1 Kolinto 7:19 - Amazwi Yakwe Leza 2013

¹⁹ Pano muntu ndi wasilamulwa nanti foo, cisyakusenula nanti cimwi. Cikalamba ukuyela masunde yakwe Leza.

1 Kolinto 7:19 Referans Kwoze

Galatiya 6:15

Cisi cimwi ndu muntu angasilamulwa nanti foo. Cikalamba ukuya nu umi upya.

Galatiya 5:6

Pano lino twaya yakwe Klistu Yesu, lyene kusilamulwa nanti kuntasilamulwa kusyalanga kupusana kumwi. Lelo cintu cino mulinzile kusakamala utailo winu ungamulenga kutemwana.

Umbwilo 22:14

Alongo ayao yano yakafula mingila yao nu kuiswefya, pakuti yaye ni nsambu ya kulya vizao kufuma ku muti uno ukapeela umi nga nu kwingila pa mpongolo zya musumba ukulu.

Kolose 3:11

Kusi upusano pa Akulukuwa nanti Ayuda, musilamulwe nanti asi musilamulwe, mututu, nkakasi, azya nanti antungwa. Lelo Klistu ali vyonsi, wene akaikala muli vyonsi.

Galatiya 3:28

Caleka pasi upusano pakasi ka Ayuda na Akulukuwa, azya na antungwa, aonsi na anaci. Mwensi mwaya wenga pa kutaila kwinu muli Klistu Yesu.

1 Kolinto 8:8

Lelo vyakulya vitangatupalamika pipi na Leza. Tutalaponzya cimwi ndi tusyalya, nanti kukwata cimwi ndi tukulya.

Loma 3:30

Leza a wenga, nupya alacita Ayuda kuya aololoke pa manso yakwe kupitila mu utailo wao. Na Akulukuwa nao kwene alayacita kuya aololoke pa manso yakwe kupitila mu utailo wao.

Yoane 15:14

Mwemwe yacuza yane ndi mukucita vintu vino namunena.

Mateo 5:19

Caleka wino wensi asyayela isunde lyonga linono ilya mu masunde yaa, nu kusambilizya antu kucita vikwene, wene yalamucefya mu Wene wa mwiyulu. Lelo wino wensi akayela masunde yaa nu kusambilizya antu, wene yalamukuzya mu Wene wa mwiyulu.

1 Samueli 15:22

Lelo Samueli aasuka ati, “Uzye Yawe akazangila mu mawila yakoca ni mpolelwa ukuluta ukuyela amazwi yakwe? Ala icuvwilo caluta ukupeela impolelwa, nu kutezya nako kwaluta amafuta yakwe yasuuku.

Yoswa 5:5

Antu yonsi afumile mwenemo yasilamwilwe, lelo antu yonsi avyalilwe mu lwanga mu nsita iya lwendo ukufuma mu Eguputo walanga yatali yasilamulwe.