YEREMIA 8:13 - KITTA' MATANGKASA'

¹³ Ero' duduA' ampasse'rei ummakKu rapang tau ampasse'reai wassele' buttana. Mingka, ummakKu rapangi poko' anggoro' siagang poko' ara tenaya rapponna, ba'lalo manna leko'na kalumeng ngasemmi. Iaminjo saba'na naKukellaimo bansa maraenga battu siagang nakoasai pa'rasanganna ke'nanga. INakke, Batara, anne akkana.”

YEREMIA 8:13 Referans Kwoze

MATIUS 21:19

Nia' nacini' se're poko' ara ri biring aganga. Mangemi anjoreng ri poko' araya. Mingka manna sibatu tania' Nacini' rapponna pantaranganna leko-leko'na bawang. Nakanamo Isa ri anjo poko' araya, “Tenamo nukkulle a'rappo pole!” Nakalumeng memammo silalonna anjo poko' araya.

YO"EL 1:7

Naputtai ke'nanga anggorotta, na poko' arata tonasa'na mami tassesa. Sikamma batanna nabi'bi'mi ke'nanga, sa'genna kebo'mo tangke-tangkenna.

YEREMIA 17:8

Ia rapangi poko' kayu ri biring binanga assolonga je'ne'na; a'la'baki aka'na sa'genna je'neka. Tena namalla' ri wattu timoro', tuli moncongbulona leko'na. Manna pole nituju pa'rasanganga ri kakalotorang, tena nalussa' lanri tuli nia'na rapponna.

YAKOBUS 1:11

Ri wattunna battu alloa nanitaba ri bambang sarrona, kalumemmi anjo rukuka sa'genna ru'rusu' bungana siagang tappela'mi kaga'ganna. Kamma tomminjo mae ri tau kalumanynyanga: laancuruki ri wattunna napajappa usahana.

HAGAI 2:17

AppaturungA' anging bambang siagang bosi batu untu' angngancuruki sikontu wassele' kokonnu, mingka tena tongijapa nuero' ammotere' mae ri Nakke.

HAGAI 1:11

Kupabattui kakalotoranga mae ri buttaya siagang bulu'-buluka, mae ri koko-koko gandunga, koko-koko anggoroka siagang koko-koko zaitunga, kammayatompa mae ri sikontu lamung-lamung niaka ri anne buttaya, ba'lalo mae ri rupataua siagang olo'-oloka, kammayatompa mae ri sikontu apa nuusahakanga.”

HABAKUK 3:17

Manna pole tena rapponna poko' araya na poko' anggoroka tena anggoro'na, manna pole tena wassele'na poko' zaitunga, nappakala'ba' pa'mai' wassele' gandunga ri kokoa, manna pole namate kabusu' gimbalaka natena bonena bara olo'-oloka,

YEREMIA 5:17

Lanapaccappuki ke'nanga wassele' buttanu siagang kanre-kanreannu kammayatompa nabunoi ana'-ana'nu. Lanasamballei ke'nanga olo'-olo' sapinu siagang gimbala'nu, siagang lapanraki ngasengi poko'-poko' anggoro'nu siagang poko'-poko' aranu. Lanaancuruki ke'nanga kota-kota ammakea tembo' pattahangngang ia nupattoanga.

YESAYA 5:10

Tena nala'jari wassele' buttana, koko anggoro'na niaka sampulo hetto luara'na, sampuloji litere' je'ne' anggoro' wassele'na. Sibilangngang litere' bibi' gandung nalamung, na sampuloji litere' wassele'na.”

KAIMANGNGANG 26:20

Sikontu pakkaresoannu tena ngaseng matu-matunna, nasaba' tena nalangngerang wassele' buttanu siagang tena nala'rappo lamung-lamunnu.

YEREMIA 7:20

INakke, Batara Kaminang Tinggia, lampitujui pangngalarroi lompoKu anne balla' panynyombanga, rupataua siagang olo'-oloka, kammayatompa poko'-poko' kayua siagang wassele' buttaya. La'rinra-rinrai larroKu rapang pepe' tenaya nakkulle nibuno.”

YEREMIA 14:12

Manna pole appuasa ke'nanga, tena Kuero' amparhatikangi pakkio'na ke'nanga appala' tulung; siagang manna pole assare ke'nanga mae ri Nakke koro'bang nitunu siagang gandung, mingka tena nalasannang nyawaKu mae ri ke'nanga. Kabalekanna, laKutumpasaki ke'nanga lanri pa'bundukang, kacipurang, siagang garring.”

HOSEA 2:12

LaKuputtai poko'-poko' anggoroka siagang poko'-poko' ara nakanaya passawallang nagappaya battu ri palayananna mae ri sikamma tanrinna. LaKupinrai koko-koko anggoroka siagang koko-koko araya a'jari romang; labattui olo'-olo' sekkeka ampanraki.

YEREMIA 14:15

Napaui lalang arengKu ke'nanga angkanaya anne pa'rasanganga tena nalanituju ri pa'bundukang yareka kacipurang, padahala' tena naKusuroi ke'nanga akkana kamma anjo. INakke, Batara, Kupauangko, Yeremia, apa laKugaukanga mae ri anjo na'bi-na'bi tenaya naKusuroi. LaKubunoi ke'nanga lanri pa'bundukang siagang kacipurang.

YEHEZKIEL 22:31

Lanri kammana anjo kamma-kamma anne Kupabattumi pangngalarroingKu mae ri ke'nanga, siagang rapang pepe' laKupanraki ke'nanga lanri sikontu panggaukanna ke'nanga. INakke, Batara Kaminang Tinggia, anne akkana.”

MALEAKHI 3:11

Tena naKupa'biangi olo'-oloka ampanraki lamung-lamunnu; poko'-poko' anggoro'nu laroasaki rapponna.