YESAYA 31:2 - KITTA' MATANGKASA'

² Cara'deki Batara siagang Naassengi apa Nagaukanga. Appabattui bala siagang angngancangi laNahukkung tau ja'dalaka siagang tau antulungai anjo tau ja'dalaka.

YESAYA 31:2 Referans Kwoze

PAMMILANGNGANG 23:19

Anjo Allata'ala tena nasangkamma rupataua gampanga assesse' lalang siagang nangaia a'balle-balle. Punna a'janji Allata'ala, mattantu laNarupai! Punna a'bicarai, tena taNagaukanNa!

YESAYA 45:7

INakke ampa'jari singaraka siagang sassanga, iNakke ampabattui barakkaka siagang balaya. INakkemi Batara anggaukang ngasengi anjo sikammaya.

YUDAS 1:25

Iami Allata'ala, tenaya ruanNa; Iami ampasalamakki' tete ri Isa Almasi Batarata. Iami Allata'ala Mala'birika, Malompoa, Makoasaya, kammayatompa Magassinga battu riolo sa'genna kamma-kamma anne kammayatompa sa'genna satunggu-tungguna! Aming.

ROMA 16:27

Iami Allata'ala tenaya ruanna, kaminang bajika siagang annabaya. Poro Iami nipakalompo sa'genna satunggu-tungguna, lalang ri Isa Almasi! Aming! Sallangku, Paulus, atanNa Isa Almasi

MATIUS 24:35

Lalanynyaki langika siagang linoa, mingka tuli lania'na kana-kanangKu satunggu-tungguna.”

ZEFANYA 3:8

Mingka tutuko! Tayammi allonna naKuammenteng nai' untu' antuntukko. Nasaba' le'ba'mi Kupattantu untu' ampa'rappungi bansa-bansaya siagang kakaraengang-kakaraenganga untu' ampabattui pangngalarroingKu mae ri ke'nanga. Sikontu buttaya lala'busuki nakanre pepe' pangngalarroingKu.

AMOS 3:6

Maka latena nannekkere' tau ri kotaya punna nalangngere' sa'ra tarompe' tanra pa'bundukanga? Maka akkullei natuju bala se'rea kota, punna tena Napabattui Batara?

YEREMIA 10:12

Napa'jari Batara buttaya lanri koasaNa, Napareki linoa lanri kacara'dekanNa na Naka'rang langika lanri akkala' poreNa.

ZAKHARIA 1:6

Tete ri sikamma anjo na'bi atangKu ngaseng, Kupabattumi sikamma parentaKu siagang sikamma pappakaingakKu mae ri boe-boenu. Mingka tena najampangi ke'nanga sa'genna musti natanggongi ke'nanga kale'bakkang kajariang kodina. Nampa assesse' lalammo ke'nanga, siagang mangakumi ke'nanga mae ri Nakke angkanaya iNakke, Batara Kaminang Koasaya, le'ba' anghukkungi ke'nanga situru' kasalanna ke'nanga, siagang sangkamma apa le'baka Kupattantu.”

YEHEZKIEL 29:6

Jari naassemmi sikontu ra'ya' Mesir angkanaya iNakkemi Batara.” Nakana Batara, “He bansa Mesir! Narannuangi tu Israel bantuannu, mingka sanrapang jako bawang takkang lammaya.

YEREMIA 36:32

Langngallea' kitta' nigulung beru, nampa kupassareang mae ri Barukh juru tulisikku. Nampa lanatulisiki sikontu apa kupaua mae ri ia, iamintu bonena anjo kitta' nigulung makase'rea, siagang nitambai siapa are pole pasang sangkammaya anjo.

YEREMIA 10:7

Inai kutadeng taeroka mappilangngeri mae ri Katte, Karaenna sikontu bansaya? Tojeng, siratang sikaliKi' nipakalompo. Battu ri sikontu cara'deka ri alla'na bansa-bansaya siagang battu ri sikontu karaenna ke'nanga, tena manna sitau akkulle nipasangkamma iKatte, o Batara.

