YESAYA 9:14 - KITTA' MATANGKASA'

¹⁴ Ulunna, iamintu tutoa-toana siagang tunipakalompona, na ingkonna iamintu sikamma na'bi assarea pangngajarang sala.

YESAYA 9:14 Referans Kwoze

PAPPICINI' 18:8

Passabakkang iaminjo, nasialloji bawang nanatujumo bala, – iamintu garring, si'na, siagang kacipurang. Na lanipammutungi siagang pepe', lanri Karaeng Allata'ala, sannaka MakoasaNa angngadeli.”

YESAYA 19:15

Tenamo tau ri Mesir nia' ija pakkullena, baji' na tukoasa kammayatompa ra'yaka, baji' natau niparalluang kammayatompa tau biasaya.

PAPPICINI' 18:17

Mingka sijangji bawang sallona, nalanynya' ngasemmo sikontu kakalumanynyanganna!” Sikamma juraganga, padongko' kappalaka, siagang ana'-ana' kappalaka, kammayatompa sikontu a'boya-boyaya ri tamparanga, ammenteng battu bella ngasemmi.

PAPPICINI' 18:10

Lammenteng battu bellami ke'nanga lanri mallaki ke'nanga nitaba todong ri kasessanna. Nakanamo ke'nanga, “Adudu, teai sipato' cilakana anne kota masahoroka, kota Babel kassaka! Sinampe' duduji sallona hukkunganTa naKiposso'mo!”

AMOS 7:17

Nakana Batara angkanaya la'jari pasundalaki bainennu ri agang-agang kotaya, siagang sikamma ana'nu lanibunoi lalang pa'bundukang. Buttanu lanipa'bage-bageangi mae ri tau maraenga, nampa ikau kalennu lamateko ri pa'rasanganna tau tenaya natappa' ri Batara. Pandudu'na Israel ma'nassa laniengkaki mange ri pammelakkanga, bella battu ri pa'rasangang kalenna.”

AMOS 6:11

Punna assarei parenta Batara, sikamma balla' lompoa siagang ca'dia laniancuru' kabusuki.

AMOS 3:12

Rapang sitau pakalawaki anggappayai ammotere' bangkenna mami yareka sipolong mami tolinna gimbala'na le'baka nikanre ri singa, kamma tomminjo sike'de' dudu mami lammantang battu ri pandudu'na Samaria attinro baji'-bajika pakkasia'na ri katinroang ga'gana.”

HOSEA 13:3

Lanri kammana anjo lalanynya' kabusuki anjo taua rapang allung yareka saliuka ri wattu bari'basa'na alloa. Lasanrapangi ke'nanga limbu'bu' niri'bakang ri anging ri panggilingang gandunga, siagang sanrapang umbu assuluka battu ri rateanna pattunuanga.

HOSEA 10:15

Iami anjo apa lakajarianga mae ri kau ngaseng, he pandudu'na Betel, lanri le'ba'na nugaukang kaja'dallang lompoa. Ri wattu ammumbana alloa ri bari'basaka, tasalloapi appakkaramulana bunduka, nalamatemo karaennu.”

HOSEA 8:8

Rapang uring reppeka, kammami anjo tu Israel tenamo anggaranna, siagang a'jarimi bansa biasa sangkamma bansa-bansa maraenga.

HOSEA 4:5

Allo bangngiko anggaukangi kasalanga, kammayatompa sikamma na'bia. Lanri kammana anjo laKupanraki Israel, anronnu.

HOSEA 1:9

Nakana Batara ri nakke, “Arengi anjo ana'nu ‘Teai UmmakKu’, nasaba' tu Israel teai ummakKu, siagang iNakke teaiA' Allata'alana ke'nanga.”

HOSEA 1:6

Nampa allassukang bainengku ana' makaruana ikambe, iamintu sitau ana' baine. Nakana Batara ri nakke, “Hosea, arengi anjo ana'nu ‘Tenaya Nikamaseangi’, lanri tenamo nalaKukamaseang bansa Israel siagang tena sikalimo nalaKupammopporang ke'nanga.

HOSEA 1:4

Nakanamo Batara ri nakke, “Arengi anjo ana'nu Yizreel, nasaba' tasalloami nalaKuhukkung Karaeng Israel, lanri pammunoang nagaukanga Yehu, boe-boena, ri Yizreel. LaKupa'le'baki pamarentahanna jari-jarina Yehu.

YESAYA 30:13

Lanri kammana anjo sala ngaseng mako. Rapangko tembo' tinggi a'lattaya battu rate sa'genna naung; larumbang silalonnako.

YESAYA 10:17

Allata'ala matangkasaka, Cayana Israel, la'jari pepe' angkanreai sikamma apa niaka lalang siallo bawang, ba'lalo sikamma rompo' katintinga.

YEREMIA 6:21

LaKupatatto'roi ke'nanga sollanna tu'guru'. Mangge siagang ana', agang siagang siampi' balla', yangasenna lapanra' ngasengi.”

YEREMIA 8:12

He ummakKu, mustina siri'-sirikko lanri le'ba'na ngaseng nugaukang anjo apa tuna kammaya! Mingka kapala' rupako siagang tena siri'-siri'nu. Lanri kammana anjo latu'gurukko sangkamma tau maraeng le'baka tu'guru'; cappu'mi riwaya'nu punna Kuhukkungko.

PIRAUNG 4:16

Tenamo naNaparhatikangi Batara umma'Na; Ia KalenNa ampasimbungi ke'nanga ampa'jari tanianggara'mo imang-imanna; tenamo angkamaseangi sikamma pamimpinga.