YOHANES 14:20 - KITTA' MATANGKASA'

²⁰ Punna narapi'mo wattunna anjo alloa, lanuassemmi angkanaya iNakke asse'reA' siagang Manggea, ikau ngaseng asse'reko siagang iNakke, na Kuasse're siagang ikau ngaseng.

YOHANES 14:20 Referans Kwoze

YOHANES 17:26

Le'ba'mi Kupappiassengang arenTa mae ri ke'nanga; na kammaminjo tuli laKugaukang, sollanna tuli napariati ke'nanga pangngamaseanTa mae ri Nakke, naKuasse're siagang ke'nanga.”

GALATIA 2:20

Kamma-kamma anne teaimi kalengku attallasa' mingka Almasi attallasa' ri kalengku. Anne katallassang niaka ri nakke kamma-kamma anne, iamintu katallassang matappa' mae ri Ana'Na Allata'ala, mangngamaseanga ri nakke, siagang le'baka angkoro'bangkangi KalenNa untu' katallassangku.

1 YOHANES 4:12

Tena manna sitau le'ba' anciniki Allata'ala; mingka punna massing sikamaseangki', asse'remi Allata'ala mae ri katte siagang a'jari sukku'mi pangngamaseanNa lalang ri kalenta.

YOHANES 14:10

Filipus! Maka tena nutappa' angkanaya iNakke asse'reA' ri Manggea, siagang anjo Manggea asse'rei siagang iNakke? Apa Kupaua ri kau teai battu ri ero' KalengKu bawang naKupau. Manggea, tuli niaka asse're siagang KalengKu, Iami anggaukang ngasengi anjo passalaka.

ROMA 8:1

Kamma-kamma anne tenamo hukkungang lantabai tau assileokamo katallassanna siagang Isa Almasi.

YOHANES 10:38

Mingka lanri Kugaukammi, tappa' mako mae ri sikamma anjo apa le'baka Kugaukang, manna pole taerokako tappa' ri Nakke. Lalang kammana minjo nanuasseng siagang nupahang angkanaya tuli se'rena Manggea siagang iNakke, siagang tuli se'reKu siagang Manggea.”

2 KORINTUS 13:5

Coba sai paressa kalennu, maka attallasa' tojeng-tojeng mako situru' matappa'nu mae ri Almasi? Ma'nassa langngu'rangiko angkanaya niaki Isa Almasi lalang ri kalennu! Simmaraengi punna tena nutappa' tojeng-tojeng.

KOLOSE 1:27

Mae ri anjo umma'Na, eroki Allata'ala ampa'nyatai antekamma baji'na siagang mala'biri'na anjo rahasiaNa untu' sikontu rupataua. Anjo rahasiaya, iamintu: Niaki Almasi lalang ri kalennu; battuanna langgappa tongko bageang lalang ri kalompoanNa Allata'ala.

YOHANES 16:26

Anjo wattua lappala' mako mae ri Manggea lalang arengKu. Parallui nuasseng angkanaya tena nalaKupappalakkangko mae ri Manggea,

KOLOSE 2:9

Nasaba' sikontu batangkalenNa Allata'ala nia'mi lalang ri KalenNa Almasi, iamintu lalang ri ma'rupataua.

KOLOSE 1:19

KalenNa tonji Allata'ala angkaerokangi sollanna sikontu apa-apa niaka ri KalenNa Allata'ala, nia' ngaseng tongi ri KalenNa Ana'Na.

YOHANES 6:56

Inai-nai angkanrei assingku, siagang inai-nai angnginungi cerakKu, iami a'jari se're siagang iNakke, siagang a'jari se'reMa' siagang kalenna.

2 KORINTUS 5:17

Inai-nai ampakase'remi kalenna mae ri KalenNa Almasi, a'jarimi tau le'ba' niberui taba sikali tallasa'na. Tenami apa-apa salloa ri kalenna, lanri le'ba' ngasemmi niberui.

YOHANES 17:11

Kamma-kamma anne battuMa' mae ri Katte. Tenamo naKuammantang ri linoa; mingka ia ke'nanga niaki ilalang lino. IKatte Bapa' Matangkasa'! Kijagai laloi ke'nanga ilalang koasana arenTa, iamintu areng le'baka Kipassareang mae ri Nakke – sollanna a'jari se're ke'nanga, sangkamma iKatte siagang iNakke se're tonjaKi'.

YOHANES 16:23

Ri anjo alloa sallang, tenamo nulakkuta'nang apa-apa mae ri Nakke. Tappa' mako angkanaya: apa-apa mamo nupala' mae ri Manggea lalang arengKu, laNapassareangi Manggea mae ri kau.

EFESUS 2:10

Ikatte bate pare'Naki' Allata'ala; tete ri Isa Almasi, Napare' beru maki' Allata'ala, sollanna nigaukang apa-apa bajika, le'baka Napasadiangki' Allata'ala.

1 KORINTUS 1:30

KalenNa Allata'ala ampasse'rei katallassannu siagang Isa Almasi. Tete ri Isa Almasi nanipa'jariki' cara'de'. Siagang tete ri Iatommi naNapasibajiki maki' Allata'ala mae ri KalenNa, iamintu Napa'jari maki' umma'Na, kammayatompa Napa'jari bebasa' maki'.

YOHANES 17:7

Kamma-kamma anne naasseng ngasemmi ke'nanga, angkanaya sikontu apa Kipassareanga ri Nakke, apa-apa battu ngaseng ri Katte.

2 KORINTUS 12:2

Nia' kuasseng se're tu Karisteng sampulo angngappa' taung allaloa, niangkaka nai' ri lonjo' kaminang tinggina surugaya. (Takuassengai angkanaya maka tubuna tojeng-tojeng niangka' nai' ri suruga yareka paccinikkuji bawang. Allata'alaji bawang angngassengi.)

2 KORINTUS 5:19

Ia biritta napabattua ikambe iamintu angkanaya Napa'jari assibajikimi Allata'ala rupataua mae ri KalenNa, tete ri Almasi. TaNabilangai sikontu kasalang le'baka nagaukang rupataua mae ri KalenNa. Na ikambemi Nasuro Allata'ala ambirittakangi anjo kabaraka.

ROMA 16:7

Pabattu tongi sallangku mae ri Andronikus siagang Yunias. Anjo ke'nanga a'julu pa'rasangangi siagang a'julu bansai siagang inakke, kammayatompa le'baki ke'nanga nitarungku siagang inakke. Ri tenanapa kutappa' mae ri Almasi, rioloangammi ke'nanga tappa'. Masahoroki ke'nanga mae ri sikamma tunisuroNa Allata'ala.

YOHANES 14:11

Tappa' mako ri Nakke, angkanaya asse'reA' siagang Manggea, kammayatompa asse'rei Manggea siagang iNakke. Yareka kaminang sike'de'na, tappa' mako lanri sikamma anjo apa le'baka nucini' Kugaukang.