YEREMIA 48:46 - KITTA' MATANGKASA'

⁴⁶ Cilakami Moab! Pandudu'na anynyombaya ri Rewata Kamos le'ba'mi nipanraki, siagang ana'-ana'na ke'nanga niengka'mi salaku tau nitahang.

YEREMIA 48:46 Referans Kwoze

PAMMILANGNGANG 21:29

He bansa Moab, cilaka mako! Tu manynyombaya ri Kamos, panrakko! Nibalang parekangko ri rewatanu a'jari tau a'lampa annompang, tubai'-bainenu a'jari tunitahangi ri karaeng Amori.

YEREMIA 48:13

Lala'bai pa'mai'na Moab mae ri Kamos, rewatana ke'nanga, sangkamma batena Israel la'ba pa'mai'na ri Betel ia napattoanga ke'nanga.

YEREMIA 48:7

Moab! Ikau nupattoangi kaporeannu siagang kakalumanynyangngannu. Mingka kamma-kamma anne ikau kalennu lanibetako. Kasmos, rewatanu, siagang sikamma imanga siagang pagawena laniengkaki mae nipela'.

1 KARAENG-KARAENG 11:7

Irate ri moncong ri bageang rayanganna Yerusalem, appaentengi tampa' panynyombang untu' Kamos rewatana tu Moab, siagang Molokh, rewatana tu Amon – rua-ruai rewata appakaringi'-ringi'.

HAKING-HAKING 11:24

Na kamma-kamma anne apaka erokko angngallei ammotere'? Anjo butta nasareangko rewatanu Kamos, akkullei tuli nupatang. Mingka apa le'bakamo Napassareang Batara, Allata'alana ikambe mae ri kambe, lanapartahangkangi ikambe.

2 KARAENG-KARAENG 23:13

Kammayatompa sikamma tampa'-tampa' pakkoro'bangngang niaka ri bageang rayana Yerusalem, ri bageang timboro'na Bonto Kaja'dallanga, niputta kabusu' tongi. Anjo tampa'-tampa' pakkoro'bangnganga nabangungi Salomo untu' anynyomba ri rewata-rewata appakaringi'-ringika, iamintu Asytoret, dewina bansa Sidon, Kamos rewatana bansa Moab siagang Milkom rewatana bansa Amon.

YESAYA 16:2

Attayangi tu Moab ri birinna Binanga Arnon nampa lingu pitijappa-jappai, rapang jangang-jangang nibongka battu ri ru'munna.