2 Timoti 2:21 - Amazwi Yakwe Leza 2013

²¹ Muntu umwi ndi waisangulula ku vintu viipe vyonsi, wene alaomviwa mu mulimo ucindame, pano wene waipelesya kuya uwa mulimo ukulu ku musambazi wakwe. Wene waiteyanya kucita visuma vyonsi.

2 Timoti 2:21 Referans Kwoze

2 Timoti 3:17

Cii cikacitika pakuti umuntu wino akatumikila Leza angalingana nupya angaiteyanya kucita misango yonsi ya vicitwa visuma.

Efeso 2:10

Leza watucita ndi vino tuli muli Klistu Yesu kuti twaikala ndi vino lyonsi akalonda, nu kuti twacita vintu visuma vino watuteyanyizizya.

2 Kolinto 7:1

Mwe yacuza, Leza uwacita malayo yaa. Acino tulinzile kufumako ku vintu vyonsi vino vikakowezya mili nga ni mipasi itu. Acino pa koopa Leza twaezya kuya amuzilo.

1 Petulo 1:22

Pano mwasangulula myenzo inu pa kuyela cumi. Ndakai mungatemwana wa ina ataila. Lelo mulinzile kutwalilila kutemwana nu mwenzo onsi.

Masamu 119:9

Uzye kwene umulumendo angaya uli uwakaele umu mipitile yakwe? Yangacita cico umukuyela amazwi yako.

1 Yoane 3:3

Muntu ali wensi wino uwakwata upaalilo uu muli Klistu, ala wene akaikala mu muzilo ndi vino Klistu wikala.

2 Timoti 2:20

Mu ng'anda ikulu mwaya iviya vya misango ipusanepusane. Vimwi vyapangilwa na siluva nga na vimwi na zaabu, vyuze navyo vyapangilwa ni mbao nga ni ivu. Vimwi vikaomviwa pa mulimo ucindame, nga vimwi navyo pa mulimo uwasilesile.

Ezaya 52:11

Pitangini, pitangini, fumini mu Babiloni! Mutezya muleme vyamankowezya mwe muno mukusenda iviya vyamuzilo vyakwe Yawe fumini mwenemo muisangulule.

Tito 3:8

Muvwango uu uwa cumi. Nkulonda kuti walanda nu kukonkomezya vintu vii, pakuti yao ataila Leza yasakamale insita zyao mu kucita vintu visuma, ivyakwazwa umuntu wensi.

Milimo 9:15

Mwene anena Ananiya ati, “Pitanga, pano nati musola kuya muomvi wane, kuti aleke imanyike ku Akulukuwa nu ku ene nga nu ku ina Izlaeli.

Yelemiya 15:19

Caleka Yawe avwanga ati, “Ndi cakuti waweluluka kunondi, ndakuwezya ku mulimo wakuntumikila. Ndi cakuti walanda vyampomvu, ivisi vyasilesile, lyene ulaya wa mulomo wane. Antu yaa yalaweluluka kunuli, lelo wemo citalinzile ukuya kunoyali.

1 Petulo 1:7

Mulimo wa kweziwa ukusininkizya cumi ca utailo winu. Wakwe vino zaabu, wino akaononeka, yakamwezya pa kumoca mu moto kuti yalole ndi umukome, avino nu utailo winu uno waluta pali zaabu ndi waposya mukweziwa, lyene mulatasiwa nu kupelwa lulumbi nu mucinzi pa wanda uno Yesu Klistu alasokololwa.

1 Kolinto 5:7

Mulinzile kufumya citutumusi ca mpiti ci iifyo, pakuti muye aswepe muli vyonsi. Lyene mulakolana wa munya wa ngano upya uwaulamo citutumusi nanti cimwi ndi vino mu cumi manyile avino muli. Pano Cimulo citu ca Ucilo cati citeyanyiziwa, nga Klistu, Mwana wa mfwele uwa ucilo watapelwa impolelwa.

Malaki 3:3

Wene aliza ku kupingula wa muntu akaswefya zaabu. Wene alasangulula nu kuswefya aina Levi ndi vino umuntu akaswefya zaabu na siluva. Alino lyene yalaleta amawila asuma kuli Yawe.

Tito 3:14

Antu itu yalinzile kusambilila kuomvya insita zyao mu kucita visuma. Yene yalinzile kucitila antu visuma yano alingine kwazwiwa. Lyene antu itu yatalikala mwa ukasu.

Tito 3:1

Nena antu yako ukuti lyonsi yaiusya kutontela yakateeka na yao ali pa utunguluzi, kuyela nga nu kuiteyanya kucita visuma mu musango onsi.

Ezaya 1:25

Ndamupezya nemo. Ndamwengulula wakwe vino yakaengulula yamunyela umwi lungu nu kufumya ivikwi vyonsi pyu.

2 Kolinto 9:8

Nupya Leza akweti maka akumupeela kuluta pali vino mukulonda, kuti lyonsi kwene mukwate kulingana na vino mukulonda nga nu kuluta pali vivyo pakuti mwaomba mulimo uwa kwazwa yauze.

1 Timoti 6:11

Lelo wemo, we muntu wakwe Leza, utakumako ku vintu vii vyonsi viipe. Uwaezya namaka kucita vyaololoke, ukuya wamuzilo, uwa utailo, kutemwa, kuposya, nga nu kufuka.

2 Timoti 2:16

Fumako kukulazyanya kukowele nupya ukwa uwelewele kuno kukafumya antu kuli Leza.

2 Timoti 4:11

Suka sile Luka uwasyala nani. Toola Mako mwize nawe kuno, pano wene angangazwilizya mu mulimo.