YESAYA 32:6

Tau toloa kana-kana tolo napasulu' siagang kaja'dallang narancana. Apa-apa mamo nagaukang yareka napau, tuli nahinai Allata'ala. Tale'bakai nasare kanre tau cipuruka yareka nasare je'ne' inung tau turerea.

YESAYA 31:3

Anjo tu Mesirka tau biasaji bawang, teai Allata'ala. Jaranna ke'nanga olo'-olo' biasaji, teai Batara. Punna angngalle tindakang Batara, anjo bansa lannulunga latatto'roi siagang anjo bansa lanitulunga latu'guruki. Jari kale'bakkanna lapanra' rua-ruai.

YESAYA 30:3

Mingka lanipala'bai pa'mai'na ke'nanga ri anjo karaenga, anjo panrannuang naminasaia ke'nanga latena na'rupa.

YESAYA 28:21

Lammentengi Batara sangkamma ri Moncong Perazim. Laberjuangi sangkamma ri Lappara' Gibeon untu' anggaukangi pattujunNa, iamintu pattujuang appakalannasaka mae ri rupataua! LaNagaukangi jama-jamanNa appakalannasaka.

YESAYA 22:14

Napa'nyatai KalenNa Batara Kaminang Tinggia siagang Kaminang Makoasaya mae ri nakke, na nakana, “Tojeng, anjo kaja'dallanna ke'nanga tena nalaKupammopporang sa'genna mate ke'nanga. INakke, Batara, anne le'ba' akkana kamma.”

1 SAMUEL 2:3

Pammarimi bicara kosonga! Pa'le'ba'mi bicara borroa! Nasaba' anjo Batara, Allata'ala Kaminang mapahang; Ia angngadeli sikontu panggaukanna taua.

YOSUA 23:15

Mingka sangkamma NarupainNa ngaseng janjinNa mae ri kau, kamma tomminjo mattantuna laNagaukang ngaseng tongi panggaratta'Na mae ri kau.

PAMMILANGNGANG 10:35

Sampang niangka' anjo Patti Parjanjianga, angkanami Musa, “Ammenteng maKi' o Batara, Kipasimbung-simbungi musunTa sa'genna lari tau angkabirisiaKi'.”

YESAYA 1:4

Cilakako kau bansa dorakaya, tau panraka siagang ja'dalaka! Ta'loposo' ngaseng mako lanri dosa-dosanu. Nutollaki Batara siagang nubokoi Allata'ala Kaminang Matangkasaka, siratanga musti nusomba.

YESAYA 9:17

A'rinrai rapang pepe' kaja'dallanna ke'nanga na nakanre sa'genna cappu' rompo' katintinga. Rinrana rapangi romang akkanre, jai sikali nai' umbunna.

YESAYA 14:20

Le'ba'mi nupanraki pa'rasangannu siagang nubuno bansa kalennu. Lanri kammana anjo tenamo nitarawangko kau sangkamma karaeng-karaeng maraenga. Tena manna sitau battu ri anjo kaluarganu ja'dalaka lanipasalama'.

YESAYA 28:29

Anjo kacara'dekanna, iamintu kacara'dekang nagappa battu ri Batara Kaminang Makoasaya. Sikontu rancanaNa Batara pore ngasengi siagang tuli a'jari ngasengi.

AYUB 12:16

Anjo Allata'ala gassingi, kassaki siagang porei! Lapung patipu siagang nitipua nia' ngasengi ri kakoasanNa.

YESAYA 21:17

Sikamma tau papanana Kedar sangnging tau barani. Mingka sike'de'ji battu ri ke'nanga lasalama'. INakke, Karaeng, Allata'alana Israel, anne le'ba' akkana.”

YESAYA 30:7

Sia-siaji bantuanna Mesir. Lanri kammana anjo nigallara'mi Mesir, ‘Naga tenaya bahayana’.”