YESAYA 13:14 - KITTA' MATANGKASA'

¹⁴ Bansa maraeng ammantanga ri Babel lasisa'la'-sa'laki siagang massing lari mange ri pa'rasanganna. Rapangi ke'nanga jonga lari battu ri pammuranga, yareka rapang gimbala' tenayamo pakalawakinna.

YESAYA 13:14 Referans Kwoze

1 KARAENG-KARAENG 22:17

Appialimi Mikha angkana, “Kuciniki tantara Israel tassiara' tena silolongang ri moncong-monconga. Sanrapangi ke'nanga gimbala' tenaya pakalawakinna, siagang Nakana Batara ri sesena ke'nanga, ‘Anne taua ngaseng tena pamimpinna. Lappassammi ammotere' ke'nanga siagang salama'.’ ”

YEREMIA 50:16

Teako lappassangngi taua a'lamung-lamung yareka akkatto ri anjo pa'rasanganga. Sikontu tau annompanga ammantang anjoreng lammotere' ngasengi ri pa'rasanganna lanri mallaki ke'nanga ri tantara battua ambunduki Babel.”

1 KARAENG-KARAENG 22:36

La'birinnamo labu alloa, niparentakammi sikontu pasukang Israel ammotere' ri kotaya siagang massing mange ri daerana,

YEREMIA 51:9

Tau annompanga ammantang anjoreng massing nakanamo para ia, ‘Niusahaimi antulungi Babel, mingka tala'mi! Bajikangngang nibokoimi anne pa'rasanganga nakimassing ammotere' mange ri pa'rasanganta. Nahukkummi Batara Babel siagang hukkungang lompo, naancuru' taba sikalimi.’ ”

YESAYA 47:15

Iaminjo matu-matunna pacinika mae ri kau ambattalliako appakkaramula ri ca'dinu; massing a'lampai ambokoiko; tena nia' battu untu' antulungko.”

YESAYA 17:13

Majui ke'nanga rapang a'ba sannaka lompona. Mingka Niancangi ke'nanga ri Allata'ala, nampa lari ke'nanga sa'genna bella lampana. Niondangi ke'nanga rapang awang niri'bakang ri anging nai' ri buluka, yareka rapang limbu'bu' nitui' ri anging lompoa.

MATIUS 9:36

Na ri wattunna Nacini' ngaseng Isa anjo tau jaia, tu'guru'mi pangngamaseanNa. Lanri sanrapangi ke'nanga gimbala' tappelaka siagang dodonga lanri tenana pakalawakinna.

MARKUS 6:34

Wattunna naung Isa battu ri biseanga, Nacini'mi anjo tau jaia. Tu'guru'mi pangngamaseanNa anciniki ke'nanga, lanri sanrapangi ke'nanga gimbala' tenaya pakalawakinna. Jari appakkaramulami Naajara' ke'nanga a'rupa-rupa pangngajarang.

1 PETRUS 2:25

Riolo sanrapangko gimbala' tappelaka, mingka kamma-kamma anne le'ba' mako nierang ammotere' untu' amminawang ri Pakalawakinnu siagang Pammarakainna nyawanu.

YESAYA 21:15

Nasaba' nalariangi kalenna ampilari pa'dang ta'bi'buka, battu ri ana' pana nipalio-lioa, siagang battu ri pa'bundukang hebaka.

YEREMIA 25:12

Le'baki anjo laKuhukkungi bansa Babel siagang karaenna lanri dosana ke'nanga. LaKuruntungi pa'rasangang Babel siagang Kubalang parekangi ancuru' sa'genna satunggu-tungguna.

NAHUM 3:18

He karaenna pa'rasangang Asyur! Matemi sikamma guburnurnu, siagang sikamma bupatinu tinro tulusu'mi satunggu-tungguna. Ra'ya'nu tassia'-siara'mi ri moncong-monconga, natena manna sitau akkulle angngerangi ke'nanga ammotere'.