YESAYA 59:1 - KITTA' MATANGKASA'

¹ Teako kapangngi angkana lamma dudui Batara untu' ampasalamakko, yareka tongolo' dudui untu' ampilangngeri pakkio'nu.

YESAYA 59:1 Referans Kwoze

YEREMIA 32:17

“O Batara Kaminang Tinggia, iKattemi ampa'jari langika siagang buttaya lanri koasa siagang kagassingang lompoTa. Tena apa-apa sukkara' mae ri Katte.

YESAYA 50:2

Angngapa namanna sitau ummakKu tania' appiali, wattungKu battu angkioki ke'nanga? Maka a'mereki ke'nanga lanri nakapangi angkana takkulleA' allappassangi siagang ampasalamaki ke'nanga? Sikontutojenna, lanri parentaKu na'jari kalotoro' tamparanga, sikamma binangaya Kupa'jari parang lompo, sa'genna mate ngaseng jukuka na'rasa parru.

PAMMILANGNGANG 11:23

Appialimi Batara angkana, “Apaka nukana nia' sanggana kakoasangKu? Lanuciniki angkanaya anjo apa Kupaua ma'nassa lakajariang tojengi yareka tena!”

YESAYA 65:24

Tenapa nappala' ke'nanga, naKuppialimo; tenapa nale'ba' ke'nanga appala' doang naKuturukiammo pappala'na ke'nanga.

IBRANI 7:25

Lanri kammanami anjo nakkulle Isa sa'genna satunggu-tungguna ampasalamaki sikontu tau battua mae ri Allata'ala tete ri KalenNa; nasaba' attallasaki satunggu-tungguna sollanna akkulle Napappala'-palakkang sikamma anjo taua mae ri Allata'ala.

MATIUS 13:15

Nasaba' tattongko' ngasemmi pikkiranna ke'nanga anne, a'jari tamallangngerai tolinna na tatassungkea matanna. Kajariammi anne, sollanna taccinika matanna tallangngera tolinna, tammahanga pikkiranna, na taeroka ammotere' mae ri Nakke, nampa Kupa'jari baji' ngaseng ke'nanga.’ ”

PA'JARIANG 18:14

Maka niakka apa tantamaya ri akkala' untu' Batara? Sangkamma Kupakkanaya sumpaeng, salapang bulang sallang labattua' pole mae anrinni. Na anjo wattua lamana'mi Sara sitau ana' bura'ne.”

YESAYA 58:9

Punna appala' doangko, laKuturukiangko pappala'nu. Punna akkiokko mae ri Nakke, lappialiA' mae ri kau. Tea' mako jallakkangi parannu tau, pammarimi passimusuanga siagang pitinaya.

YESAYA 6:10

Nampa Nakanamo mae ri nakke, “Pa'jari dongoki pikkiranna sikamma anjo taua, pa'jari tongoloki tolinna siagang pa'jari butai matanna sollanna takkullea accini', takkullea allangngere' siagang takkullea ammahang, nampa ammotere' mae ri Nakke sollanna Kupa'jari baji' ammotere'.”

YESAYA 63:1

“Inaika anjo niaka battu ri Bozra ri Edom? ejai bajunna, pakeanna accayai; teai sipato' gammara'na batena a'jappa.” “INakkemi Batara akkullea appasalama' siagang battua angngerang kabara' pammetang.”

YEREMIA 14:9

Angngapa Kisangkamma tau lingu; rapang tubarani tenaya nakkulle annulung? Mingka, mattantu niakKi' ri tangnga-tangngana ikambe, o Batara! Ikambe ummatTa, teaKi' bokoi!’ ”

YEHEZKIEL 8:18

Lanapisa'ringi ke'nanga pangngalarroi lompoKu! Tena nalaKumaapakkang siagang laKupammopporang ke'nanga. Manna pole na'gora-gora lompo tojeng ke'nanga appala' doang ri Nakke, tena nalaKupilangngeri ke'nanga!”

MIKHA 2:7

Teako kapangngi angkanaya anggappami pangngalarroi umma' Israel battu ri Batara. Tena nalaNagaukang Batara kammaya ngaseng anjo. Tena le'bakai tappela' kasa'barranNa. Sai sombereki a'bicara mae ri tau anggaukangai apa annabaya?”

1 SAMUEL 4:3

Ri wattu ammotere'na anjo tantara tassesaya mange ri tampa' kemaya, nakanamo sikamma pamimpinna tu Israel, “Apa kutadeng saba'na naNalappassangki' Batara nibeta ri tu Filistin anne alloa? Umba nanialle Patti ParjanjianNa Batara battu ri Silo, na nierang mae anrinni, sollanna ero' Batara antulungki' siagang Napasalamakki' battu ri musua.”

1 SAMUEL 8:18

Punna narapi'mo wattunna anjo kammaya, lakkunrareng mako lanri anjo karaeng nupilea, mingka taerokai Batara ampilangngeri kunrarennu.”

PAMMUJI 94:9

Allata'ala appare' toli, maka tenaka Nallangngere'? Ia appare' mata, maka tenaka Naccini'?

YESAYA 50:1

Nakana Batara ri Israel, “He ummakKu, nukapangi angkana Kubongkako rapang se'rea bura'ne ambongkai bainenna? Punna kamma, kemae sura' talla'na? Nukapangi angkana Kubalukangko, rapang sitau mangge ambalukangi ana'na mae ri tau assingaraka pappiinrang? Tena! Nitahangko siagang nipelakko, lanri dosanu siagang kaja'dallang kalennu!