YESAYA 23:1 - KITTA' MATANGKASA'

¹ Iaminne pappasang ri passala'na Tirus. He, sikamma pakappalaka ri Tarsis ansombaliai tamparang lompoa, appiraung mako! Ri wattunnu assombala' ammotere' battu ri Siprus, lanipauang mako angkanaya ancuru'mi Tirus. Pa'labuannu siagang sikamma balla'nu a'jari rumbangang ngasemmi.

YESAYA 23:1 Referans Kwoze

PA'JARIANG 10:4

Sossoranna Yawan iami a'jari pandudu' ri Elisa, Spanyol, Siprus, siagang Rodes.

YEREMIA 47:4

Narapi'mi wattunna bansa Filistin nipanraki kabusu', sa'genna tenamo nanggappa bantuang Tirus siagang Sidon. INakke, Batara, ampanraki kabusuki sikontu tu Filistin niaka tassesa battu ri Kreta.

YESAYA 2:16

Sikamma kappala' lompoa siagang kaminang ga'gaya lanitallangngang ngasengi.

YEREMIA 2:10

Jappai biring lau'na Siprus, kiringi taua anrai' ri pa'rasangang Kedar, paressa bajiki anjoreng, maka nia' kajariang kammaya?

YESAYA 23:12

Nakana Batara, “He, kota Sidon! Tenamo nulassannang-sannang pole. Nijallakkammi pandudu'nu. Manna pole nalari ke'nanga mange annompang ri Siprus, tena todong nalaamang ke'nanga.” (

1 KARAENG-KARAENG 10:22

Jai kappala' lompona Salomo assombalaka siagang kappala'-kappala'na Hiram. Tattallun taung sikali ammotereki anjo sikamma kappalaka angngerang bulaeng, pera', gading, dare' siagang jangang-jangang cenderawasih.

DANIEL 11:30

Nasaba' tu Roma siagang kappala'-kappala'na laniaki battu ri Siprus; lanibunduki ri ke'nanga sa'genna a'jari sanna'mi malla'na. Nampa lammotere'mo larro sikali siagang ero'mi naancuru' agamana umma'Na Allata'ala. Lanapilangngeri pappitangara'na tau a'bokoamo battu ri anjo agamaya.

YEHEZKIEL 26:1

Ri tanggala' se're bulang attantua lalang taung makasampulo asse're ri wattu nipela'na ikambe, a'bicarai Batara mae ri nakke, Nakana,

YEREMIA 25:15

Batara, Allata'alana Israel, Nakana ri nakke, “Allei anne kaca anggoro' le'baka Kubonei anggoro' pangngalarroingKu. Erangi mange ri sikontu bansa nupa'lampaia Kusuro, siagang suroi ke'nanga angnginungi anne anggoroka.

YESAYA 60:9

Iaminjo sikamma kappala' battua a'labu angngerangi umma'Na Batara ammotere' battu ri pa'rasangang bella. Angngerang tongi pera' siagang bulaeng untu' mammuji ri Karaeng Allata'alanu; mae ri Allata'alana Israel Kaminang matangkasaka, ampa'jariai umma'Na nipakalompo.

YESAYA 24:10

Kabusu'na kotaya ricu ngasemmi; sikontu pakke'bu' ballaka takkonci ngasengi lanri malla'na ngaseng bonena.

YESAYA 15:8

Kemae-kemae ri pa'baeng-baenna Moab nia' kalangngerang sa'ra tau ammarrang. Piraunga kalangngerangi ri Eglaim siagang Beer-Elim.

PAMMUJI 48:7

Anjoreng annekkereki ke'nanga napakamma malla' siagang pa'risi', sanrapang baine eroka ammana',

2 PATTOTTORANG 9:21

Jai todong kappala' lompona Salomo assombalaka ri tamparang lompoa siagang kappala'-kappala'na Hiram. Tallun taung sikali ammotereki sikamma anjo kappalaka angngerang bulaeng, pera', gading gaja, dare' siagang jangang-jangang ga'ga.

1 KARAENG-KARAENG 5:1

Hiram, karaeng Tirus, tuli agangi siagang Karaeng Salomo. Nalangngere'na Hiram angkanaya a'jari karaemmi Salomo ansambeangi Daud manggena, akkirimmi tunisuro mange ri Salomo.

YOSUA 19:29

Battu anjoreng, a'lekkoi anjo garisi' pa'baeng-baenga mange ri Rama tulusu' sa'genna mange ri kota Tirus, iamintu se're kota nikallika siagang tembo'; nampa a'lekko pole anjo garisi' pa'baeng-baenga mange ri Hosa nampa kala'busang ri Tamparang Tangngaya. Antamaya ri anjo pa'baeng-baenga iamintu Mahalab, Akhzib,

PAMMILANGNGANG 24:24

Mingka lania' pasukang battu ri Siprus, lanabetai tu Asyur siagang Heber, nampa laancuru' todong anjo pasukanga.”

LUKAS 10:13

“Cilaka mako ikau tau niaka ri Korazim! Siagang cilaka mako ikau tau niaka ri Betsaida. Naka'de' anjoreng ri kota Tirus siagang ri kota Sidon nigaukang anjo gau'-gau' appakalannasa' le'baka nigaukang ri tangnga-tangnganu, mattantu sallomi le'ba'na toba' tau niaka anjoreng. Siagang sallomi le'ba'na ammakeang tau susa siagang nabonei au ulunna ke'nanga, a'jari pammatei ri katobakkanna ke'nanga.

YESAYA 23:6

Appiraung mako siagang lari mako mange ri Tarsis, he pandudu' niaka ri biring tamparanga.

YEHEZKIEL 26:2

“He tau, a'rannu-rannui pandudu'na Tirus na nakana, ‘Ancuru'mi Yerusalem! Lanynya'mi kagassinganna lalang ri pa'dangganganga! Tenamo niagang a'bali lalang pa'danggangang!’ ”

YEHEZKIEL 27:6

Sikamma pa'bisenu, kayu-kayu lompo battu ri Basan nipare'. Dapara'nu kayu camara nipare', battu ri pulo Siprus kabattuanna, belo-belona battu ri gading ka'jalaka anggaranna.

YEHEZKIEL 27:30

Nakarruki ke'nanga sarennu, akkunrareng nappiraung pacce nyawana. Appakioroki au ri ulunna ke'nanga anggulung ri limbu'bu' tanra susana.

YUNUS 1:3

Mingka ba'lalo a'lampa maraengi Yunus untu' ampakabellai kalenna battu ri Batara. A'lampa mangei ri Yopa, na sitabangi nia' kappala' ero' a'lampa mange ri Spanyol. Le'baki a'bayara' ongkoso' kappala', nai'mi ri kappalaka, nampa assombala' siagang ana' kappalaka mange ri Spanyol, untu' ampakabellai kalenna battu ri Batara.