YOHANES 8:42 - KITTA' MATANGKASA'

⁴² Nakanamo Isa ri ke'nanga, “Ebara' manggenu anjo Allata'ala, tantu lanukamaseangA', lanri iNakke battuA' ri Allata'ala. Teai ero' KalengKu naKubattu, passangalinna Allata'ala assuroA'.

YOHANES 8:42 Referans Kwoze

YOHANES 12:49

Nasaba' teai battu ri ero' KalengKu naKupabattu anjo bicaraya; Manggea assuroA', Iami ampassuroangi ri Nakke apa musti Kupau siagang Kupabattu.

YOHANES 14:10

Filipus! Maka tena nutappa' angkanaya iNakke asse'reA' ri Manggea, siagang anjo Manggea asse'rei siagang iNakke? Apa Kupaua ri kau teai battu ri ero' KalengKu bawang naKupau. Manggea, tuli niaka asse're siagang KalengKu, Iami anggaukang ngasengi anjo passalaka.

YOHANES 17:8

Le'ba'mi Kupabattu ri ke'nanga kana-kana Kipabattua mae ri Nakke, nanatarimamo ke'nanga. Naassemmi ke'nanga, angkanaya iNakke ma'nassa iKatte Kukabattui, siagang tappa'mi ke'nanga angkanaya iKatte assuroA' battu ri linoa.

YOHANES 17:25

Bapa' maadeleka! TanaassengaKi' anne linoa, mingka iNakke KuassengKi'. Na naasseng ngaseng anne taua angkanaya iKatte assuroA' battu ri lino.

MALEAKHI 1:6

Nakana Batara Kaminang Koasaya mae ri sikamma imanga, “Se'rea ana' napakalompoi manggena, siagang se'rea palayang napakalompoi karaenna. INakke anne Manggenu ngaseng; mingka apa saba'na natena nupakalompoA'? INakke anne pinggawanu; mingka angngapa natena numalla' mae ri Nakke. Nuhina-hinaiA', mingka akkuta'nangko angkana, ‘Antekamma batena ikambe anghinaKi?’

YOHANES 1:14

Ma'rupataumi anjo Kanaya, ammantangi ri tangnga-tangngata, na nicini'mo kala'biranNa. Natarimai anjo kala'biranga salaku Ana' sitau-tauNa Manggea. Tete ri KalenNami nanicini' Allata'ala, siagang pangngamaseanNa mae ri katte.

1 YOHANES 4:14

Kalenna ikambe le'ba' anciniki Ana'Na Allata'ala, siagang napabattumi ikambe mae ri tau maraenga angkanaya Iami anjo Ana'Na Nasuro Allata'ala antama' ri linoa untu' a'jari Karaeng Mappasalama' ri anne linoa.

YOHANES 5:43

Lalang koasaNa Allata'ala naKubattu, mingka taerokako antarimA'. Mingka punna nia' tau battu lalang areng kalenna, ero'jako antarimai.

1 KORINTUS 16:22

Inai-nai tena namangngamaseang mae ri Batara, lappassammi anggappa pangngalarroi! Maranatha – O, Batara, battu maKi' linta'!

YOHANES 3:17

Nasaba' tena naNasuroi battu Ana'Na Allata'ala untu' anghukkungi anne linoa, passangalinna untu' ampasalamaki.

YOHANES 5:23

NaNapakamma anjo Manggea sollanna nipakala'biri' anjo Anaka battu ri sikontu rupataua, sangkamma napakala'biri'na Manggea ke'nanga. Inai-nai tena napakala'biriki Anaka, tena tommo napakala'biriki Manggea, assuroai battu Anaka.

PAPPICINI' 22:1

Napicinikiang tomma' anjo malaekaka binanga assarea katallassang je'ne'na. Anjo binangaya accillaki je'ne'na sanrapang kaca a'lo'loroka battu ri empoang kala'biranNa Allata'ala siagang battu ri anjo Ana' Gimbalaka,

GALATIA 4:4

Mingka ri wattunna narapi' baji'mo wattunna, Nasuromi Ana'Na Allata'ala antama' ri anne linoa. Nilassukammi anjo ana'Na ri se'reang baine, nattallasa'mo irawangang kakoasanna hukkung agamaya.

YOHANES 8:14

Appialimi Isa Nakana, “Manna naiNakke tonji ansa'bi KalengKu, mingka annabai anjo kasa'biangKu; nasaba' Kuassengi angkana battu kemae kabattuangKu, siagang kemae laKulampai. Ikau tena nuassengi angkana battu kemae kabattuangKu siagang kemae laKulampai.

YOHANES 13:3

Naassemmi Isa angkanaya le'ba'mi Napassareang ngaseng ManggeNa sikontu koasaya mae ri KalenNa. Na Naasseng todong angkanaya Ia battui ri Allata'ala, nalammotere' poleang mae ri Allata'ala.

YOHANES 16:30

nanaasseng ikambe angkanaya sikontu apa-apaya Kiasseng ngasengi, Batara. Tena naparallu taua ampakkuta'nangangi ri Katte. Iaminjo saba'na natappa'mo ikambe angkanaya iKatte battuKi' ri Allata'ala.”

1 YOHANES 5:20

Niassemmi angkanaya battumi Ana'Na Allata'ala siagang le'ba' maki' Napapahangngiang sollanta tappa' mae ri Allata'ala sitojennaya. Asse're maki' mae ri Allata'ala sitojennaya lalang ri katallassanta, kammayatompa asse're tommaki' mae ri Ana'Na, iamintu Isa Almasi. Iami Allata'ala sitojennaya, siagang Iami katallassang sitojennaya siagang mannannunganga.