2 Timoti 2:12 - Amazwi Yakwe Leza 2013

¹² Ndi twatwalilila kuposya, ale lyene tulateeka pamwi nawe. Ndi twamukana, ale nawe kwene alatukana.

2 Timoti 2:12 Referans Kwoze

Loma 8:17

Lyene pano twaya ana yakwe Leza tulapokelela upolelelo uno walaya antu yakwe nu kwiza pokelela pamwi na Klistu vino Leza wamuteyanyizizya. Pano ndi twakuma ku kucula pamwi na Klistu ale tulakumako nu kululumbi lwakwe kwene.

Mateo 10:33

Lelo wensi alankana pa manso ya antu, nani ndamukana pa manso yakwe Tata uwa mwiyulu ukuti ntamumanyile.

Umbwilo 20:4

Nupya ndola vilimba vya wene na yao atenzipo yapilwe maka akupingula. Alino ndola mipasi yakwe yao akomilwe pamulandu wa kukosola cumi cino Yesu wasokolwile nga na mazwi yakwe Leza. Yene yatapefile cilyanyi nanti unkolanya wakweco, nanti ukwikilwa cimanyililo caciko pa mausyu nanti pa makasa yao. Yene yaya nu umi nu kuteeka pamwi na Klistu kulingana ni myaka izimbi lyonga.

Umbwilo 20:6

Alongo nupya apolelelwe cuze ayao alakumako ku kuzyukuka kuu kwa nkolelo. Imfwa yakwe ciili italaya na maka pano yali. Yene yalaya yasimapepo yakwe Leza na yakwe Yesu Klistu, nupya yalateeka pamwi na Klistu kulingana ni myaka izimbi lyonga.

Luka 12:9

Lelo wino wensi uwankana pa manso ya antu, nu Mwana wa Muntu kwene alamukana pa manso ya angeli yakwe Leza ukuti atamumanyile.

Umbwilo 5:10

Wemo wayacita kuya yakateeka na yasimapepo akatumikila Leza witu, yene yalateeka pano nsi.”

Luka 9:26

Muntu ndi wankana pamwi na mazwi yane, Mwana wa Muntu nawe alamukana lino aliiza mu lulumbi lwakwe, nu mu lulumbi lwakwe Isi nga nu lwa angeli yamuzilo.

Umbwilo 2:13

Namanya kuno ukaikala akuno Ciwa wika cilimba cakwe ca wene. Mwemo mwaya akutailwa kunondi, nupya mutatala mwata kutaila nu mu nsita kwene ino Antipa kambone wane uwakutailwa wakomilwe kumwinu kuko kuno Ciwa akaikala.

Umbwilo 1:9

Nene Yoane mwina winu, nupya mulondezi wakwe Yesu. Nkakuma pamwi namwe mu wene wakwe Leza nu kuposya mu macuzi. Nemo nasumvilwe pa cilila ca Patimosi pamulandu wa kukosola mazwi yakwe Leza nga ni cumi cino Yesu waumbwile.

Yuda 1:4

Pano antu yamwi yakaifya, yasokelela munotuli ukwaula kumanyika. Nupya yakasenula ilandwe lya pa cikuku cakwe Leza witu pakuti yaipele insambu pa miyele yao ya winyi. Yene yakana Yesu Klistu, Musambazi nupya Mwene witu wenga sile. Antu yaa yalavunukwa ndi vino calembwa mpiti mu malembelo.

Filipi 1:28

Mutoopa anisi inu lelo mwaposya lino mwalolenkana nao. Kuposya kwinu kulayalanga ukuti yene yalononwa, nga nu kumulanga ukuti mwemo mulatuulwa. Leza alalenga vii vyonsi vicitike,

Mako 8:38

Muntu ndi waya ni nsonyi pali nene na pa mazwi yane mu mukulo uu uwa uzelele nu wankota, Mwana wa Muntu alaya ni nsonyi panoli lino aliza pali pamwi na angeli yamuzilo, mu lulumbi lwakwe Isi.”

Mateo 26:35

Alino Petulo avwanga ati, “Nemo nanti cingaya cakuti imfwe pamwi nawe, ntangankukane inti ntakumanyile.” Na alondezi yonsi yavwanga cili conga.

Umbwilo 3:8

Namanya milimo yako. Nakuyulila mulyango nupya kusi angauyala. Namanya vino maka yako yatavula, lelo ukayela mazwi yane nupya utankana.

Mapinda 30:9

ukoopa ukuti ndi nikutisya, limwi ningakutalamila, nu kuvwanga inti, ‘Uzye Yawe aweni?’ Nupya ukoopa ukuti ndi ningaya umupina, ningatandika ukwiya icakuti nifye ni zina lyako, we Leza wane.

Milimo 14:22

Yakomelezya yano ataile nu kuyakonkomezya kuti yatwalilile kuya acumi mu utailo. Yayasambilizya yati, “Pakuti tukingile mu Wene wa mwiyulu, tulinzile kupita mu ntazi zingi.”

Mako 10:33

Ayanena ati, “Uvwini, tukuya ku Yelusalemu kuno Mwana wa Muntu alakoopelwa kuli yasimapepo akalamba na kuli yakasambilizya ya Masunde, nu kumuvunuka kuti afwe. Alakoopelwa ku Akulukuwa.

Mateo 26:75

Lyene Petulo aiusya vino Yesu wamunenyile ati, “Lino mukolwe atacili alamule, wemo umankana maila yatatu ale ukuvwanga vino utamanyile.” Alino Petulo afumila panzi nga alila minsozi nu ulanda ukulu cuze.

Umbwilo 1:6

nupya watucita kuya yakateeka na yasimapepo mu kutumikila Leza Isi wakwe. Lulumbi na maka vipelwe kuli Yesu Klistu manda pe! Ameni.

Luka 22:29

Namupeela Uwene wakwe vino Tata wampile Uwene.

Luka 22:30

Mulalya nu kumwa pa cipango cane mu Wene wane, nga nu kwikala pa vilimba vya wene nu kupingula imitundu ikumi na iili ya ina Izlaeli.

Loma 5:17

Mu cumi kwifya kwa muntu wenga ukwalenga kuti maka ya mfwa yatandike kuteeka antu onsi. Lelo cino Yesu Klistu wacita cilusile pali cii. Antu yonsi akapokelela cikuku cikulu cuze cakwe Leza, nu kucitwa ukuya aololoke pa manso yakwe Leza yalaya nu umi nu kuteeka wa ene pamulandu wa muntu wenga Yesu Klistu.

1 Timoti 5:8

Lelo ndi cakuti umwi asyasakamala akazi kakwe, maka maka amu ng'anda yakwe, ala wene wakana utailo nupya umwipisye kuluta wiyo atataila.

Umbwilo 3:10

Pano wayela sunde lyane nu kuposya. Caleka ndakusunga ningo mu nsita yakweziwa lino iliza pa nsi yonsi, kuti yonsi aikalapo yeziwe.

Umbwilo 3:21

Yao alacimvya ndayapeela insambu ya kwikala nani pa cilimba cane ca wene, ndi vino nani nacimvizye nu kwikala pamwi na Tata pa cilimba cakwe ca wene.