YESAYA 50:8 - KITTA' MATANGKASA'

⁸ Saba' ma'reppeseki Allata'ala, Napa'nyatai angkanaya tena nakusala. Inai ero' angngaganga' a'gea'? Umba kipara maju assama-sama. Inai angngewa'? Suromi a'reppese' mae ri nakke.

YESAYA 50:8 Referans Kwoze

PAPPICINI' 12:10

Nampa nia' kulangngere' sa'ra lompo ri suruga angkana, “Iaminne wattunna Napasalama' Allata'ala umma'Na! Kamma-kamma anne Napappicinikammi kakoasanNa Allata'ala salaku Karaeng! Kamma-kamma todong minne naNapappicinikang kakoasanNa anjo Karaeng Mappasalama' nipa'janjianga! Nasaba' nipasulu'mi battu ri suruga anjo antuduai allo bangngi sari'battanta ri dallekanNa Allata'ala.

YESAYA 41:1

Nakana Allata'ala, “A'merekiko, pilangngeriA', he sikamma pandudu'na sikamma pa'rasangang bellaya. Sadiako untu' maju ri pangadelanga, maju mako nasorong parkaranu. Umba kissidang siagang, na nitappuki angkana inai annaba, inai sala.

YESAYA 43:26

Piu'rangiangA', umba kimange ri pangadelang, pamajumi parkaranu sollanna a'nassa angkanaya annabako.

YESAYA 41:21

Batara, karaenna Israel, angkana ri rewata-rewataya, “Pamajumi parkaranu, paumi alasang-alasanna!

1 TIMOTIUS 3:16

Tena manna sitau akkulle ansassali, antekamma lompona rahasiana agamata, angkanaya: Napa'nyatai KalenNa lalang tubuna rupataua, na nipa'nyata katojenganNa ri RohNa Allata'ala siagang nicini' ri sikamma malaekaka. Nipakkiokkammi birittana mae ri sikamma bansa-bansaya, na nipatappa' ri sikontu linoa siagang niangka' nai' ri suruga.

MATIUS 5:25

Ebara'na nia' tau antuntukko mange ri pangadelanga, assibajiki memang mako lalang nia'na ija wattu, lalang tenanapa nubattu mange ri pangadelanga. Nasaba' punna tenapa nussibajiki nanubattu mange ri pangadelanga, tena tanapassareannu anjo taua mange ri hakinga; nampa hakinga ampassareangko mange ri pulisia; nampa napantamakko pulisia ri tarungkua;

PAOLE 19:17

anjo tau ruaya musti a'lampai mange ri tampa' ibada Napattantua Batara sollanna niadeli ke'nanga ri sikamma imanga siagang haking tugasaka anjo wattua.

KALAPPASSANG 22:9

Lalang sikamma passisala-salanga ri passala' pa'barang-barangngang, baji' na'rupa sapi, keledai, gimbala', pakeang, yareka apa-apa mamo tappelaka nampa nigappa ammotere', anjo tau mangakua angkana ia pata musti nierangi mange ri tampa' ibadaya. Anjo tau nikanaya sala ri Allata'ala, musti a'bayaraki a'lappi rua mae ri anjo patanna barang.

AYUB 13:19

O, Batara, punna battuKi' siagang Kitudua', la'merekia' siagang kutayangi a'jalakku.

PAMMUJI 119:151

Mingka iKatte a'reppesekKi', o, Batara, annabai sikontu parentaTa.

YESAYA 1:18

Nakana Batara, “Umba nanipa'le'ba' anne parkaraya. Manna pole nule'leng kamma uring napakamma dosa-dosanu, laKubissaiko sa'gennu a'jari kebo' sangkamma kapasa'. Manna pole najai siagang battala' dosa-dosanu, mingka laKupammopporang ngasengi.

YESAYA 45:25

Mingka turunganna Yakub lanipasalamaki, na lamammuji ke'nanga ri Nakke, Bataraya.

YESAYA 54:17

Mingka sikamma sanjata nipareka untu' ambaliangko, tena ngaseng nala'matu-matu. Na sikamma tuduhang ri kalennu ri pangadelanga lanupa'butti angkanaya sala ngasengi. INakke lassareko hadia pammetang ikau sikamma atangKu,” kammaminjo kananNa Batara.