YESAYA 60:6 - KITTA' MATANGKASA'

⁶ Nikatulungi pa'rasangannu ri unta jaia, battua ri Midian siagang Efa. Tu battua ri Syeba angngerangi bulaeng siagang kamanynyang, na napuji-puji gau'Na Batara.

YESAYA 60:6 Referans Kwoze

MATIUS 2:11

Antama'mi ke'nanga ri pammantanganna anjo Anaka. Nabuntulu'mi anjo Anaka siagang Maria amma'Na. Su'ju'mi ke'nanga anynyomba ri anjo Anaka. Nampa massing nasungke roko'-roko'na ke'nanga, namassing assare koro'bang, iamintu bulaeng, kamanynyang, siagang mur.

PAMMUJI 72:10

Sikamma karaeng Tarsis siagang pulo-pulona langngerangi passare mae ri ia. Sikamma karaeng Arab siagang Etiopia battui angngerang passare.

PAMMUJI 72:15

Mattallasaki karaenga! Poro nipassareangi mae ri ia bulaeng battua ri Arab. Poro nipappala' doangangi lalang sikontua wattu na tuli nisare pangngellai.

HAKING-HAKING 6:5

Pila' sanna' jaina tu battu angngerangi olo'-olo'na siagang appare'mi kema ke'nanga, sanna' jaina. Punna lanirekengi sanna' sikali jaina ke'nanga, kammayatompa onta-ontana ke'nanga sanna' todong jaina. Battumi ke'nanga ampanra'-panraki anjo pa'rasanganna tu Israel.

1 PETRUS 2:9

Mingka ikaumi bansa le'baka nipile, imang-imang allayania karaeng, bansa matangkasaka, untu' KalenNa Allata'ala, siagang umma' KalenNa Allata'ala. Napileko siagang Nakiokko Allata'ala assulu' battu lalang ri sassanga untu' antama' ri singara' kalompoanNa, sollanna nupa'la'bang biritta ri sesena sikontu panggaukang malompoNa.

1 PETRUS 2:5

Ikau sanrapang ngasengko batu-batu mattallasaka. Lanri kammana paralluko ampassareangi kalennu untu' nipake ambangung Balla' rohaniNa Allata'ala. Lalang kammana anjo a'jari mako imang-imang mae ri Allata'ala lalang ri katallassannu; siagang tete ri Isa Almasi angngerang mako koro'bang rohani mae ri Allata'ala, iamintu koro'bang nitarima bajika ri atinNa Allata'ala.

FILIPI 2:17

Nakulle kapang lanibunoa' siagang latassolongi cerakku anjari sangkamma koro'bang nipatirika irate ri apa nupassareanga mae ri Allata'ala anjari' pammatei angkana tappakko ri Ia. Punna memang musti kammai anjo, appala' sukkuruka', siagang amminawang tonga' rannu siagang ikau ngaseng.

PA'JARIANG 10:7

Sossoranna Kus iami a'jari pandudu' ri Seba, Hawila, Sabta, Raema, siagang Sabtekha. Sossoranna Raema iami a'jari pandudu' ri Syeba siagang Dedan.

ROMA 15:9

Napa'jari tommi Isa bansa-bansa maraenga appakala'biri' mae ri Allata'ala, lanri baji' pa'mai'Na Allata'ala mae ri ke'nanga. Nia' tattulisi' lalang ri Kittaka, angkanaya, “Lanri kammanami anjo nakulamammuji-muji mae ri Katte ri tangnga-tangngana bansa-bansaya, lamakkelonga' mammuji-muji mae ri arenTa.”

MALEAKHI 1:11

NipakalompoA' ri sikamma bansa-bansaya ri sikontu linoa. Kere-keremae nitunui dupaya untu' ampakalompoi arengKu siagang nipassareangi sikamma koro'bang siratanga, ba'lalo sikontu bansaya napakalompoA'.

YESAYA 61:6

Lanigallarakko atanNa Allata'ala siagang niarengko imanNa Batarata. Lanukasiaki kakalumanynyanganna bansa-bansaya na lompo pa'mai'nu lanri barang-baranna ke'nanga.

YESAYA 45:14

Nakana Batara mae ri tu Israel, “Patangi wassele' buttana Mesir siagang passawallanna Sudan. Sikamma tu Syeba barania a'jari ikau pata; a'jappai ke'nanga ri bokonu nisikkokang limanna. Lasu'juki siagang lamangakui ke'nanga angkana, ‘Ma'nassa nia' tojengi Allata'ala ri tangnga-tangnganu; tena allata'ala pantaranganna Ia!

YESAYA 42:10

Akkelongko kelong beru mae ri Batara, pujimi Batara, he sikontu linoa! Ammarrung mako, he tamparanga siagang sikontu bonena, sikamma pa'rasangang bellaya siagang sikontu pandudu'na!

