YOSUA 7:25 - KITTA' MATANGKASA'

²⁵ Nampa nakanamo Yosua mae ri Akhan, “Angngapa nuppabattu kasusaang mae ri katte ngaseng? Kamma-kamma anne lappabattui Batara kasusaang mae ri kau!” Jari Akhan siagang sikamma kaluargana nisambilaimi batu ri sikontu tu Israel sa'genna mate. Sikontu barang-baranna, kammayatompa barang-barang nalukkaka nitunu ngasemmi sa'genna cappu'.

YOSUA 7:25 Referans Kwoze

YOSUA 6:18

Takkulleako angngalle apa-apa battu ri anjo sikontu apa mustia niancuru'. Punna nuallei, lanitujui pakkemaanna Israel siagang cilaka na bala.

1 PATTOTTORANG 2:7

Akhan, ana'naya Karmi, turungang battu ri Zerah, angngerangi bala mange ri umma' Israel lanri angngallena barang nirampasaka lalang bundu' ia siratannaya lanipassareang mae ri Allata'ala.

PAOLE 17:5

anjo tau salaya musti nierangi assulukang ri pantaranna kotaya nampa nisambila batu sa'genna mate.

KAIMANGNGANG 24:14

“Erangi anjo taua assulu' ri pantaranganna kemaya. Sikamma tau le'baka allangngereki attunra anjo taua, musti napadongkoki limanna ri tompo' ulunna anjo taua nampa anjari sa'bi angkanaya salai anjo taua. Nampa sikontu ummaka musti nasambilai batu anjo taua sa'genna mate.

KAIMANGNGANG 20:2

ampabattui anne passalaka mae ri bansa Israel angkanaya, “Inai-nai ri kau yareka bansa maraeng niaka ammantang tuli ri alla'nu angkoro'bangkangi ana'na mae ri Rewata Molokh, musti nisambilai batu ri tau jaia sa'genna mate.

IBRANI 12:15

Jagai sollanna tena manna sitau ambokoi kabajikang pa'mai'Na Allata'ala; sollanna tena nania' a'jari sanrapang lamung-lamung niaka racunna ri tangnga-tangnganu sa'genna appa'nia' kasukkarang siagang jai tau napanraki siagang racunna.

2 TESALONIKA 1:6

LaNagaukangi Allata'ala apa adeleka. LaNabalasaki passessa sikamma tau le'baka ampa'jari sessako.

GALATIA 5:12

Bajikangangi punna assulu' memang battu ri jama'aka anjo tau angkacoai pikkirannu!

YOSUA 7:15

Nampa anjo tau nijo'joka siagang a'nyatami angkanaya ammoliki barang-barang anjo nipappisangkanga, musti nitunui sa'genna cappu' siagang sikamma kaluargana kammayatompa sikontu barang-barang napatanga; nasaba' iami anjo taua andakkai parjanjianga siagang le'baka anggaukangi kaja'dallang lompoa ri tangnga-tangngana umma' Israel.”

PAOLE 21:21

Nampa tu bura'ne niaka ri anjo kotaya musti nasambilai anjo anaka siagang batu sa'genna mate. Kammaminjo caranu ampaccappuki kaja'dallang kammaya anjo. Sikamma tu Israelka lanalangngereki kabara'na anjo kajarianga siagang a'jari malla'mi.”

KAIMANGNGANG 21:9

Punna nia' ana' baine imang a'jari baine pagau' sala, nahinai manggena siagang musti nitunui sa'genna mate.

KAIMANGNGANG 20:14

Punna nia' tu bura'ne a'bunting siagang sitau baine nampa nabuntingi todong amma'na anjo bainea, anjo tau tallua musti nitunui sa'genna mate, lanri ampanggaukang tena nasilolongang ke'nanga. Anjo panggaukang kammaya takkulleai kajariang ri tangnga-tangnganu.

PA'JARIANG 38:24

Kira-kira tallum bulang ribokoanganna anggappami kabara' Yehuda angkanaya anjo mintunna, iamintu Tamar, a'jari baine ja'dalaki siagang attianammi. Jari naparentakammi Yehuda angkana, “Allei anjo bainea nampa nitunu sa'genna mate!”

PA'JARIANG 34:30

Nakanamo Yakub ri Simeon siagang Lewi, “Nususai ngasemma' antu. Kamma-kamma anne inakke nakabirisima' tu Kanaan, tu Feris kammayatompa sikontu tau niaka anrinni ri pa'rasanganga. Ikatte taunta tena najai. Punna asse're ngaseng anjo taua angngewa' siagang ambundukia', sikontu bija pammanakanta akkulle ngasengi naancuru'.”

1 SAMUEL 14:29

Appialimi Yonatan angkana, “Teai sipato' ta'liwa'-liwa'na anjo panggaukanna manggeku mae ri bansata! Ciniki, kamma-kamma anne bella baji'na pakkasiakku ri le'bakkumo angnganre sike'de' bani.

PAOLE 13:11

Jari sikontu bansa Israel lanalangngere'mi anjo kabara' pammunoanga siagang a'jari malla'mi, sa'genna manna sitau tenamo barani lappanggaukang kammaya anjo ja'dala'na.

PANGNGEBARANG 1:19

Kamma memangi, angkanaya tau ammakea katerassang a'boya dalle', nyawana tonji ke'nanga lanapabayara'.

PANGNGEBARANG 15:27

Inai a'boya passawallang tenaya nahallala', napanraki kaluarga kalenna. Inai angkabirisi doe' pammuccuka, lamate'nei.