YESAYA 22:12 - KITTA' MATANGKASA'

¹² Anjo wattua laNasuro ngasengko Batara Kaminang Tinggia siagang Kaminang Makoasaya angngarru' siagang appiraung, ancukkuruki uu'nu siagang ammake kaeng karung.

YESAYA 22:12 Referans Kwoze

YO"EL 2:17

Suroi sikamma imanga allayani Batara, angngarru' ri alla'na tampa' pakkoro'bangnganga siagang ri tampa' pattiro-tiroang ri dallekanga, na angkana, “Kisayang laloi ummatTa, o Batara; teaKi' lappassangi taunTa nicalla,” sa'genna appiandere' bansa-bansa maraenga siagang angkana, “Kemaeji Allata'alana ke'nanga?”

YO"EL 1:13

He sikamma imang allayania ri tampa' pakkoro'bangnganga, ammakeko kaeng karung, siagang angngarru' mako. Antamakko ri Balla'Na Batara appiraung sipattang kabusu', nasaba' tenana koro'bang anggoro' siagang gandung untu' Allata'alanu.

MIKHA 1:16

He tu Yehuda, polongi uu'nu salaku tanra susa mae ri ana'-ana'nu nukamaseanga. Cukkuruki ulunnu sa'genna a'gondolo' rapang jangang-jangang pakanre bakkea, nasaba' laniengkaki ana'-ana'nu mange ri butta pammelakkanga.

YAKOBUS 5:1

Sikamma sari'battangku, akkalumanynyanga! Pilangngeri anne pappakaingakku. Paralluko angngarru' siagang appiraung lanri lanukasia'na kasessanga!

AMOS 8:10

Sikamma passua'-suarrannu laKupinrai a'jari kasusaang, siagang kelong-kelonnu a'jari karru'. LaKupa'jariko ikau ancukkuruki kalennu siagang ammakeko kaeng karung tanra si'na. Rapangko anrong mangge angkarruki kamateanna ana' sitau-tauna. Anjo alloa lakala'busangi a'jari allo sanna' appakasi'nana pa'mai'.”

YUNUS 3:6

Ri wattunna nalangngere' karaeng Niniwe anjo kabaraka, karo-karomi naung battu ri empoang kakaraenganna. Nala'gasa'mi juba kakaraenganna siagang ammakemi kaeng karung, nampa ammempo irate ri aua.

YESAYA 15:2

Pandudu'na Dibon angngambiki nai' ri buluka untu' mange angngarru' ri tampa' panynyombanga ri rewata-rewataya. Pandudu'na Moab si'nami angkarruki kota Nebo siagang Medeba. Nacukkuruki uu'na siagang janggo'na tanra susana ke'nanga.

KATO'BA 3:11

Ia ampattantui wattu kaminang cocoka untu' sikontu apa-apaya. Ia assareki' kaerokang untu' angngassengi allo lanidallekanga, mingka tanikulleai ampahangi gau'Na Allata'ala battu ri pakaramulanna sa'genna kala'busang.

KATO'BA 3:4

Allata'ala ampattantui wattu untu' angngarru' siagang wattu untu' ammakkala', wattu untu' appiraung siagang wattu untu' a'joge',

AYUB 1:20

Nampa ammentemmi Ayub na nakekke' pakeanna tanra susana. Nacukkuru'mi ulunna, nampa su'ju' na nakana,

NEHEMIA 9:9

Kiciniki pa'risi'na boena ikambe ri wattu allaloa; Kipilangngeri karru'na ri Mesir siagang ri Tamparang Teberau.

EZRA 9:3

Kulangngere'na anjo kammaya, sanna'mi lussa'na nyawaku, sa'genna kukekke' pakeangku nampa kubi'bu' uukku siagang janggokku nampa ammempo naung, ancuru' kusa'ring pa'maikku.

2 PATTOTTORANG 35:25

Appareki Na'bi Yeremia se're kelong karru' untu' Karaeng Yosia. Sa'genna kamma-kamma anne anjo kelonga nipakei ri Israel ri pakelonga, baji' bura'ne kammayatompa baine, lalang pangngu'rangi kasusaang mae ri kamateanna Yosia. Anjo kelonga nipantamaki ri passe'reanna kelong-kelong karruka.

