YOSUA 11:20 - KITTA' MATANGKASA'

²⁰ Nipa'jari terasaki pa'mai'na ke'nanga ri Batara untu' a'bundu' siagang tu Israel, sollanna niancuru' ke'nanga, siagang nibuno tanikamaseang situru' parentaNa Batara mae ri Musa.

YOSUA 11:20 Referans Kwoze

ROMA 9:18

Jari, iaji namangngamaseang Allata'ala mae ri se'rea tau punna Nakaerokangi kammaya. Kammayatompa a'jari kapala batui se'rea tau punna Nakaerokangi Allata'ala kammaya.

KALAPPASSANG 4:21

Nakana Batara ri Musa, “Le'ba' mako Kusare koasa untu' anggaukangi gau'-gau' malompoa. Jari punna ammotere' mako sallang ri Mesir, gaukammi anjo sikamma gau'-gau' malompoa ri dallekanna Karaeng Mesir. Mingka laKupa'jari terasaki pa'mai'na, sa'genna taeroka assarei ising untu' a'lampa anjo bansaya.

PAOLE 7:16

Sikamma bansa Napassareanga Karaeng Allata'alanu ri kakoasannu musti nuancuruki; teako kamaseangngi ke'nanga. Teako anynyombai ri rewata-rewatana ke'nanga, lanri anjo panggaukang kammaya napangngerangangko bala.

PAOLE 2:30

Mingka tena napa'biangki' Karaeng Sihon ammalo ri anjo pa'rasanganna. Nipa'jari kapala batumi ri Karaeng Allata'alanu siagang nakellai duduki' ambetai anjo Karaeng Sihon. Sa'genna kamma-kamma anne nipammantangngi iji daerana.

HAKING-HAKING 14:4

Tanaassengai tau toana Simson angkana Batara ampagioki Simson na nagaukang anjo kammaya. Nasaba', a'boyai kasampatang Batara untu' ambunduki tu Filistin. Anjo wattua, nikoasai tu Israelka ri tu Filistin.

KALAPPASSANG 14:17

LaKupa'jari kapala batui tu Mesir sa'genna naondang tulusu' tu Israel, nampa Kupappicinikang kakoasangKu mae ri Karaeng Mesir, mae ri pasukanna, sikamma karetana siagang sikamma tau niaka rate.

KALAPPASSANG 9:16

Mingka Kulappassang ngasengko attallasa', sollanna akkulle Kupappicinikang kakoasangKu mae ri kau, sa'genna a'jari masahoro' arengKu ri sikontu linoa.

2 PATTOTTORANG 25:16

Nakanamo Amazia, “Tongkoki bawanu! Punna tena kubunokontu! Tena le'bakaki' anne angngangkakko a'jari guru mae ri karaenga!” Jari a'merekimi anjo na'bia. Mingka rioloanganna anggappai kasampatang angkana, “Kamma-kamma anne kuassemmi angkanaya le'ba'mi Napattantu Allata'ala angkanaya laNaancurukki' lanri anjo panggaukanta, siagang lanri tenana kijampangi pappakaingakku.”

1 KARAENG-KARAENG 12:15

Tena najampangi pappala'na ra'yaka. Mingka anjo memang ero'Na Batara. Apa le'baka Napau Batara tete ri Na'bi Ahia battu ri Silo ri passala'na Yerobeam ana'na Nebat, musti kajariangi.

1 SAMUEL 2:25

Punna kasalang taua mae ri rupataua, akkullei nialleang ri Allata'ala. Mingka punna doraka taua mae ri Batara, inai akkulle antulungi?” Mingka tajampangiai ke'nanga anjo pappakainga'na Eli, manggena ke'nanga, nasaba' le'ba'mi Napattantu Batara untu' ambunoi ke'nanga.

KALAPPASSANG 9:12

Mingka nipa'jari terasa' iji ulunna anjo karaenga ri Batara, na sangkamma le'baka Napau Batara, taerokai anjo karaenga anjampangi kananna Musa siagang Harun.

KALAPPASSANG 10:1

Nakanamo Batara ri Musa, “A'lampako mange andallekang ri karaenga. Le'ba'mi Kupa'jari kapala batu ngaseng siagang sikamma pagawena, sollanna akkulle Kugaukang gau'-gau' malompoa ri tangnga-tangngana ke'nanga,

KALAPPASSANG 11:10

Nagaukang ngasemmi Musa siagang Harun sikamma gau' malompoa ri dallekanna karaenga, mingka nipa'jari kapala batui ri Batara, sa'genna taerokai allappassangi tu Israel ambokoi Mesir.

KALAPPASSANG 14:4

LaKupa'jari kapala batui anjo karaenga sa'genna amminawang angngondangko. Mingka laKupappicinikangi kakoasangKu mae ri anjo karaenga siagang tantarana, na lanaasseng ke'nanga angkanaya iNakkemi Batara.” Nampa nagaukammo tu Israel situru' anjo apa Naparentakanga Batara mae ri ke'nanga.

KALAPPASSANG 14:8

Memang Batara ampa'jari kapala batui anjo karaenga, sa'genna naondang tu Israel niaka sitabang a'jappa ambokoi anjo pa'rasanganga nipimpinga ri Batara.

2 SAMUEL 17:14

Nalangngere'na anjo, nakanamo Absalom siagang sikontu tu Israel, “Anjo kana pangngunju'na Husai bajikangngangi nakana pangngunju'na Ahitofel.” Memang, Batara le'ba' ampattantui laNahalangi anjo kana pangngunju' baji'na Ahitofel, sollanna nituju Absalom ri bala lompo.

2 PATTOTTORANG 22:7

Le'baki Napattantu Allata'ala angkanaya lanarapiki a'jala'na Ahazia ri wattunna a'lampa angkunjungi Yoram. Anjo ri wattu a'lampana Ahazia angkunjungi Yoram, nia'mo sitau angngewai ke'nanga, iamintu tuniarenga Yehu ana' bura'nena Nimsi, le'baka nipile ri Batara untu' angngancuruki kaluargana Karaeng Ahab.

YESAYA 14:24

Assumpai Batara Kaminang Makoasaya angkana: “Ia le'baka Kurancanakang mattantu lakajariangi.

YESAYA 34:2

Larroi Batara mae ri sikontu bansaya siagang sikontu pasukanna ke'nanga. LaNahukkungi siagang laNaancuruki ke'nanga.