ZAKHARIA 4:6 - KITTA' MATANGKASA'

⁶ Nasuroa' anjo malaekaka ampabattui mae ri Zerubabel anne pasanNa Batara angkanaya, “Teai lanri kagassingang tantara siagang teai todong lanri kagassingang kalennu nulappa'jari pattujuang, pasangalinna lanri RohKu.

ZAKHARIA 4:6 Referans Kwoze

PAMMUJI 33:16

Teai lanri jaina tantarana nammeta karaenga, tena nasalama' surudadua lanri kagassinganna.

HOSEA 1:7

Mingka bansa Yehuda laKukamaseangi. INakke, Batara, Allata'alana ke'nanga lampasalamaki ke'nanga; mingka teai lanri pa'bundukang, teai todong lanri pa'dang yareka pana yareka jarang siagang pabaena.”

2 PATTOTTORANG 14:11

Nampa appala' doang Asa ri Karaeng Allata'alana, nakana, “O Batara, iKatteji bawang akkulle ambantui tau lammaya andallekangi tau kassaka. Kitulung laloi ikambe kamma-kamma anne, o Karaeng Allata'alana ikambe! Ri Katteji bawang tanjeng ikambe, siagang lanri arenTa bawang nassulu' anne ikambe untu' angngewai anne pasukang sannaka lompona. O Batara, iKatteji bawang Allata'alana ikambe. TeaKi' pa'biangngi KalenTa nibeta ri se'reang rupatau.”

YESAYA 32:15

Mingka sikalipi pole labattu Allata'ala siagang koasaNa. Na sikamma parang luaraka la'jari koko-koko coppong, sikamma kokoa la'jari sangkamma romang jaina.

YESAYA 30:1

Nakana Batara, “Cilakai sikamma pamimpinna tu Yehuda, lanri angngewana ke'nanga ri Nakke. Rancanana ke'nanga naturuki, teai rancanaKu. Annekengi parjanjiang ke'nanga, tenaya nasicoco' siagang erokKu. Jari attambung-tambummi dosana ke'nanga.

PAMMILANGNGANG 27:16

nakana, “O, Karaeng Allata'ala, assarea' katallassang mae ri sikontu apa attallasaka, kupalaki, Ki'jo'joki sitau akkullea ampimpingi anne bansaya;

EZRA 5:2

Nalangngere'na pappasanna anjo ruaya na'bi, appakkaramulami linta' Zerubabel ana'na Sealtiel, siagang Yesua ana'na Yozadak, ambangungi ammotere' Balla'Na Batara ri Yerusalem, nampa nibantui ri anjo ruaya na'bi.

1 PETRUS 1:12

Napaumi Allata'ala mae ri anjo na'bi-na'bia angkanaya anjo apa nagaukanga ke'nanga teai untu' kaparalluang kalenna ke'nanga, passangalinna untu' kaparalluannu; iamintu apa-apa singarakamo nulangngere'na kamma-kamma anne battu ri sikamma tau ambirittakangai anjo Kabara' Baji' ri passala'na Isa Almasi. Napabattumi ke'nanga anjo kabaraka mae ri kau ngaseng lalang koasaNa RohNa Allata'ala, nikiringa battu ri suruga. Ba'lalo manna sikamma malaekaka ero' tongi angngassengi anjo kabara' nabirittakanga ke'nanga.

EFESUS 6:17

Allei anjo kasalamakkanga a'jari sanrapang topi baja; siagang kana-kananNa Allata'ala sanrapang pa'dang RohNa Allata'ala.

PA'JARIANG 41:16

Appialimi Yusuf angkana, “Teai anne atanta karaeng, mingka Allata'ala lampakasingara' bajiki.”

1 SAMUEL 14:6

Nakanamo Yonatan ri anjo turungkaya, “Umba kimange ri balla' jagana anjo tu Filistin kapereka. Gassingka ero'ji Batara antulungki'. Nasaba' akkullei Nasare Batara pammetang taua, baji' napunna jai tau kammayatompa lalang sike'de'na tau.”

1 SAMUEL 17:47

Siagang sikontu tau niaka anrinni lanaciniki angkanaya tena Naparallu Batara ri pa'dang yareka poke untu' ampasalamaki umma'Na. Iami ampattantui jappana anne pa'bundukanga, siagang Iami lampassareang ngasengko mae ri limanna ikambe.”

1 KARAENG-KARAENG 19:12

Le'baki anjo sannang sikalimi siagang sinomi. Nampa nia'mo kalangngerang sa'ra ca'di siagang halusu'.

EZRA 3:10

Ri wattunna appakkaramula napadongko' batu pundasina pajamaya anjo bangunang Balla'Na Batara ri Yerusalem, sikamma imanga ammakei juba siagang anna'galaki tarompe' na massing angngalle tampa'. Tu Lewi battua ri golongang Asaf ammenteng tongi anjoreng, massing anna'gala' gong-gong ca'di. Mammuji-mujimi ke'nanga ri Batara situru' paratorang le'baka nipattantu appakkaramula ri jammang Karaeng Daud.

KATO'BA 9:11

Nia' pole kucini' ri anne linoa: teai tuli kaminang gassinga lari ammeta ri pa'lumbanga, teai tuli tau kassaka ammeta ri pa'bundukanga. Tena natuli anggappa pa'boya-boyang tau cara'deka. Na tau taranga pikkiranna tena natuli anggappa kakalumanynyangang. Kammayatompa natuli masahoro' tau porea. Saba' manna inai akkulle tonji natuju dalle' siala'.

DANIEL 2:34

Ri wattunna kiciniki anjo patunga karaeng, nia'mo se're batu lompo ta'lappasa' battu ri ta'binga, natena tau anseroi, nampa natuju bangkenna anjo patunga ia bassia siagang butta pika, sa'genna ancuru'.

HAGAI 1:1

Ri taung makarua pamarentahanna Karaeng Darius ri Persia, ri tanggala' se're bulang makaannang, a'bicarai Batara tete ri Na'bi Hagai. Anjo pasanNa Batara nipatujui mae ri Zerubabel ana'na Sealtiel, guburnur Yehuda, siagang mae ri Imang Lompoa Yosua ana'na Yozadak.

HAGAI 2:21

untu' nipabattu mae ri Guburnur Zerubabel. Nakana Batara, “Tasalloami nalaKugoccang langika siagang buttaya,

ZAKHARIA 6:12

Pauangi angkanaya iNakke Batara Kaminang Koasaya angkana, ‘Tau niarenga I Cu'la', la'jari apa napattujuanga ri tampa' napammantangia siagang ia lambangungi ammotere' Balla'Na Batara.

EZRA 2:2

Ia pamimping-pamimpinna ke'nanga iamintu: Zerubabel, Yesua, Nehemia, Seraya, Reelaya, Mordekhai, Bilsan, Mispar, Bigwai, Rehum, siagang Baana. Iaminne dattara'na golongang kaluarga Israel siagang siapa jaina ke'nanga battu ri tasse're golongang, ammotereka battu ri pa'rasangang pammelakkang:

YESAYA 34:16

Boyai siagang bacami lalang Kitta'Na Batara, niaka angkana: Tena manna se're anjo sikontu apa attallasa' nipa'jari latappela' yareka latena pasanganna. Saba' kammaminjo parentaNa Batara, siagang Ia KalenNa lampa'rappungangi ke'nanga.

YESAYA 59:19

KoasaNa siagang kala'biranNa lanakamallakkangi sikontu taua battu raya sa'genna kalau'. Labattui rapang binanga sarringa lo'loro'na, nipammarrunga ri anging kancang.