YESAYA 33:9 - KITTA' MATANGKASA'

⁹ Nibokoimi pa'rasanganga a'jari sino. Ta'ronammi romang-romanna Libanon, sikamma ka'bunna Saron copponga a'jari sangkammami parang luara'. Ri Basan siagang ri Moncong Karmel ru'rusu'mi leko'-leko' kayua.

YESAYA 33:9 Referans Kwoze

YESAYA 35:2

Parang lompoa la'bakkaki sanna' jaina, nakkelong siagang kelong-kelong rannu. Ga'gana kammai Moncong Libanon, kanang-kananna rapangi ka'bunna Karmel siagang Saron. Na tunggala' tau lancinikai koasaNa Batara, siagang kala'biranNa Allata'alata.

NAHUM 1:4

Naga'garaki tamparanga na'jari kalotoro', Napaccappuki je'ne'na sikontu binangaya. Bulu' Karmel siagang sikamma paranga ri Basan a'jari kalotoroki na kalumeng sikamma bungaya ri Libanon.

YESAYA 65:10

UmmakKu lanynyombai ri Nakke; gimbala'na siagang sapina ke'nanga la'rukuki ri Lappara'na Saron siagang Ka'bung Akhor.

MIKHA 7:14

O Batara, Kikalawaki laloi ummatTa, iamintu umma' nipileTa. Ammantangi ke'nanga bella ri parang lompoa, ri tangnga-tangngana butta copponga. Lappassammi ke'nanga anggappa kanre ri parang ruku'na Basan siagang ri Gilead sangkamma jammang riolo.

YEREMIA 50:19

LaKupoterangi tu Israel mange ri pa'rasanganna ke'nanga. Langnganrei ke'nanga battu ri wassele' buttana Bulu' Karmel siagang daera Basan. Lanipakabassoroki ke'nanga battu ri wassele' buttana daera Efraim siagang Gilead.

YESAYA 37:24

Akkiringko tau untu' akkana borro, angkanaya lanri jaina kareta bundu'nu, nupatundu'mi sikamma moncong kaminang tinggia ri Libanon. Nupattampo-tampoangi kalennu angkanaya le'ba'mi nuta'bang sikamma poko'-poko' camarana kaminang tinggia siagang kaminang ga'gaya, kammayatompa nutarrusu'mi sikamma romang kaminang ka'ba'na.

YESAYA 24:1

LaNapanraki Batara linoa, sa'genna a'jari kalotoro' siagang sino. LaNabulintaki bageang ratena nampa napasimbung-simbung sikamma pandudu'na.

YESAYA 14:8

Poko' eru siagang poko' camara Libanon larannumi lanri tu'guru'mi anjo karaeng pallaka, ri wattunna a'lampamo tenamo tau lassuro ta'bangi ke'nanga!

YESAYA 3:26

Ri sikamma pakke'bu' lompona kotaya lasusai taua lanri kamateangi siagang lappiraungi, nampa kalenna anjo kotaya lasanrapangi baine nisolarri, ammempo naung ri buttaya.

YESAYA 2:13

Sikamma poko' camara tinggia ri Libanon siagang sikontu poko' kayu lompoa ri Basan lanipanraki ngasengi.

KELONG MALA'BIRI' 2:1

Inakke poro bunga rosija' battu ri Saron, rapang bunga bakung niaka ri ka'bung.

PAOLE 3:4

Anjo wattua nirampasa'mi sikontu kotana ke'nanga; tena manna se're ammantang tassesa. Kabusu'na nia' annampulo kota nirampasa' ri sikontu daera Argob, niparentaya ri Karaeng Og battu ri Basan.

LAMPA-LAMPANA 9:35

Sikamma tau niaka ri Lida siagang Saron nacini' ngasemmi anjo apa kajarianga ri kalenna Eneas. Na tappa' ngasemmo ke'nanga mae ri Batara.

YESAYA 10:34

LaNarumbangi Batara ke'nanga rapang poko' kayu ri tangngana romang nita'bang siagang pangkulu'. Manna pole nakassa' ke'nanga rapang poko' kayu kaminang hebaka ri Libanon, mingka larumbang tonji ke'nanga!

YESAYA 29:2

Mingka laNapabattui Allata'ala balaya irate ri anjo kotaya, sa'genna ammarrang siagang akkunrareng taua. Kabusu'na kotaya lasangkammai tampa' pakkoro'bangngang attalaka cera'.

HOSEA 4:3

Lanri kammana anjo anne pa'rasanganga la'jari kalotoroki, siagang sikontu apa attallasaka anjoreng lamate kabusuki. Sikontu rupanna olo'-olo' niaka ri allaka, ri buttaya siagang ri tamparanga lapanra' kabusuki.”

AYUB 15:33

Rapang poko' anggoro' lelasa' runang rapponna, rapang poko' zaitun runtung bungana.

AMOS 1:2

Iaminne napabattua Amos, “Ammammuki Batara battu ri Bulu' Sion, a'gamarrungi sa'ranNa battu ri Yerusalem. Sikamma parang rukuka a'jari kalotoroki, rukuka ri Moncong Karmel kalotoro' taba sikali.”