YESAYA 41:11 - KITTA' MATANGKASA'

¹¹ Ciniki, sikontu tau larroa mae ri kau, lanibetai nammakkala' kacci. Tau angngewayako, lapanraki nala'busu' nibarrasa'.

YESAYA 41:11 Referans Kwoze

KALAPPASSANG 23:22

Punna mannurukiko ri ia siagang nugaukang sikontu Kuparentakanga, iNakke la'bundu' angngewai sikontu musunnu.

YESAYA 45:24

Lanakana ngaseng taua, ‘Bataraji bawang nakabattui kaadelanga siagang kagassinganga!’ Sikontu tau birisika mae ri Nakke labattui mae ri Nakke na'jari siri'-siri'.

PAPPICINI' 3:9

U'rangi anne: Anjo tau a'jaria umma'na Billisika, paballe-balle nakanaya kalenna tu Yahudi, na sikontutojenna teai, laKupakkulantuki assu'ju' ri dallekannu ngaseng. Nalanaasseng ke'nanga angkanaya Kukamaseang ngasengko.

LAMPA-LAMPANA 16:39

Jari a'lampami ke'nanga appala' popporo' ri Paulus siagang Silas. Nampa narurungang ke'nanga Paulus siagang Silas assulu' battu ri tarungkua, siagang napala'mi ke'nanga sollanna a'lampamo Paulus siagang Silas ambokoi anjo kotaya.

YESAYA 54:17

Mingka sikamma sanjata nipareka untu' ambaliangko, tena ngaseng nala'matu-matu. Na sikamma tuduhang ri kalennu ri pangadelanga lanupa'butti angkanaya sala ngasengi. INakke lassareko hadia pammetang ikau sikamma atangKu,” kammaminjo kananNa Batara.

DANIEL 4:35

Bansa-bansaya ri lino tena anggaranna. Allata'ala makoasa mae ri malaekaka ri suruga siagang pandudu'na buttaya. Tena manna sitau akkulle ambaliangi ero'Na, tena barani ampakuta'nangngangi apa Nagaukanga.”

KALAPPASSANG 11:8

Kala'busanna nakanamo Musa, “Sikontu pagaweta labattu ngasengi mae ri nakke siagang lasu'juki ri dallekangku sollanna kubokoi anne pa'rasanganga siagang bansaku. Le'baki anjo la'lampama'.” Nampa sanna'mo larrona Musa na nabokoi karaenga.

ZAKHARIA 12:3

Mingka punna ta'rapi'mo anjo alloa, laKupa'jari Yerusalem sanrapang batu battalaka; manna pole bansa battu kemae ancobai angngangkaki langgappai bala. Sikontu bansaya ri lino lanapa'jari se'rei kalenna untu' ambunduki Yerusalem.

YESAYA 49:26

LaKupa'jari sikamma musunnu palla' ero' ammuno, sa'genna para ia sibuno-buno. Nalanaasseng sikontu umma' rupataua, angkanaya iNakke, Batara, Mappasalama'nu; Kaminang Kassaka, Allata'alana Yakub, Mappasulu'nu.”

YESAYA 41:29

Tojeng, anjo rewata-rewataya tena matu-matunna, patung nipare'ji ke'nanga, tenaya kullena, tenaya nakkulle appare' apa-apa.”

YESAYA 29:8

Sikamma bansa niaka a'rappungang untu' ambunduki Yerusalem lasanrapangi tau cipuruka asso'na angnganre, nampa ambangung natena bonena battanna; yareka rapangi ke'nanga tau turere asso'na angnginung, nampa ambangung nakalotoro' kacikoro'na.

YESAYA 41:24

Sikontutojenna, ikau siagang panggaukannu, anu tena apa-apa, siagang tau anynyombaya ri kau appakaringi'-ringi'ji bawang.

YESAYA 40:17

Sikontu bansaya tena anggaranna mae ri Ia, rapang tena apa-apa ri dallekanNa.

YESAYA 17:13

Majui ke'nanga rapang a'ba sannaka lompona. Mingka Niancangi ke'nanga ri Allata'ala, nampa lari ke'nanga sa'genna bella lampana. Niondangi ke'nanga rapang awang niri'bakang ri anging nai' ri buluka, yareka rapang limbu'bu' nitui' ri anging lompoa.

YESAYA 29:5

Mingka sikontu bansa maraeng pallaka anjo, lalalanynya' ngasengi rapang limbu'bu' yareka awang niri'bakang ri anging. Ti'ring battui siagang tanisanna-sannayai kabattuanna.

YESAYA 29:7

Nampa sikontu pasukang bansa maraeng battua ambunduki Yerusalem, kota tampa' pakkoro'bangnganga mae ri Allata'ala, yangasenna tau niaka antammulili siagang ambunduki anjo kotaya, lalanynya' ngasengi rapang so'na ri wattu bangngina.

YESAYA 34:12

Tena karaeng lamparentai anjo pa'rasanganga, siagang sikamma pamimpinna lanynya' ngasemmi.

YESAYA 40:2

Pakasannangi atinna tu Yerusalem, pauangi angkanaya lakala'busammi nipare' ata. Kupammopporammi salana, le'ba'mi Kuhukkung a'lappi rua sikamma dosana ke'nanga.”

YESAYA 54:15

Punna nibundukiko, teai iNakke ampassuroangi, manna inai ambundukiko latu'guru' ngasengi.

YEREMIA 2:3

Israel, iNakke KalengKu ampatangko, Kusayanga lalang ri pa'maikKu. Kupitujui bala sikontu tau ansessayako, iNakke, Batara, anne akkana.”

KALAPPASSANG 12:29

Ri wattu lantanna anjo bangngia Nabunomi Batara sikontu ana' bura'ne bungasa'na bansa Mesir, appakkaramula battu ri ana'na karaenga, sa'genna mae ri ana'na tau nitarungkua. Sikontu olo'-olo' bungasaka lassu' nibuno ngaseng tommi.

YESAYA 49:25

Appiali Batara angkana, “Iaminjo lakajariang. Tunitahanna tubarania lanirampasaki ammotere'. Barang narampasa'na tau pallaka lanirampasaki ammotere'. Saba' iNakke KalengKu langngewai musunnu; laKupasalamaki sikamma ana'-ana'nu.

YEREMIA 12:17

Mingka bansa tenaya naero' mannuruki ri Nakke, laKubi'buki sanrapang lamung-lamung siagang laKupaccappuki. INakke, Batara, anne akkana.”