YESAYA 30:23 - KITTA' MATANGKASA'

²³ Punna appakiorokko bine, laNapaturungi Batara bosia sollanna attimbo anjo binea siagang angngerang wassele' kattoang alla'bi-la'bia. Untu' olo'-olo' piaranu lasadiai parang ruku' luaraka.

YESAYA 30:23 Referans Kwoze

1 TIMOTIUS 4:8

Anjo latihang tubua sike'de'ji matu-matunna; mingka latihang rohania a'matu-matui lalang sikontu-kontuna katallassanta, nasaba' akkimbolongi janji untu' katallassanta ri kamma-kammaya anne siagang katallassang labattua.

MALEAKHI 3:10

Erang ngasengi bage sampulona panggappannu mange ri BallakKu sollanna nia' kanre alla'bi-la'bi anjoreng. So'riMa', nalanucini' angkanaya Kusungkei sikamma pakke'bu'na surugaya siagang Kupila'juiko kabajikang.

ZAKHARIA 10:1

Punna battu wattu accu'la'na lamung-lamunga, appalakko bosi mae ri Batara. Na laNapa'rappungi Batara rammang lappaturunga bosi, siagang laNapaturungi bosi lompoa sa'genna a'jari moncongbulo nicini' sikamma kokoa siagang a'jari baji' mange ri yangasenna taua.

YESAYA 58:11

INakke tuli lampimpingko siagang lampakabassorokko ri butta kalotoroka; iNakke lanjagaiko sollannu tuli akkamale siagang kassa'. Larapangko koko anggannaka ri je'ne', rapang timbuseng je'ne' tenaya nale'ba' a'jari kalotoro'.

PAMMUJI 36:8

Tamaka lompona anggaranna pangngamaseanTa, o, Allata'ala, a'la'langi rupataua lalang ri la'lanna ka'nyitTa.

PA'JARIANG 41:18

Nampa nia'mo kucini' tuju kayu sapi sannaka co'mo'na siagang accillaka kalenna, assulu' battu ri binangaya. Mangemi angnganre anjo sikamma sapia ri biring binangaya.

MATIUS 6:33

Jari, boyami la'bi riolo antekamma nasollanna Allata'ala ammarenta lalang ri katallassannu, siagang nanugaukang ero'Na. Na sikontu anjo kaparalluannu maraenganga laNasare tonjako Allata'ala.

MALEAKHI 4:2

Mingka ikau tau mannurukia ri Nakke, lammumbai koasangKu mappasalamaka rapang mataallo, nasioro'na angngerangi pappakamolle ri garring. Lata'lappasakko siagang larannuko rapang ana' sapi beru assuluka battu ri barana.

YEREMIA 14:22

Rewata-rewatana bansa-bansaya takkulleai appaturung bosi ri lino. Manna langika takkulle todong ampaturungi bosia siagang koasa kalenna. IKatteji bawang panrannuanna ikambe. IKatte ampa'jari ngasengi anjo sikammaya.

YESAYA 5:6

LaKubalang parekangi natimboi ruku'-ruku' liara'. Tena nalaKuparakai poko' anggoro'na, siagang tena nalaKusangkoi. Ba'lalo Kubalang parekangi nitongko' ri ruku' siagang rompo' akkatinting, ba'lalo Kupisangkai rammanga ampitu'guri bosi.”

YESAYA 4:2

Nia' sallang wattunna naNapa'jari Batara sikamma lamung-lamunga siagang poko'-pokoka a'jari lompo siagang ga'ga ri anne pa'rasanganga. Anjo wattua tu Israel salamaka larannui pa'mai'na siagang lalompoi pa'mai'na lanri baji'na wassele' kattoanna.

PA'JARIANG 41:26

Anjo tujua sapi co'mo' battuanna iamintu tuju taung, siagang anjo tujua bulere' gandung bajika assinna battuanna tuju taung tonji. Jari anjo ruaya sangkammai battuanna.

HOSEA 4:16

Ikau ngaseng, he tu Israel, sanna' kapala batunu ngaseng! Antekamma bateKu langkalawakiko sangkamma gimbalaka ri parang rukuka?”

PA'JARIANG 41:47

Lalang wattu tuju taung ri wattu kala'bianna taua ri kanre-kanreang, alla'bi-la'bimi wassele' buttaya nagappaya taua.

YESAYA 10:27

Anjo wattua laKulappassangko battu ri panjallakkanna Asyur, nampa tenamo nakoasa ke'nanga mae ri kau.”

YESAYA 65:21

Tau ambangunga balla' na napammantangi kalenna; teai tau maraeng lampammantangi. Lanalamungi ke'nanga siagang poko' anggoro' na nakasia' je'ne' anggoro'na; teai tau maraenga langnginungi. UmmakKu lala'bui umuru'na rapang poko' kayu na nakasia' wassele' karesoanna ke'nanga.

KAIMANGNGANG 25:19

LaNasareko wassele' buttana anjo pa'rasanganga sa'genna angganna' kanrenu siagang salewangangko ammantang anjoreng.

KAIMANGNGANG 26:3

Punna nuturuki paratorang-paratorangKu siagang parenta-parentaKu lalang tallasa'nu,

KAIMANGNGANG 26:5

Lalla'bi-la'bi wassele'na buttanu, sa'genna akkatto ijako gandung, nanarapi'mo sedeng wattu pangngalleanna rappo anggoroka. Siagang punna narapi'mo wattunnu la'lamung gandung, tenapa nule'ba' angngalle ngasengi rappo anggoro'nu. Lagannaki kanre-kanreannu siagang lasalewangangi tallasa'nu lalang ri pa'rasangannu.

PAOLE 11:14

Punna nugaukang anjo kammaya, lappaturungi bosi Batara mae ri buttanu punna narapi' wattunna, ri le'ba'nu akkatto, siagang ri wattunnu appakkaramula annanang. Jari langgannaki gandunnu, anggoro'nu siagang minynya' zaitunnu,

PAMMUJI 67:7

Angngerammi wassele' buttaya, Allata'ala, le'ba' maki' Nabarakkaki Allata'alata.