YESAYA 23:13 - KITTA' MATANGKASA'

¹³ Teai bansa Asyur, passangalinna bansa Babel allappassangi olo'-olo' sekkeka angkoasai Tirus. Iatommi ke'nanga ampaentengi sikamma menara untu' nipake antammulili balia, anruntungi sikamma benteng pattahanganna siagang ampa'jari rumbangangi anjo kotaya.)

YESAYA 23:13 Referans Kwoze

LAMPA-LAMPANA 7:4

Jari a'lette'mi Abraham battu ri pa'rasangang Kasdim mange ri Haran. Ri wattunna matemo manggena Abraham, nipalette'mi Abraham ri Allata'ala mae anrinni, ri pa'rasangang nupammantangia ngaseng kamma-kamma anne.

HABAKUK 1:6

Bansa Babel sekkeka siagang pallaka laKupa'jari bansa makoasa. A'barrisiki ke'nanga assulu' battu ri pa'rasanganna nampa najappai sikontu linoa untu' ambetai bansa-bansa maraenga.

DANIEL 4:30

kukanamo, “Ciniki, tamaka heba'na kota Babel. Inakke ambangungi a'jari ibukota negara, untu' ampa'butti kakoasangku siagang kagassingangku, kala'birangku siagang kalompoangku!”

YEHEZKIEL 29:18

“He tau, Karaeng Nebukadnezar battu ri Babel nabunduki Tirus. Nasuroi sikamma tantaraya ammisang barang sanna' battala'na, sa'genna a'gondolo'mo ulunna ke'nanga siagang a'bokka'mi salangganna; mingka baji' karaenga kammayatompa tantarana tena nanggappa wassele' apa-apa battu ri anjo kaposoanna.

YESAYA 13:19

Yangasenna kakaraenganga, iaminjo Babel kaminang ga'ga siagang a'jari kalompoang pa'mai'na pandudu'na. Mingka iNakke, Batara, laKuancuruki ke'nanga, kamma le'baka Kugaukang mae ri kota Sodom siagang Gomora.

YESAYA 10:7

Mingka karaeng Asyur nia' rancana kalenna. Eroki ampakei katerassanga siagang napaccappu' jaia bansa.

YESAYA 10:5

Nakana Batara, “Cilakai Asyur! Asyur laKupake a'jari cambo' siagang palu-palu untu' antunrungi tau natabaya pangngalarroingKu.

PAMMUJI 72:9

Pandudu' parang lompoa latunduki mae ri ia na su'ju' musua ri dallekang bangkenna.

AYUB 1:17

Tenapa nale'ba' a'bicara anjo taua, nania' tommo battu ata makatallua ampabattui angkana, “Nia' tallung pa'gompoang pasukang paella' tu Kasdim battu anrampasaki sikamma untata siagang nabuno ngaseng sikamma atanta. Inakke mami anne atanta ta'lappasa', sa'gengku akkulle battu a'laporo' mae ri katte.”

2 PATTOTTORANG 33:11

Lanri kammana anjo Napabattumi Batara sikamma panglima tantarana Asyur untu' ambunduki tu Yehuda. Nijakkala'mi Manasye siagang pakkai', nampa nisikko' siagang nierang mange ri Babel.

2 KARAENG-KARAENG 20:12

Anjo wattua karaeng Babel, iamintu niarenga Merodakh-Baladan ana'na Baladan, nalangngereki kabara'na angkanaya beru ammollei Karaeng Hizkia battu ri garrinna. Jari nia'mo tau nasuro angngerang sura' siagang hadia mae ri Karaeng Hizkia.

2 KARAENG-KARAENG 17:24

Salaku sambenna tu Israel le'bakamo niengka' mange ri anjo butta pammelakkanga, natampakkangi karaeng Asyur tau battua ri Babel, Kuta, Awa, Hamat, siagang Sefarwaim, anjoreng ri kota-kotana Samaria. Ammantang kabusu'mi anjo taua ri anjo kota-kotaya.

PA'JARIANG 11:31

A'lampai Terah ambokoi kota Ur ri Babilonia siagang Abram ana'na, Lot cucunna, siagang Sarai mintunna iamintu bainenna Abram. Eroki a'lampa mange ri Kanaan. Mingka ri wattunna battu ri Haran, ammantammi ke'nanga anjoreng.

PA'JARIANG 11:28

Ri wattunna attallasa' ija manggena, matemi Haran ri pa'rasanganna, iamintu ri Ur ri Babilonia.

PA'JARIANG 11:9

Iaminjo saba'na naniaremmo anjo kotaya Babel, lanri anjoremmi Napasisala-sala Batara bahasana sikontu bansaya, siagang battu anjoremmi ke'nanga nipasisa'la'-sa'la' ri Batara mange ri sikontu linoa.

PA'JARIANG 2:14

Binanga makatallua niarengi Tigris, a'lo'loroka irayanganna pa'rasangang Asyur. Binanga makaappaka niarengi Efrat.

YESAYA 13:21

Anjo tampaka lanapammantangi olo'-olo' liara'. Kokoci' la'ru'mung ri balla'na ke'nanga, siagang jangang-jangang unta lammantang anjoreng. Bembe liara' la'lumpa'-lumpa' ri alla'na rumbanganga.

YESAYA 18:6

Lanibokoi sikamma maya'na tantarana, a'jari kanrena jangang-janganga ri wattu timoro', siagang kanrena olo'-olo' sekkeka ri wattu dinginga.”

YESAYA 43:14

Batara Mappasalama'nu, Batara Matangkasa'na Israel, Nakana, “Lanri ikau ngaseng, naKuakkiring tantara mange ri Babel, naKulappo sa'genna rumbang sikamma panjoli pakke'bu'na panjaraya; sa'ra orre'na tu Kasdim Kupinrai a'jari piraung.

YEHEZKIEL 23:23

LaKupa'rappungi siagang laKuerangi mae ri kau sikamma tanrinnu battu ri Babel, Pekod, Soa, Koa Asyur, kammayatompa tu Kaldea. Kuerang tongi mae ri kau sikamma tu bura'ne gammaraka siagang tinggia pangka'na, bija karaenga, pagawe-pagawe tinggia, siagang perwira-perwira pasukang a'jaranga.