YESAYA 6:11 - KITTA' MATANGKASA'

¹¹ Akkuta'namma' angkana, “Siapa sallona lakajariang anne kammaya, Batara?” Appialimi angkana, “Sa'genna a'jari rumbangngang anjo kota-kotaya natena taunna, tenamo nipammantangngi sikamma ballaka, siagang la'jari sino sikalimi na roso' buttaya.

YESAYA 6:11 Referans Kwoze

YESAYA 1:7

Pa'rasangannu nipanrakimi; kota-kotanu la'busu'mi nitunu. Ri dallekang matannui nialle tampa'nu ri bansa maraeng siagang naancuru' ngaseng sikamma apa niaka.

PAMMUJI 94:3

O, Batara, sa'genna siapa sallona larannu tau ja'dalaka? Sa'genna siapa sallona, o, Batara?

YESAYA 3:26

Ri sikamma pakke'bu' lompona kotaya lasusai taua lanri kamateangi siagang lappiraungi, nampa kalenna anjo kotaya lasanrapangi baine nisolarri, ammempo naung ri buttaya.

PAMMUJI 90:13

O, Batara, sa'genna siapa salloTa lalarro? Ammotere' lalo maKi' siagang Kikamaseangi ata-atanTa.

KAIMANGNGANG 26:31

naKuancuru' kota-kotanu, tampa'-tampa' panynyombannu, siagang tena naKutarimai sikamma koro'bannu.

PAMMUJI 79:5

O, Batara, maka lasitulusutTa larro, siagang a'rinra kamma pepe' kimburuTa?

PAMMUJI 74:10

Sa'genna siapa sallona, o, Allata'ala, musua lancau-cauKi'? Sa'ge tulusu'naka ke'nanga langhinai arenTa?

YESAYA 3:8

Tojeng, tu'guru'mi Yerusalem! Runtummi Yehuda! Saba' sikontu kana-kananna siagang panggaukanna naewai Batara siagang nabaliangi kakoasanNa.

YESAYA 5:9

Kulangngereki Batara Kaminang Makoasaya assumpa angkana, “Anne sikamma balla' lompoa siagang ga'gaya lakosong ngasengi tena bonena.

YESAYA 13:12

Sike'de' duduji tau lanipasalama', sike'dekangngang na bulaeng ti'noka.

YESAYA 32:14

Ba'lalo balla' lompoa lanibokoi siagang ibukota suaraka la'jari sinoi. Buluka siagang sikamma menara tampa' pa'jaganga le'ba'mi nipasillappara' siagang butta sa'genna satunggu-tungguna. Sikamma keledai liaraka siagang gimbala' liaraka la'lemereki mange-mange a'ruku' anjoreng.

YESAYA 35:1

Parang lompoa siagang butta kalotoroka larannui, bunga-bungaya lata'bakkaraki ri parang luaraka.

YESAYA 60:15

Tena nulanibokoi siagang tena nulanikabirisi', siagang tena nulanibalang parekang a'jari sino. Kupa'jariko nikalompoang pa'maika satunggu-tungguna, tampa' karannuang mannannungang.

YESAYA 64:10

Kota-kota matangkasatTa sanrapammi parang lompoa, Yerusalem a'jari parang kalotoro' siagang sino.

YEREMIA 4:7

Rapang singa assuluka battu ri paccokkoanna kamma tomminjo a'lampami pammanrakia ri bansa-bansa battua ero' ampanraki Yehuda. Laruntungi Yehuda a'jari kamma loro tampa' tenaya napammantangngi tau.

YEREMIA 22:6

Untu' iNakke, anjo balla' karaenna karaeng Yehuda ga'ga sikali, sangkammai ga'gana butta Gilead siagang moncong-moncong Libanon; mingka anjo tampaka laKupa'jari sangkamma parang lompo tenaya nanipammantangngi ri tau.

YEREMIA 44:2

Iaminne pasanNa Batara Kaminang Koasaya, iamintu Allata'alana Israel, mae ri ke'nanga, angkana, “Kalennu ngaseng le'ba' anciniki bala le'baka Kupabattu mae ri Yerusalem siagang kota maraenga ri Yehuda. Sa'genna pole kamma-kamma anne anjo kota-kotaya ancuru' ngasengiji siagang tena nanipammantangngi.

YEREMIA 52:27

ri daera Hamat. Anjorengi nisessa ke'nanga, nampa nibuno. Kammami anjo niengka'na tu Yehuda battu ri pa'rasanganna ke'nanga nampa nierang mange ri butta pammelakkanga;

YEHEZKIEL 6:6

Sikontu kota Israel laniancuruki, sikontu tampa' pakkoro'bangnganga siagang barhalaya lalicaki, sikamma pa'dupaanna latassimbung-simbungi, kammayatompa sikamma apa napareka ke'nanga latappelaki.

DANIEL 8:13

Nampa kulangngere' sa'ra malaekaka akkana mae ri malaeka' maraengannaya, “Sa'ge kemae sallona anjo sikontu apa nicinika lalang paccinika lakajariang? Sa'ge siapa sallona anjo dosa lompoa ansambeangi koro'bang allo-alloa? Sa'ge siapa sallona tantara suruga siagang balla' ibadaya lanionjo'-onjokang?”

MIKHA 2:4

Sarennu lanipakei ri taua a'jari piandere', siagang lappareki ke'nanga kelong-kelong kasusaang kammaya anne, ‘Naallemi Batara anne pa'rasanganna ikambe siagang Napassareang mae ri tau antahangai ikambe. Ancuru' taba sikalimi ikambe.’ ”

MIKHA 5:11

Jima'-jima'nu laKupa'lanynyaki siagang sikontu pacini'nu laKupabella kabusuki.

MIKHA 6:13

Kamma-kamma anne appakkaramulaMa' annunrung siagang angngancuru' lanri dosa-dosanu ngaseng.

KAIMANGNGANG 26:33

Lappa'niakKa' pa'bundukang ri pa'rasangannu siagang laKupasimbung-simbungko mae ri pa'rasanganna bansa maraenga. Lammantangi ta'ronang sikamma kokonnu siagang laKulappassangi a'jari loro kota-kotanu.

PAOLE 28:62

Manna katambammo jainu sanrapang bintoenga ri langi', mingka sike'de' mami ri kau lammantang attallasa', lanri tenana numannuruki mae ri Karaeng Allata'alanu.

PAOLE 28:63

Sangkamma sannanna nyawaNa Batara assareko kakalumanynyangngang siagang ampa'jari jai bilannu, lasannang tongi ampanrakiko siagang ampaccappukko. Lanialleko battu ri pa'rasangang tenayamo nasallo nanupammantangngi.

MIKHA 7:13

Mingka buttaya la'jari kalotoroki lanri kaja'dallanna pandudu'na.