YESAYA 28:1 - KITTA' MATANGKASA'

¹ Cilakai kota nakalompoang pa'maika sikamma painunna Israel! La'jari toami kaga'ganna, rapang bunga kalumeng niaka ri simbolenna ke'nanga. Cilakai kota tinggia nai' battu ri tangngana ka'bung copponga, nakalompoanga pa'mai' sikamma tau sitangnga matea nasa'ring.

YESAYA 28:1 Referans Kwoze

HOSEA 7:5

Ri allo passua'-suarranna karaenga, napainungi ke'nanga karaenna siagang sikamma pagawe-pagawena karaenga sa'genna nasa'ring siagang nagaukang katoloanga. Kale'bakkanna assannang-sannammi karaenga siagang sikamma anjo tau a'bali' ballanga.

YESAYA 28:7

Kammayatompa sikamma na'bia siagang imang-imanga nasa'ring tongi, lanri jai duduna anggoro' siagang inungang terasa' nainung ke'nanga. Ta'royong-royongi jappana ke'nanga siagang tatto'ro-to'roi lanri tenana nasilolongang pikkiranna. Na'bi-na'bia takkulleai napahang sikamma pangngunju' Nipappicinikanga mae ri ke'nanga battu ri Allata'ala. Sikamma imanga tena tommo nakkulle natappuki sikamma parkara nieranga mae ri dallekanna ke'nanga.

AMOS 6:6

Angnginungko anggoro' battu ri pangnginungang niboneia sa'genna rassi, siagang ammakeko minynya' bau' kaminang bajika, mingka tena nasi'na pa'mai'nu mae ri kaancuranna Israel.

AMOS 6:1

Cilakako ikau ngaseng attallasa' nyamanga ri Sion, siagang amanga pakkasia'na ri Samaria – ikau ngaseng he pamimpinna tau jaia ri anne Israel porea, ikau ngaseng sarroa nibattui ri ra'yaka untu' nipappalakki pannulungang!

AMOS 2:12

Mingka nusarei anjo Pangawasaka angnginung anggoro', sa'genna takkaluppa ke'nanga ri janjinna. Siagang ikau ngaseng nupisangkai na'bi-na'bia ampabattui pasangKu.

AMOS 2:8

Ri sikamma tampa' ibadaya, attinroi siagang baju napappita'gallanga na naalle tulusu' battu ri tu kasi-asia. Ri Balla'Na Allata'alana ke'nanga, angnginung anggoro' naallea battu ri tau niaka inranna mae ri ke'nanga.

HOSEA 6:10

Ri Israel nia' Kucini' apa appakamalla': ummakKu nara'massi kalenna ri anynyombana ke'nanga ri barhalaya.

HOSEA 5:5

A'nassai nicini' katampoanna bansa Israel, siagang a'jari buttimi ri kasalanna. Dosana ke'nanga a'jari saba' natatto'ro siagang tu'guru', siagang bansa Yehuda tu'guru' tommi siagang ke'nanga.

HOSEA 4:11

Nakana Batara, “He ummakKu, baji' anggoro' salloa kammayatompa anggoro' berua napa'lanynya'mi pakkullenu untu' appikkiri' baji'.

YESAYA 9:9

“Rumbammi sikamma bangunang balla' batua, mingka lappare' poleangi ikambe balla' batu beru. Le'ba'mi nita'bang sikamma poko' kayu araya, mingka lanasambei ikambe siagang kayu camara Libanon kaminang bajika.”

YESAYA 8:4

Saba' ri tenanapa nalompo-lompo antu anaka nakkulle angkana ‘Bapa'’ siagang ‘Amma'’, sikontu kakalumanynyangnganna Damsyik siagang sikontu barang narampasaka tu Samaria lanilalingi ri karaeng Asyur.”

YESAYA 5:22

Cilakako kau tuporea angnginung anggoro'! Baraniko siagang hebakko punna accampurukko inungang terasa'!

YESAYA 5:11

Cilaka mako kau! Battu ri bari'basa' sa'genna bangngi iaji bawang nugaukang angnginunga inungang terasa' siagang nasa'ringa.

PANGNGEBARANG 23:29

Nuassengi apa kajarianna ri tau angnginunga anggoro' jai dudu, na masarro nakasia' inungang terasaka? Anjo taua a'jari sessai siagang pa'risiki ri katallassanna. Tuli a'besereki siagang akkunrarengi. Ejai matanna siagang a'bokka'-bokkaki kalenna, na sikontutojenna akkulle ngasenji naliliang anjo sikammaya.

2 KARAENG-KARAENG 15:29

Ri wattu ammarentana Pekah, naallei karaeng Asyur iamintu niarenga Tiglat-Pileser kota-kota Iyon, Abel-Bet-Maakha, Yanoah, Kedes, Hazor, daera Gilead, Galilea siagang Naftali. Pandudu'na niengkaki mange ri Asyur a'jari tunitahang.

KAIMANGNGANG 26:19

Teai sipato' tamponu, mingka laKupatundu' ngasengko. Tena nalabattu bosia, sa'genna a'jari kalotoro' siagang kassa' kamma bassi buttanu.

HOSEA 5:9

Lapanraki tu Israel, nasaba' narapi'mi allonna untu' anghukkungi. Pilangngeri, he ra'ya' Israel, anjo passalaka mattantui lakajarianna.

YESAYA 9:8

Sikontu bansa Israel siagang pandudu' Samaria lanaassengi angkana Batara anggaukangi anjo kammaya. Kamma-kamma anne borroi siagang tinggi langgai ke'nanga. Nakana ke'nanga,

YESAYA 9:11

Bansa Siria bageang iraya siagang bansa Filistin bageang ilau' angngempoi daerana Israel. Mingka tuli larroNa ija Batara siagang tuli Nahukkunna ija ke'nanga.

AMOS 4:1

Pilangngeri, he sikamma bai'-bainea ri Samaria pila' co'moka rapang sapi-sapi co'moka ri Basan! Nujallakkangi tau tenaya pakkullena, nupaccoki tu kasi-asia, siagang nutuntuki bura'nennu sollanna tuli napasadiangko inungang terasa'!

AMOS 6:4

Cilaka ngasengko attinroa irate ri ranjang ga'ga-ga'gaya siagang angnganre lompoa dageng sapi siagang gimbala' rungka!

AMOS 6:8

Naterassimi Batara Kaminang Koasaya siagang Kaminang Tinggia ampassareangi pappakainga' kammaya anne: “Birisiki nyawaKu mae ri katampoanna umma' Israel; tena nasannang nyawaKu mae ri sikamma balla' karaeng ga'gana ke'nanga. Ibukotana ke'nanga siagang sikontu bonena laKupassareangi mae ri musua.”