YEREMIA 9:25 - KITTA' MATANGKASA'

^25-26 Nakana Batara, “Lanarapiki sallang wattunna naKuhukkung tu Mesir, Yehuda, Edom, Amon, Moab, siagang pandudu'na parang lompoa ancukkuru' bodoai uu'na. Nisunna' ngasengi ke'nanga sangkamma tu Israel, mingka baji' nake'nanga kammayatompa bansa Israel nipasangkammai siagang sikamma tau tenaya nisunnaki, lanri tenana namannuruki ke'nanga ri parjanjiang nipangngebaranga lalang sunnaka anjo.”

YEREMIA 9:25 Referans Kwoze

AMOS 3:2

“Battu ri sikontu bansaya ri lino, ikaumi se're-se'rea bansa Kuassenga siagang Kuparhatikanga. Iaminjo saba'na nalompo dosanu, siagang ma'nassa laKuhukkung ngasengko.”

YEHEZKIEL 28:10

Ikau lamateko sangkamma tau hina, lanri nibunoko ri bansa maraeng, tenaya natappa' ri Allata'ala. INakke, Batara Kaminang Tinggia, anne akkana.”

ROMA 2:28

Nasaba' nikanaya tu Yahudi tojeng-tojeng, teai poro arennaji bawang nikana tu Yahudi; naia nikanaya tu nisunna' tojeng-tojeng, teai lahere'naji bawang nisunna'.

ROMA 2:29

Mingka ia nikanaya tu Yahudi tojeng-tojeng iamintu tu Yahudia memang todong lalang ri atinna siagang nyawana; naia nikanaya sunna' tojeng-tojeng iamintu sunna' lalanga ri atia, ia Nagaukanga RohNa Allata'ala; jari tena nalalang ri kittaka nitulisi'. Tau kammaya minjo lannarima pammuji battu ri Allata'ala; jari teai battu ri rupataua.

KAIMANGNGANG 26:41

sa'gengKu angngalle tindakang angngewai ke'nanga nampa Kubongka ke'nanga mange ri pa'rasanganna musu-musunna ke'nanga. Kala'busanna, punna tundu'mo jari-jarinu siagang le'ba'mi najappai hukkunganga lanri dosana siagang mangngewana ke'nanga mae ri Nakke,

1 SAMUEL 14:6

Nakanamo Yonatan ri anjo turungkaya, “Umba kimange ri balla' jagana anjo tu Filistin kapereka. Gassingka ero'ji Batara antulungki'. Nasaba' akkullei Nasare Batara pammetang taua, baji' napunna jai tau kammayatompa lalang sike'de'na tau.”

1 SAMUEL 17:26

Nakanamo Daud, “Barani tojengi anjo tu Filistin kapereka ampa'ngarai tantaraNa Allata'ala attallasaka!” Nampa akkuta'nang mae ri kalase'renna tantaraya angkana, “Apa lanisareangi tau akkullea ambunoi anjo tu Filistin siagang antongkokai siri'na tu Israel?”

YEREMIA 4:4

Ta'gala' jarreki janjinnu siagang iNakke, Batara, siagang sa'laki kalennu untu' iNakke, he pandudu' Yehuda siagang Yerusalem. Punna tena, lallumpai larroKu siagang la'rinrai rapang pepe' tenaya nakkulle nibuno manna pole ri nai. Yangasenna anjo kammaya lanatujuko lanri panggaukang-panggaukang ja'dala'nu.”

YEHEZKIEL 31:18

Anjo poko' kayua a'jari pangngebarangi mae ri karaeng Mesir siagang bansana. Tena poko' kayu ri Eden kammaya anjo tinggina siagang la'biri'na. Mingka kamma-kamma anne, sangkamma todong poko'-poko' kayu ri Eden anjo poko' kayua lanaung tongi ri linona tau matea nampa asse're siagang ke'nanga tenaya natappa' ri Allata'ala, siagang sikamma tau matea lalang pa'bundukang. INakke, Batara Kaminang Tinggia, anne akkana.”

KAIMANGNGANG 19:27

Teako goncingi uu'nu ri sa'ri ulunnu yareka janggo'nu.

YEREMIA 49:32

Nakana pole Batara ri Nebukadnezar, “Alleangi sikamma untana siagang sikontu olo'-olo' piarana ke'nanga! Sikontu anjo tau nacukkuru' bodoa uu'na laKupasiaraki ri kere-keremae tampa'. LappabattuA' bala mae ri ke'nanga battu ri kere-keremae.

YEHEZKIEL 44:7

Le'ba'mi ke'nanga anra'massi BallakKu, nasaba' lalang nipassareanna mae ri Nakke jannana siagang cera'na koro'banga, napa'biangi ke'nanga antama sikamma bansa maraeng tenaya nassunna', siagang tena namannuruki ri Nakke. Lanri anjo sikamma panggaukanna ke'nanga appakaringi'-ringika, nadakkaimi parjanjiangKu siagang ke'nanga.