose 3:12

Mwemwe antu yakwe Leza. Wene wamutemwa nupya wamusolwile kuti muye antu yakwe. Caleka mulinzile kuya na mizu, afuke, aluse, aicefya, amutembo nupya antu akateeka myenzo.

1 Yoane 4:12

Kusi umwi uwalola Leza. Lelo ndi twatemwana ale Leza wikala munotuli, nga nu kutemwa kwakwe kwaya ukufumaluke munotuli.

2 Kolinto 13:14

Cikuku ca Mwene witu Yesu Klistu, nu kutemwa kwakwe Leza, nu utandano wakwe Mupasi Wamuzilo viye namwe mwensi.

Kolose 2:2

Nkucita cii kuti nkomelezye myenzo yao yalundana pamwi mu kutemwa, yene yalapolelelwa pa kupelwa kumanyikisya. Alino yalamanya Klistu ningo.

1 Kolinto 12:13

Mu musango uli onga kwene, swensi kwene, Ayuda nanti Akulukuwa, azya nanti antungwa, twawatiziwe na Mupasi Wamuzilo ali umwi kwene kuti tuye mwili onga. Nupya swensi twapokelela Mupasi Wamuzilo wenga kwene.

Masamu 133:1

Lolini vino cazipa navino cazanzya antu yakwe Leza, ukwikala pamwi wa cina nyina!

Galatiya 5:22

Lelo Mupasi Wamuzilo wene akatulenga kuti twatemwana, kuya nu luzango, mutende, kuteeka mwenzo, uluse, cikuku, kuya a cumi,

Galatiya 4:6

Leza watumile Mupasi wa Mwana wakwe mu myenzo itu, pakusininkizya ukuti sweswe ana yakwe, Mupasi wino akati, “Abba, Tata wane.”

Milimo 4:32

Iumba lya antu azumile lyali nu mwenzo onga ni lango lyonga. Kutali wakuti ati vintu vii ivyakwane nenga sile, lelo yonsi yankananga vintu vyao vyonsi.

1 Yoane 3:24

Wino wensi akayela malamulo yakwe Leza wene wikala munoli, na Leza nawe wikala muli aliwe. Nupya twamanya ukuti Mupasi Wamuzilo wino watupeela wene ali cisininkizyo cakuti Leza wikala munotuli.

Yoane 17:13

Ndakai nkwiza kunuli. Vintu vii nkuvwanga mu nsi, kuti luzango luno nkweti luzuziwe mu myenzo yao.

1 Yoane 4:16

Naswe sweisikulu twamanya nu kutaila ndi vino Leza watutemwa. Leza ukutemwa, na wino akaikala mu kutemwa akaikala muli Leza na Leza akaikala munoli.

Filipi 3:3

Swemo tusi wakwe alio, pano twasilamulwa mucumi, tukapepa Leza kupitila mu maka yakwe Mupasi Wamuzilo nga nu kuitumika muli Klistu Yesu. Swemo tusyataila vino yakacita ku mili.

1 Kolinto 3:16

Cumi mwemo mwamanya vino mwemwe Ng'anda ikulu yakwe Leza nga na vino Mupasi Wamuzilo akaikala munomuli.

Loma 8:26

Mu musango uli onga kwene Mupasi Wamuzilo nawe akatwazwa, swe muno tuli atonte. Pano tutamanyile vino tulinzile kupepa. Lelo Mupasi Wamuzilo umwisikulu akatupapatila kuli Leza mu musango uno utangalondololwa.

Loma 5:5

Nu upaalilo uu usyatulenga insonyi pano Leza wapongolwela kutemwa kwakwe mu myenzo itu muli Mupasi Wamuzilo, ali wila witu kufuma kuli Leza.

Milimo 2:46

Uwanda nu wanda yakongananga ku kupepa mu Ng'anda ikulu yakwe Leza. Yalyanga apali pamwi mu mang'anda yao, ukulya cakulya ni myenzo ya luzango ifuke,

1 Petulo 1:2

Mwemo Leza Tata wamusolwile kuti muye antu yakwe, nga nu Mupasi wakwe wamucita kuya amuzilo kuti mwayela Yesu Klistu na kuti mwaswefiwa nu wazi wakwe. Leza aye ni cikuku kunomuli, nupya amupeele mutende uvule cuze.

Ayebulai 6:18

Lyene vintu vii viili, ulayo nu mulapo, vitangasenulwa nupya Leza pa kuviomvya atange atumpoke. Caleka swe muno twacingililwa na aliwe tukakomeleziwa cuze nu kulemasya na maka ku upaalilo uno uli nkolelo itu.

Filipi 1:8

Leza ali kambone wane ukuti nkulanda cumi. Wene amanyile vino nkalondesya kumulola. Namutemwa mwensi nu kutemwa kwakwe Klistu Yesu.

Efeso 4:4

Kwaya mwili onga nu Mupasi onga ndi vino kwaya upaalilo onga uno Leza wamwamileko.

2 Kolinto 2:14

Tutaizye Leza pano muli Klistu akatutungulula nsita zyonsi uku ucimvyo. Leza akatuomvya kuti kumanya kwakwe Klistu kusalangane konsi wa mununko usuma.

1 Kolinto 15:31

Inane cila wanda nemo nkalolenkana ni mfwa. Kuitakizya kuno nkweti munomuli pamulandu wakwe vino Klistu wacita ukwalenga kuti ndande vii.

Yoane 14:27

“Namusila mutende, mutende wane auno namupeela. Ntamupile mutende ndi vino amu nsi yakapela. Mutaleka myenzo inu yaaziwa, nanti kuvwa intete.

Yoane 14:18

“Ntalamusya mwenga wa ana asyale, lelo ndawela kunomuli.

Luka 2:25

Ku Yelusalemu kwali umuntu wi zina lyakwe Simeoni. Wiyo wali umololoke nupya wayelanga Leza. Wene walolelanga insita ino Leza angatuula aina Izlaeli, nu Mupasi Wamuzilo wali panoli.

Ezaya 16:11

Nemo umwenzo wane pasi pakuwaya, pamulandu wa mpanga ya Moabu, nemo nkulilila umusumba wa Kili Haleseti.