YESAYA 3:24

Kamma-kamma anne ammakei ke'nanga minynya'-minynya' bau', mingka sallang la'rasa bottoki ke'nanga. Passikko' aya' alusu'na ke'nanga lanisambei siagang otere' kasara'. Ulunna ke'nanga ga'gaya uu'na lanigondoloki. Pakeang ga'ga-ga'gana ke'nanga lanisambei siagang pakeang kekke'-kekke'. Kamma-kamma anne ga'gai ke'nanga; mingka sallang a'jari kodimi tanja'na lanri le'baki nisitempele'.

YESAYA 26:10

Manna nabaji' nigaukang ri tau ja'dalaka, tena todong napappilajari apa annabaya. Manna ri pa'rasangang niaka hukkunna jekkong tonji gau'na, na taeroka angngakui koasaNa Batara.

YESAYA 29:1

Cilakai Yerusalem, nigallaraka tampa' pakkoro'bangngang untu' Allata'ala! Cilakai kota tampa'na Daud akkema. Boli'mi kamma assisambe-sambe taunga siagang passua'-suarranna ke'nanga.

YESAYA 32:11

Sa'genna kamma-kamma anne nyamangko ri tallasa'nu, bellako ri kasusaanga. Mingka kamma-kamma anne, annekkere' mako napakamma malla'! La'gasi pakeannu nampa nupasikko' kaeng karunga mae ri aya'nu.

YESAYA 58:3

Akkuta'nangi anjo bansaya angkana, “Apa matu-matunta taua appuasa punna tena Naciniki Batara? Apa matu-matunta nipakatuna kalenta punna tena Naparhatikangki'?” Nakanamo Batara, “Sikontutojenna, lalang appuasanu, nuboyami kaparalluang kalennu na nupacco' sikamma tungnganre gajinu.

YEREMIA 4:8

Lanri kammana, angngarru' siagang appiraung mako, ammake mako kaeng karung tanra susanu. Lanri a'rinra-rinrana larroNa Batara tenapa nammono' battu ri Yehuda.

YEREMIA 7:29

Nakana Batara, “He pandudu' Yerusalem, susa mako! Polongi uu'nu nampa nupela'! Akkelongko kelong-kelong karru' irate ri coppo'-coppo' buluka, nasaba' iNakke, Batara larro siagang Kusorongboko ngasengko.

YEREMIA 16:6

Sikamma tau kalumanynyanga siagang tau kasi-asia ri anne pa'rasanganga lamatei natena tau antarawangi ke'nanga. Tena manna sitau lansessai kalenna yareka anggondoloki ulunna salaku pammatei ri kasusaanna ke'nanga.

YEREMIA 16:8

Teako antamakki ri balla'na tau assua'-suaraka. Teako angnganrei siagang angnginungi siagang ke'nanga.

YEHEZKIEL 27:31

Lanri ikau nanagondolo' ulunna ke'nanga, ammake kaeng karung susa dudu. Angngarruki ke'nanga pacce nyawana angkarruki sarennu.

DANIEL 5:1

Ri se'reang allo Karaeng Belsyazar angngundangi sisa'bu tumalompo untu' anghaderi passua'-suarrang lompona, siagang angnginung-nginung anggoro'.

HOSEA 9:1

He bansa Israel, tea' mako pakalompoi pole allo-allo lomponu sangkamma bansa-bansa maraenga. Nubokoimi Allata'alanu siagang tenamo namajarre' pa'mai'nu mae ri Ia. Ri tampa'-tampa' panggilingang gandunga nubalukangi kalennu a'jari rapang pasundala' mae ri Rewata Baal, siagang sannangi nyawanu antarimai gandung nukanaya sawala' nugappa battu ri anjo rewataya!

YO"EL 1:8

Angngarru' mako, he ummaka, rapang tulolo susaya nyawana angkarruki kamateanna bayuanna sannaka nangaina.

YESAYA 37:1

Nalangngere'na Karaeng Hizkia anjo laporanga battu ri anjo tau tallua, nakekke'mi pakeanna siagang ammakemi pakeang karung tanra si'nana pa'mai'na, nampa a'lampa mange ri Balla'Na Batara.

YESAYA 37:2

Nampa nasuro Elyakim, kapala balla' lompoa, Sebna juru tulisi'na pa'rasanganga kammayatompa sikamma imang-imang niaka pangka'na untu' a'lampa angngagangi sicini' Na'bi Yesaya, ana'na Amos. Ke'nanga ammake kaeng karung ngaseng tongi.

YO"EL 2:12

Nakana Batara, “Mingka kamma-kamma anne, pakkalepumi atinnu ammotere' mae ri Nakke, nuppuasa, appiraung siagang angngarru'.