YESAYA 46:2 - KITTA' MATANGKASA'

² Anjo patung-patunga takkulleai natulung paeranna, kalenna ke'nanga nilalingi a'jari tahanang. Iaminjo kale'bakkanna ke'nanga.

YESAYA 46:2 Referans Kwoze

YEREMIA 48:7

Moab! Ikau nupattoangi kaporeannu siagang kakalumanynyangngannu. Mingka kamma-kamma anne ikau kalennu lanibetako. Kasmos, rewatanu, siagang sikamma imanga siagang pagawena laniengkaki mae nipela'.

2 SAMUEL 5:21

Larimi tu Filistin, siagang tenamo nasawe angngerangi sikamma patung-patung barhalana ke'nanga. Niallemi ri Daud siagang ana' buana anjo patung-patunga.

HAKING-HAKING 18:24

Appialimi Mikha angkana, “Nulariangi patung-patungku siagang imanna, sa'genna tenamo apa-apangku, nampa nukana ‘Apa kutadeng?’ ”

YESAYA 45:20

Nakana Batara, “A'rappung mako siagang battu mako assama-sama, ikau ngaseng tau ta'lappasaka ri bansa-bansaya! Dongoki tau a'balulunga anrurungangi patung kayua, siagang appala' doanga mae ri rewata-rewataya ia tenaya nakkulle appasalama'.

YESAYA 37:19

Sikamma rewatana ke'nanga natunu tommi siagang naancuru' tommi, lanri sikamma anjo rewataya tena sikali koasana. Anjo rewataya poro patung kayuji siagang patung batuji, bate pare' rupatau.

YESAYA 37:12

Ri wattunna naancuru' boe-boeku kota Gozan, Haran, siagang Rezef, kammayatompa nabuno sikamma tu Eden niaka ammantang ri Telasar, tena manna se're rewatana ke'nanga ampasalamaki ke'nanga.

1 SAMUEL 5:3

Ri wattunna pandudu'na Asdod battu ammukona bari'basa' ri anjo balla' rewataya, naciniki ke'nanga angkanaya tu'guru'mi tappatinompang naung ri buttaya anjo patung Dagon, ri dallekanna Patti ParjanjianNa Batara! Naangka'mi ke'nanga anjo patunga nampa napoterang ri pammantanganna.

YESAYA 30:6

Kammaminne pappasanNa Batara ri passala'na sikamma olo'-olo' niaka ammantang ri butta bageang timboro', “Sikamma tunisuroa napilurangngimi keledaina siagang untana ke'nanga rassi hadia, nampa numalo ri daera jaia bahaya lanri napammantangngi singa, ulara' a'racung, siagang naga akka'nyi'. Sikontu anjo hadiaya napassareangi ke'nanga mae ri bansa tenaya kullena antulungi ke'nanga.

YEREMIA 51:47

Patappaki, angkanaya lanarapiki wattunna laKuhukkung barhala-barhalana Babel. Sikontu anjo pa'rasanganga lanihinai, siagang sikontu pandudu'na lanibunoi.

DANIEL 11:8

Ri wattunna ammotere' mange ri Mesir, lanaerangi patunna rewatana musunna siagang pakkakasa' bulaeng siagang pera' le'baka nipassareang mae ri anjo rewataya. Siapa are taung sallona tena nalanabunduki karaenna anjo pa'rasangang waraka.

NAHUM 1:14

Iaminne kaputusanNa Batara ri passala'na bansa Asyur, angkana, “Tenamo turunganna ke'nanga untu' ampannarrusuki jari-jarina bansana. Patung-patung barhala niaka lalang ri balla' rewata-rewatana laKuancuruki. Kupasadiami jera'na bansa Asyur nasaba' tenamo nasiratang ke'nanga attallasa'!”