1 Samueli 4:9 - Amazwi Yakwe Leza 2013

⁹ Si mungala musipe, muposye iconsi. Pano ndi cisi vivyo Ayebulai yaa yamamutekanga uzya wakwe vino mwemo mwayateesile. Fwandi posyini iconsi, nu kulwa!”

1 Samueli 4:9 Referans Kwoze

1 Kolinto 16:13

Pempulini nu kukomeleka mu utailo, posyini, muye na maka.

Yakapingula 13:1

Nupya kwene aina Izlaeli iyiifya pa manso yakwe Yawe. Caleka Yawe ayapeela mu makasa ya ina Filisti pa myaka amakumi yani.

2 Samueli 10:12

Wemo ule ukome sile nu kuposya! Leka tulwisizye antu itu na maka, tulwisizye ni misumba yakwe Leza witu. Ukulonda kwakwe Yawe kule kucitike!”

Ezaya 33:1

Kalanda kunuli we mononyi wemuno utatala wononwa, kasampa wa vyuma wemuno utatala usampwe. Lino ulamala ukonona, yalakonona. Na lino ulamala ukusampa ivyuma, nawe yalakusampa.

Yakapingula 10:7

Acino Yawe pali pakusokela aina Izlaeli, nga aleka kuti aina Filisti na ina Amoni yayacimvye.

Ezaya 14:2

Imitundu iingi ilayazwilizya umu kuyakusizya umu mpanga yao, ino Yawe wayapile. Amu mutundu wakwe Izlaeli alio yalateeka ainamasi wa azya. Yayo atazile yalema aina Izlaeli wa azya, alio yano lyene aina Izlaeli yalayateeka wa azya.

1 Samueli 4:8

Kalanda kunotuli! Uzye aweni amatutuula ku maka yakwe leza wi uwa maka? Wikwene ali leza wino wakomile aina Eguputo ku vilumbelo ivipusanepusane umu lwanga.

1 Samueli 14:21

Ayebulai yaya yano walanga yaya ku kwikala pakasi ka ina Filisti, nupya yali nayo umu nkambi yao, iyasenukila ku ina Izlaeli yano yali na Saulo na Yonatani.