YESAYA 30:6

Kammaminne pappasanNa Batara ri passala'na sikamma olo'-olo' niaka ammantang ri butta bageang timboro', “Sikamma tunisuroa napilurangngimi keledaina siagang untana ke'nanga rassi hadia, nampa numalo ri daera jaia bahaya lanri napammantangngi singa, ulara' a'racung, siagang naga akka'nyi'. Sikontu anjo hadiaya napassareangi ke'nanga mae ri bansa tenaya kullena antulungi ke'nanga.

1 KARAENG-KARAENG 10:2

Battui a'rurung siagang jai parurunna siagang unta battalaka napakamma lurang rampa-rampa, batu paramata, siagang sanna' jaina bulaeng. Ri wattu assibuntulu'na siagang Salomo, sangka' rupami napakkuta'nangngang akkullea napikkiri'.

2 PATTOTTORANG 9:1

Nalangngereki Ratu Syeba ri passala' masahoro'na arenna Karaeng Salomo. Jari battumi mange ri Yerusalem ero' anso'ri kacara'dekanna na nasare pakkuta'nang-pakkuta'nang sukkara'. Battui nirurungang ri siapa are jaina paeranna siagang unta battalaka eranganna angngerang rampa-rampa, batu paramata, siagang teai sipato' jaina bulaeng. Ri wattunna assigappa siagang Salomo, akkuta'nammi anjo ratua a'rupa-rupa pakkuta'nang niaka ri pikkiranna.

2 KARAENG-KARAENG 8:9

Angngallemi Hazael 40 unta nampa natekeki a'rupa-rupa wassele'na kota Damsyik nampa a'lampa mange ri Elisa. Ri wattunna battu mange ri tampa'na Elisa, nakanamo Hazael, “Atanta Karaeng Benhadad, assuroa' battu untu' ampakuta'nangngangi apaka akkullei ammolle ri garrinna yareka tena.”

HAKING-HAKING 7:12

Anjo tu Midian, Amalek siagang tu battua ri parang kassika, tassia'-siaraki ri kere-kere mae anjoreng ri lapparaka. Sangkammai nicini' katimbang a'rappunganga. Unta-untana ke'nanga sanna' jaina sanrapang kassi' ri biring tamparang.

PA'JARIANG 25:13

Ismael nia' sampulo anrua ana'na. Iaminne areng-arenna situru' kalassukanna: Nebayot, Kedar, Adbeel, Mibsam, Misyma, Duma, Masa, Hadad, Tema, Yetur, Nafis, siagang Kedma. Ia ngasemmi anne a'jari boe-boena sampuloa anrua suku bansa, siagang desana siagang kemana ke'nanga niarengi situru' massing arenna ke'nanga.

YESAYA 60:9

Iaminjo sikamma kappala' battua a'labu angngerangi umma'Na Batara ammotere' battu ri pa'rasangang bella. Angngerang tongi pera' siagang bulaeng untu' mammuji ri Karaeng Allata'alanu; mae ri Allata'alana Israel Kaminang matangkasaka, ampa'jariai umma'Na nipakalompo.

YEREMIA 6:20

Apa matu-matunna ke'nanga ampangngerangngangA' kamanynyang battu ri Syeba, yareka rampa-rampa battu ri pa'rasangang bellaya? Tena naKuero' antarimai passarena ke'nanga. Tena Kungai koro'bang-koro'bang nitununa ke'nanga.

YEHEZKIEL 27:22

Untu' amballi barang-barannu sikamma padanggang battua ri Syeba siagang Raema angngerangi paramata-paramata, bulaeng, siagang rampa-rampa kaminang bajika.

ZEFANYA 3:10

Ba'lalo battu ri pa'rasangang Sudan bellaya, anjo ummakKu tassia'-siaraka laniaki battu siagang assare koro'bang mae ri Nakke.

ZAKHARIA 14:16

Nampa sikontu tau niaka ija attallasa' ri alla'na anjo bansa-bansa ambundukai Yerusalem, la'lampai mange ri anjo kotaya untu' anynyomba ri Karaeng, Batara Kaminang Koasaya, siagang untu' ampakalompoi Passua'-suarrang Pa'ballakang Leko'-Lekoka.

PAOLE 32:43

Makkio' rannuko lanri umma'Na Batara, e, sikamma bansaya, nasaba' Nahukkungi sikontu tau ambunoai ke'nanga. A'balasaki mae ri musunNa mingka Napammopporangi dosana bansaNa.”

1 PATTOTTORANG 1:33

Midian nia' ana'-ana' bura'nena niarenga: Efa, Efer, Hanokh, Abida, siagang Eldaa.

PAMMUJI 67:4

Poro mammuji bansa-bansaya mae ri Katte, o, Allata'ala, poro appala' sukkuru' ngasengi sikontu bansaya mae ri Katte.