YESAYA 19:18 - KITTA' MATANGKASA'

¹⁸ Anjo wattua bicara Ibrani lanipake lalang ri lima kota ri Mesir. Lappareki sumpa tau niaka anjoreng lalang arenNa Batara Kaminang Makoasaya. Kalase'renna anjo kotaya laniarengi “Kota Mataallo”.

YESAYA 19:18 Referans Kwoze

ZEFANYA 3:9

Mingka sallang laKupinrai atinna anjo bansa-bansaya, sa'genna appala' doang ke'nanga mae ri Nakke bawang, siagang tena nappala' doang mae ri rewata-rewata maraenga. Sikontu anjo bansa-bansaya lamannuruki mae ri Nakke.

ZAKHARIA 2:11

Anjo wattua jai bansa labattu mae ri Batara untu' a'jari umma'Na. Ia lammantang ri tangnga-tangnganu, siagang lanuassengi angkanaya Batara assuroa' battu mae ri kau ngaseng.

YESAYA 19:21

Lanapa'nyatai KalenNa Batara mae ri bansa Mesir, siagang laniassemmi kammayatompa lanisombami ri ke'nanga, siagang langngerammi koro'bang siagang passare ke'nanga mae ri Ia. Assumpami siagang a'janjimi ke'nanga mae ri Ia, nampa narupai anjo janjinna.

YEREMIA 12:16

Punna attojeng-tojeng pa'mai'na ke'nanga ero' antarimai agamana ummakKu siagang ero' assumpa angkana, ‘Lanri Batara mattallasaka,’ – sangkamma batena riolo ke'nanga angngajaraki ummakKu assumpa lanri Rewata Baal – la'jarimi ke'nanga golonganna ummakKu siagang la'jari kalumanynyangi ke'nanga.

YESAYA 11:11

Anjo alloa laNapakei pole sikalipa kakoasanNa Batara siagang Naerang umma'Na niaka tassesa battu ri Asyur siagang battu ri Mesir, ri pa'rasangang-pa'rasangang Patros, Sudan siagang Elam, ri Babel, Hamat siagang pulo-pulo bellaya.

YESAYA 27:13

Anjo wattua lanipasa'rai tarompe' lompoa untu' angkioki ammotere' sikontu tu Israel nipelaka mange ri Asyur siagang Mesir. Labattui ke'nanga Mange ri Yerusalem untu' anynyomba ri Batara, ri bulu' matangkasa'Na.

YESAYA 19:19

Anjo wattua ri pappokokanna pa'rasangang Mesir lania' se're tampa' pakkoro'bangngang mae ri Batara, siagang ri pa'baeng-baenna nia' se're benteng batu nisa'la' akkale-kalea untu' Batara.

YESAYA 2:11

Tau borroa lanipakatunai na tau tampoa lanipa'dundui. Bataraji bawang nipakalompo.

PAOLE 10:20

Pakala'biriki Karaeng Allata'alanu, siagang Iaji bawang musti nusomba. Paralluko tuli majarre' pa'mai'nu mae ri Ia siagang lalang arenNa bawang nussumpa.

PAMMUJI 68:31

Kiga'gara' laloi tu Mesir, anjo olo'-olo' sekkeka ri tangngana ruku' tinggia. Kikalarroi bansa-bansaya, pa'rappungang tedong romanga siagang ana'-ana'na, massing sionjo'-onjokanga untu' anggappa pera'. Napasimbungi Allata'ala bansa-bansa nangaia a'bundu'.

NEHEMIA 10:29

Nipasse're ngasemmi kalenta siagang sikamma pamimpinna ikambe untu' assumpa lattallasa' situru' hukkunNa Allata'ala, ia le'baka Napassareang tete ri atanNa iamintu Musa. Poro nitunrai ikambe punna tanarupaia ikambe anne parjanjianga. Assumpai ikambe lamannuruki ri sikontu parentaNa, hukkunNa siagang paratoranNa Batara, Allata'alana ikambe.

PA'JARIANG 11:1

Uru-uruna, sikontu bansa-bansaya ri anne linoa se'reji bahasana siagang sangkamma ngasenji bicaranna ke'nanga.

YESAYA 65:16

Tunggala' taua ri anjo pa'rasanganga, ia appalaka barakka', lanapalaki sollanna nibarakkaki ri Allata'ala tamamminraya. Tunggala' taua eroki assumpa; lassumpai lanri arenNa Allata'ala tamamminraya. Saba' kasessang rioloa tappela'mi siagang nikaluppaimi.”

YESAYA 14:1

LaNakamaseangi Batara Israel umma'Na, siagang Napilemi ke'nanga a'jari taunNa. LaNaboliki ammotere' ke'nanga ri pa'rasangang kalenna. Bansa maraenga labattu nampa asse're siagang ke'nanga.