YO"EL 2:18 - KITTA' MATANGKASA'

¹⁸ Nampa Naparhatikang Batara buttaNa, siagang Nakamaseang umma'Na.

YO"EL 2:18 Referans Kwoze

ZAKHARIA 8:2

“Ero' duduA' antulungi Yerusalem lanri sanna' Kukamaseanna pandudu'na, siagang lanri ia anjo pangngamaseangKu, nabambang nyawaKu mae ri musu-musunna anjo kotaya.

ZAKHARIA 1:14

nampa nasuroa' anjo malaekaka ampabattui apa Napaua Batara Kaminang Koasaya angkana, “Sanna' Kukarimangnginna siagang Kujampanginna kota Yerusalem, iamintu kotaKu matangkasaka.

PAMMUJI 103:13

Sanrapang se're mangge mangngamaseang ri ana'-ana'na, kammaminjo Batara mangngamaseang ri tau mappilangngeria.

YAKOBUS 5:11

Nigallara'mi ke'nanga tau sunggu, lanri sa'bara'na ke'nanga. Nulangngere' tommi kasa'barranna Ayub, siagang nuasseng tommi antekamma batena nibarakkaki ri Batara, ri kale'bakkanna. Nasaba' teai sipato' baji' pa'mai'Na siagang lompo pangngamaseanNa Batara.

PIRAUNG 3:22

Anjo pangngamaseanNa Batara sa'gennai satunggu-tungguna, tena la'busu'na passare baji'Na,

YESAYA 63:15

O Batara, Kiparhatikangi battu ri suruga, battu ri pammantangang matangkasatTa siagang mala'birika. Kemae pangngamaseanTa siagang kabaranianTa? Kemae kalammoranTa siagang pangngarimanginTa? Tea' laloKi' tahangngi anjo untu' ikambe.

YESAYA 63:9

Ia KalenNa nituju ri kasusaanna ke'nanga. Tena Nakkiring Batara tunisuro yareka tunisare koasa; Ia KalenNa allappassangi ke'nanga lanri pangngamaseanNa siagang pangngarimanginNa. Tuli Naparakai ke'nanga battu riolo.

LUKAS 15:20

Le'baki akkana kamma lalang ri nyawana, ammotere'mi anjo anaka mae ri manggena. Bella iji battu ri balla'na nicini'mi ri manggena. Larimi battu manggena ambuntuli nampa naraka' siagang nabau, napakamma sanna' rannuna nyawana.

YEREMIA 31:20

Israel, ikau ana' nisayangKu, ana' Kungaia, bua atingKu. Punna Kuancangko tuli nakkuKa' Kumangngu'rangi ri kau. LaKugaukanga mae ri kau iamintu Kukamaseang sikaliko.

YESAYA 60:10

Nakana Batara mae ri Yerusalem, “Bansa maraeng lambangungi ammotere' kalli' tembo'nu, siagang lanalayaniko sikamma karaenga. Riolo Kuhukkungko lalang larroKu, mingka kamma-kamma anne ero'Ma' angkamaseangko.

YESAYA 42:13

Majui Batara a'bundu' rapang se're tubarani, rapang tantara lompo sumanga'na a'bundu'. Ammarrangi, akkio' ri pa'bundukang, na Napappicinikang kaporeanNa mae ri musua.

PAMMUJI 103:17

Mingka tuli Nakamaseangi Batara tu mappilangngeria, tulusu' a'jarina kabajikanNa ri sikontu turungang,

HAKING-HAKING 10:16

Nampa napela' ngasemmo ke'nanga sikontu patung barhalaya, nanynyombamo ke'nanga ri Allata'ala. Natu'guru' pangngamaseammo Allata'ala anciniki ke'nanga lalang kasukkarang.

PAOLE 32:43

Makkio' rannuko lanri umma'Na Batara, e, sikamma bansaya, nasaba' Nahukkungi sikontu tau ambunoai ke'nanga. A'balasaki mae ri musunNa mingka Napammopporangi dosana bansaNa.”

PAOLE 32:36

LaNapasalamaki Batara bansaNa na Nakamaseang sikamma atanNa, punna tenamo pakkullena nacini' ke'nanga, nala'busu'mo kitta' magassinna.

PAOLE 32:16

Manynyombai ri patung ke'nanga, nakkimburumo Batara, nai' larroNa lanri anjo kaja'dallanga.

YESAYA 37:32

Ri Yerusalem siagang irate ri Bulu' Sion lania' tau salama', lanri le'ba'na Napattantu Batara Kaminang Makoasaya angkana lakammai anjo passala' lakajarianga.

2 KARAENG-KARAENG 19:31

Lania' tau salama' ri Yerusalem siagang irate ri Bulu' Sion, lanri le'ba'namo Napattantu Batara angkanaya lakajariangi anjo kammaya.