ZAKHARIA 11:5 - KITTA' MATANGKASA'

⁵ Sikamma tummallina lanabunoi anjo sikamma gimbalaka natanggappaya hukkungang. Nakana ke'nanga anjo tau ambalukangai dagenna anjo sikamma gimbalaka, ‘Nipujimi Batara! Kamma-kamma anne pila' akkalumanynyangki'!’ Anjo sikamma pakalawakia tena pangngamaseanna mae ri sikamma gimbala' piarana ke'nanga.

ZAKHARIA 11:5 Referans Kwoze

YEREMIA 50:7

Nibakkai siagang nisessai ke'nanga ri sikontu naaganga sibuntulu' ke'nanga. Nakana musu-musunna ummakKu, ‘Manna apa nigaukang mae ri ke'nanga, tena nasala, nasaba' anjo taua dorakami ri Batara. Boe-boena ke'nanga tappaki ri Batara, jari mustina ke'nanga tuli majarre' tongi mae ri Batara.’

HOSEA 12:8

Nakana Batara ri bansa Israel, “Jekkong ngasengko sangkamma tu Kanaan; sikamma padanggannu nangai natipu sambalu'na ammake timbangang tenaya nannaba.

2 PETRUS 2:3

Lanri angngoana anjo guru-guru takontutojenga nalanacaritamo mae ri kau carita-carita napare'-pareka kalenna sollanna akkulle anggappa passawallang battu ri kau. Mingka sallomi nipasadia pangadelang eroka antappuki hukkunganna ke'nanga; kammayatompa sallo tommi attayang kapanrakang le'bakamo nipattantu lanagappaya ke'nanga.

YOHANES 16:2

Lanipasulukko sallang battu ri balla' sambayanga. Nalanarapiki sallang wattunna nania' tau nakana kalenna a'gau' amala' ri Allata'ala punna nabunoko.

MATIUS 23:13

Nakanamo pole Isa, “Cilaka ngaseng mako ikau guru-guru agamaya siagang tu Farisia, lanri nungaina assara-saraia. Ikau ngasemmi anrompai taua la'jari umma'Na Allata'ala. Ikau ngasenji tea a'jari umma'Na Allata'ala, nanurompai todong tau maraenga, eroka a'jari umma'Na Allata'ala. [

YEHEZKIEL 34:21

Nusorong-sorongi siagang nuulaki gimbala' garringa sa'genna niemba ke'nanga battu ri pa'rappunganna gimbalaka.

YEHEZKIEL 34:10

Nakke, Batara Kaminang Tinggia akkana ri kau angkanaya iNakke anne musunnu. Anjo sikamma gimbalakKu laKuallei ammotere' battu ri kau siagang tenamo naKupappirannuangi mae ri kau; tenamo naKukellaiko annawa-nawai kaparalluang kalennu bawang. Sikamma gimbalakKu laKupasalamaki battu ri kau, sa'genna tenamo nala'jari kanrenu.’ ”

YEHEZKIEL 34:6

Jari pitilampa-lampaimi sikamma gimbalakKu ri bulu'-bulu' tinggia siagang sikamma monconga. Tassiaraki ke'nanga mange ri sikontu buttaya, tena manna sitau amparhatikangi yareka amboyai ke'nanga.

YEREMIA 2:3

Israel, iNakke KalengKu ampatangko, Kusayanga lalang ri pa'maikKu. Kupitujui bala sikontu tau ansessayako, iNakke, Batara, anne akkana.”

NEHEMIA 5:8

Kukanamo ri ke'nanga, “Nipikulle-kulleimi nakkulle nipasulu' sikamma sari'battanta tu Yahudi ia tarpassaya ambalukangi kalenna mae ri bansa maraenga. Mingka angngapa nakamma-kamma anne ikau ngaseng ba'lalo ampassai ke'nanga ambalukangi kalenna mae ri kau ngaseng, na ikau tu Yahudi ngaseng tonjako!” Tappialiami anjo sikamma pamimpinga manna sibuku kana.

2 KARAENG-KARAENG 4:1

Ri se'reang allo nia' sitau baine janda le'ba' baine na'bi a'lampa mange ri Na'bi Elisa nampa angkana, “Bapa', matemi bura'nengku! Nakiasseng tonja angkanaya anjo le'ba' bura'nengku tau mappilangngeri todong ri Allata'ala, mingka nia' inranna mae ri se'reang tau. Kamma-kamma anne battui anjo taua ero' angngalle rua anakku nampa napa'jari ke'nanga atanna, salaku pa'bayara' ri inranna tumate le'ba' bura'nengku.”

PAPPICINI' 18:13

kuli' kayu bauka, rampa-rampaya, sitanggi, minynya' bau', siagang kamanynyang; anggoro' siagang minynya', tarigu siagang gandung; sapi siagang gimbala'; jarang siagang bendi, ata-ataya, ba'lalo nyawana pole taua.

YOHANES 10:1

“Annaba tojengi anne kanangKu: Inai-nai antama' ri baraya natena nanjoreng ri timunganna baraya antama', mingka anjorengi ri kalli' sa'rinna baraya, yareka angngambiki ri oloang maraenga, iaminjo taua pallukka' siagang paella'.

PAPPICINI' 3:17

Nukana ngaseng: Akkalumanynyangko siagang ganna' mako ri katallassannu; tenamo apa-apa kakurangannu. Mingka tanuassengai kalennu angkanaya teai sipato' kasi-asinu, siagang teai sipato' appakasi'nana katallassannu. Kasi-asiko, assolarakko, siagang butako.

HOSEA 12:9

Nakana ke'nanga, ‘Kamma-kamma anne kalumanynyang maki'. Assawala' maki'. Tena manna sitau akkulle antuduki' angkanaya lanri kajekkonganta nakiakkalumanynyang.’

AMOS 2:6

Nakana Batara, “Tu Israel a'mole-molei doraka, lanri kammana anjo ma'nassa laKuhukkungi ke'nanga. Tau lambusu' tenaya nakkulle ambayaraki inranna, nabalukangi ke'nanga a'jari ata. Kammatommi anjo panggaukanna mae ri tu kasi-asia tenaya nakkulle ambayaraki inranna, manna pole naanjo inranna anggarang sipammalli sandala'ji bawang.