1 Samueli 2:25 - Amazwi Yakwe Leza 2013

²⁵ Ndi umuntu umwi wifya ku muntu muze, Leza angamuvwangila. Lelo ndu muntu wifya kuli Yawe, uzye aweni angamupapatila?” Lelo ana yakwe yatatezizye ukukalipa kwakwe isi wao, pano cali ukulonda kwakwe Yawe kuti ayaponyezye imfwa yafwe.

1 Samueli 2:25 Referans Kwoze

Ayebulai 10:26

Pano ndi tukwifya ku mufulo nalino cumi cati cimanyikwa kunotuli lyene kutangaya impolelwa yakufumya maifyo itu.

1 Samueli 3:14

Caleka, nemo nalafile ku ang'anda yakwe Eli ukuti kutalatala kuye impolelwa nanti uwila uno ungafuta umulandu wao.”

Yoswa 11:20

Cali ipange lyakwe Yawe kuti antu yalya yakomye imyenzo yao yacite ulwi na ina Izlaeli, pakuti wene ayalovye yonsi pyu ukwaula uluse, wakwe vino Yawe wapeezile ilamulo kuli Mose.

Mpendwa 15:30

Lelo wino wensi uwala waluvyanya ku mufulo, ciye mukaya nanti umwenyi, wene ale wasuula Yawe. Umuntu wiyo alinzile kusukulwa mu antu yakwe.

Mapinda 15:10

Umuntu wino wapumbuka umu nzila isuma alavunukwa wakwe cimwi. Wiyo uwapata ukulungikwa alafwa.

1 Timoti 2:5

Pano kwaya Leza wenga sile, nga kwaya nu wakukundanya wenga sile pakasi kakwe Leza na antu. Muntu wiyo a Klistu Yesu.

Ayebulai 7:25

Acino na ndakai kwene wene akweti maka akutuula yao akaiza kuli Leza kupitila munoli. Pano wene uwa umi manda pe pa kuyapapatilako kuli Leza.

Masamu 51:4

Nemo naifya kunuli awewe sile wenga, awewe naifya, nu kucita ivintu iviipe kuli wewe. Icacumi walungika wakwe cimwi apakunkalipila, walungika apa kumpingula nu kumpela umulandu. Usifyenga umuntu mu upinguzi wako.

2 Milandu 25:16

Lelo lino acili akulanda, umwene amunena ati, “Uzye wewe twasonta kuti uye mpandamano wa mwene? Si tuzya sile! Ndi watwalilila namapeela ilamulo kuti ukomwe!” Acino kasema wilya ata ukulanda. Lelo avwanga sile amazwi yaa ati, “Manyile ukuti Leza wapanga ukukonona, pamulandu wakuti wacita icintu cii nu kukana ukutezya ku mazwi yane aku kupanzya amano.”

Malango 1:17

Mutaya na kasoozi lino mukupingula. Mwapingula cila muntu kwaula kunyomela mbali, cisi cimwi vino umuntu wiyo ali. Mutaoopa umuntu nanti umwi, pano upinguzi uno mumacita ukafuma kuli Leza. Ndi umulandu umwi wakomesya cuze kunomuli, muulete kunondi nga nani ndapingula.’

Masamu 51:16

Ndi cakuti nakutula impolelwa, usipokelela, nanti sile impolelwa yakoca, nayo kwene isikuzanzya foo.

Malango 2:30

“Lelo Siooni umwene waku Hesyiboni atatuzumilizye ukupita ukusalala mu mpanga yakwe. Yawe Leza winu walenzile umwenzo wakwe uumalale nu kutalama pakuti amupeele mu makasa itu kuti tumucimvye nu kupoka impanga yakwe, ino napilelo tucili tukwikala mwenemo.

Ayebulai 10:27

Icingasyala kweneko ukulolela nu koopa upinguzi uno ukwiza nga nu moto uwipisye uno ulonona antu, yano akana Leza.

Yobo 9:33

Kutange kuloleke umuntu uwakututaasya, wino akweti amaka pali nene na Leza.

Mapinda 29:1

Umuntu uumalala umwenzo nanti yangezya uku mukalipila, ilovyo lilamupumikizya, nupya atalapusuka.

Utandiko 38:7

Misango yakwe Ele, umwana iyeli wakwe Yuda, itazanzizye Mwene. Caleka Yawe amukoma.

Utandiko 38:10

Vii vino wacitanga vitazanzizye Mwene. Caleka Yawe amukoma nawe kwene.

1 Yamwene 8:31

“Ndi cakuti umuntu umwi yamupeela umulandu uwa kwifya ku muze, alino yamuleta ku kavuwa kako aka mu Ng'anda ino ikulu, apakuti azenzuke asyale uwakaele,

1 Yamwene 8:32

we Yawe kuko kuno waya kwiyulu, uwauvwa nupya uwapingula aomvi yako. Umuntu mwipe wene uwamupezya ku anisi yakwe, lelo uwakaele wene uwamutungulula.

2 Milandu 10:15

Icalenzile ukuti umwene Leoboamu akane ukuvwa vino antu yalondanga apamulandu uno Yawe Leza walondanga ukufikilizyanga ivyasesime Aiya umwina Syilo pali Yeloboamu umwana umonsi wakwe Nebati.

Mapinda 13:1

Umwana wa mano akasumbako amano lino isi akumulungika, lelo uwacilumba wene asiuvwila lino yakumusunda.

Kasambilizya 3:3

kwaya insita ya kukoma ni nsita ya kupozya, kwaya insita ya komoola ni nsita ya kukuula.