YESAYA 51:10 - KITTA' MATANGKASA'

¹⁰ IKatte todong ampakalotoroki tamparanga, je'ne' tamparang lantanga. IKatte appare' oloang lalang ri anjo je'neka, sollanna akkulle a'limbang sikamma tau Kipasalamaka.

YESAYA 51:10 Referans Kwoze

YESAYA 43:16

Le'baki appare' Batara se're oloang a'limbang tamparang, allalo ri je'ne' a'gamarrunga.

YESAYA 50:2

Angngapa namanna sitau ummakKu tania' appiali, wattungKu battu angkioki ke'nanga? Maka a'mereki ke'nanga lanri nakapangi angkana takkulleA' allappassangi siagang ampasalamaki ke'nanga? Sikontutojenna, lanri parentaKu na'jari kalotoro' tamparanga, sikamma binangaya Kupa'jari parang lompo, sa'genna mate ngaseng jukuka na'rasa parru.

KALAPPASSANG 15:13

Kipimpingi anne bansa le'baka Kipasalama', lanri majarrekKi' mae ri janjinTa. Lanri koasa malompoTa naKila'langi, siagang Kirurungang mae ri butta matangkasatTa.

YESAYA 42:15

LaKupa'jari kalotoroki monconga siagang buluka, Kupa'jari kalumeng sikontu timbo-timboanna. Kupinrai ka'bung binangaya a'jari parang lompo, sikontu kollang lompoa Kupa'jari kalotoroki.

PAMMUJI 74:13

Lalang kagassingang lompo naKipata'bage tamparanga, na Kireppe' ulunna sikamma naga tamparanga.

PAMMUJI 77:19

A'gamarrungi gunturuka, akkilaki kilaka, ta'goccangi siagang annekkereki buttaya.

PAMMUJI 106:9

Lanri parentaNa na'jari kalotoro' Tamparang Alara', Ia angngerangi umma'Na a'jappa numalo ri tamparang, sanrapang numalo ri parang lompoa.

PAMMUJI 106:10

Lanri kammana Napasalama'mi ke'nanga battu ri limanna musua, Napakabebasa' battu ri koasana balinna.

YESAYA 11:15

LaNakalotori Batara tamparang Tarrusu'na Suez. Lappareki anging bambang, ammirika sa'genna Binanga Efrat a'jarimi tuju kaloro' ca'di sike'deka je'ne'na, sikontu taua allimbangi natanapasuluka sandala'na.

YESAYA 11:16

Lania' agang lompo untu' lanaolo umma'Na tassesaya assulu' battu ri Asyur, sangkamma wattunna assulu' Israel battu ri Mesir.

YESAYA 35:8

Anjoreng lania' agang lompo, “Oloang mangea ri kasalamakkang” arenna. Tau dorakaya talammaloai anjoreng, tau toloa talanapa'linguai tau angngoloa anjoreng.

YESAYA 35:9

Ri anjo tampaka tena singa, yareka olo'-olo' sekke' maraengannaya. Sikamma tau Nipasalamaka ri Batara la'jappai angngolo anjoreng.

YESAYA 62:12

Lanigallaraki ke'nanga: ‘Umma' Matangkasa'’; ‘Umma' nipasalamaka ri Batara’. Yerusalem lanigallaraki ‘Kota ninyonyoka ri Batara’, ‘Kota tenayamo nanibokoi ri Batara’.

YESAYA 63:9

Ia KalenNa nituju ri kasusaanna ke'nanga. Tena Nakkiring Batara tunisuro yareka tunisare koasa; Ia KalenNa allappassangi ke'nanga lanri pangngamaseanNa siagang pangngarimanginNa. Tuli Naparakai ke'nanga battu riolo.

ZAKHARIA 10:11

Punna a'limbang ke'nanga ri tamparang kasukkarang, iNakke, Batara antunrungi sikamma bombanga; na'jari kalotoro' taba sikali dapara' rawana Binanga Nil. Bansa Asyur tampoa lanipakatunai, siagang Mesir porea latappelaki kakoasanna.

KALAPPASSANG 14:29

Mingka ri wattunna a'limbang tamparang tu Israelka, a'jappai ke'nanga lalang ri butta kalotoro'na tamparanga, siagang je'ne' niaka ri kananna siagang ri kairinna a'jari kammai tembo' nai'.

YESAYA 35:10

Sikamma tau Nipakabebasaka ri Batara lammotereki; antamaki ke'nanga ri Yerusalem akkio' rannu, corai rupanna ke'nanga lanri karannuang mannannunganga. Larannui siagang lama'reja-rejai ke'nanga; lanynya'mi susaya siagang kunrarenga.

MIKHA 7:15

Appa'nia' maKi' gau' malompo untu' ikambe, o Batara, sangkamma le'baka Kigaukang riolo ri wattunna Kierang ikambe assulu' battu ri Mesir.