YEREMIA 44:8 - KITTA' MATANGKASA'

⁸ Apa saba'na nanugaukang apa-apa ampabattuai larroKu? Battuko mae siagang ammantangko ri Mesir, pa'rasangang tenaya nuassengi, nampa anynyombako barhala siagang assareko koro'bang mae ri anjo rewata-rewataya! Apaka erokko angngancuruki kalennu sollannu nihina ri sikontu bansaya ri lino siagang nipake arennu salaku pattunra?

YEREMIA 44:8 Referans Kwoze

YEREMIA 42:18

Sangkamma iNakke, Karaeng Allata'alana Israel Kutumpai kalarroangKu siagang kalussakkangKu mae ri pandudu'na Yerusalem, kamma tomminjo laKutumpai kalussakkangKu mae ri kau ngaseng a'lampaya mange ri Mesir. Lamallaki taua ancinikko; lanihinako, siagang lanipakei arennu a'jari kana pattunra. Tenamo nalanucini' pole butta passolongang cera'nu.”

YEREMIA 44:3

Nakajariang ngaseng anjo sikammaya lanri dorakai pandudu'na, sa'genna napakallaroA'. Assarei ke'nanga koro'bang siagang anynyombai mae ri rewata-rewata tenaya nale'ba' nasomba ke'nanga, tenaya nale'ba' nusomba yareka nasomba boe-boenu.

YEREMIA 18:16

Anne pa'rasanganga napa'jarimi ke'nanga tampa' appakaringi'-ringi', siagang tuli a'jari pa'rasangang nicau-cau. Sikontu tau allaloa ammenggong ngaseng ulunna lanri ringi'-ringi'na.

2 PATTOTTORANG 7:20

laKupasulukko battu ri pa'rasangang le'baka Kupassareang mae ri kau. LaKubokoi tongi anne ballaka, le'baka Kupattantu a'jari balla' panynyombang mae ri KalengKu. Kemae-kemaei anne ballaka lanipakatuna siagang lanikakkali ri taua.

IBRANI 3:16

Jari, inaika anjo tau allangngerekai sa'ranNa Allata'ala nampa nabali Allata'ala? Sai yangasemmi anjo tau le'baka napimping Musa assulu' battu ri butta Mesir?

YEREMIA 44:12

Siagang punna nia' battu ri tu Yehuda ammantanga tassesa, tuli ero'na a'lampa mange ri Mesir untu' ammantang anjoreng, lapanra' kabusuki ke'nanga. Kabusu'na ke'nanga, lompo ca'di, lamatei ri Mesir lalang pa'bundukang yareka lanri kacipurang. Lamallaki taua anciniki ke'nanga, siagang lanihinai ke'nanga ri taua. Arenna ke'nanga lanipakei a'jari pattunra.

YEREMIA 44:7

Siagang kamma-kamma anne, iNakke, Batara Kaminang Koasaya, iamintu Allata'alana Israel, akkuta'nangA' angkana apa saba'na nanugaukang anjo apa-apa appabattua bala lompo mae ri kalennu. Apaka erokko ampanraki sikontu taua – bura'ne, baine, ana'-ana', siagang ana' lolo – sa'genna tena manna sitau battu ri bansanu ammantang?

YEREMIA 29:18

LaKuondang tojengi ke'nanga siagang pa'bundukang, kacipurang, siagang garring sa'genna sikontu bansaya ri sikontu linoa la'jari mallaki anciniki ke'nanga. Kemae-kemae Kupasisa'la'-sa'la' ke'nanga, anjorengi lamalla' siagang lannekkere' taua anciniki apa kajarianga mae ri ke'nanga. Lanicau-caui ke'nanga, siagang arenna ke'nanga lanipakei a'jari kana pattunra.

YEREMIA 26:6

Punna tuli teanu mappilangngeri, anne balla' sambayanga laKupa'jari sangkamma Silo, sa'genna sikontu bansaya ri lino napakei arenna kota Yerusalem anne salaku kana pattunra.”

YEREMIA 24:9

LaKupa'jari cilakai ke'nanga sa'genna sikontu bansaya ri sikontu linoa a'jari malla' ngasengi. Kemae-kemae ke'nanga Kupasiara', lanicau-caui ke'nanga, dipa'jari kakkallang siagang nicalla-calla. Arenna ke'nanga lanipakei a'jari pattunra.

YESAYA 65:15

Sikamma tau nipileKu lanapakei arennu a'jari pattunra: “Dasi-dasi naNabuno ngasengko Batara Kaminang Tinggia sangkamma ke'nanga!” Mingka tau mannurukia ri Nakke laKusarei areng beru.

YESAYA 3:8

Tojeng, tu'guru'mi Yerusalem! Runtummi Yehuda! Saba' sikontu kana-kananna siagang panggaukanna naewai Batara siagang nabaliangi kakoasanNa.

YESAYA 19:1

Iaminne pappasang ri passala'na tu Mesir. Battui sallang Batara mange ri Mesir a'dongko' rammang gassinga larina. Annekkere' ngasengi sikamma barhalana tu Mesir ri dallekanNa siagang ca'dimi nyawana tu Mesir napakamma.

YEREMIA 7:9

A'lukkakko, ammunoko, a'gau' bawangko, sa'bi balle-balleko, assareko koro'bang mae ri Rewata Baal, siagang anynyombako mae ri rewata-rewata tenaya nanuassengi.

YEREMIA 11:12

Nampa a'lampa tu Yehuda siagang pandudu'na Yerusalem mange appala' tulung ri rewata-rewata maraeng napakalompoa assare koro'bang. Tena nalanakulle anjo rewata-rewataya ampasalamaki ke'nanga ri wattunna battu balaya.

YEREMIA 11:17

INakke ampaentengi Israel siagang Yehuda, iNakke, Batara Kaminang Koasaya. Mingka, kamma-kamma anne le'ba'mi Kurancanakang laKupabattu balaya mae ri ke'nanga. Kalenna tonji ke'nanga a'jari passabakkang mae ri anjo sikammaya bala, lanri nagaukanna kaja'dallanga, iamintu assarena koro'bang mae ri Rewata Baal, sa'gengKu larro.”

HOSEA 4:13

Ri tampa'-tampa' panynyombang barhalaya ri coppo'-coppo' buluka siagang monconga, anjoreng ngaseng mako assare koro'bang siagang attunu dupa irawanganna poko'-poko' kayu lompoa siagang copponga leko'na lanri dinging-dinginna anjo tampaka. Mingka apa kale'bakkanna? Sikamma tulolonnu a'jari pasundala'mi siagang sikamma mintunnu bainea a'gau' bawammi!

HABAKUK 1:16

Nampa anjo jalaya nasombai ke'nanga siagang nasarei koro'bang, nasaba' lanri iaminjo jalaya nanggappamo ke'nanga dalle' alla'bi-la'bi siagang a'jari kalumanynyang.

PAOLE 32:25

Bundu' angngeranga kamateang niaki ri sikamma oloanga, manna ammantanga ri balla' nabattui todong malla'. Turungkana bansaya lamatei, ana' lolo na tau toa dudu tena passangalinna.

YEREMIA 32:30

Appakkaramula ri riwaya'na ke'nanga, iamintu tu Israel siagang tu Yehuda tena napakasannangi pa'maikKu. Napanaiki larroKu lanri ri panggaukang-panggaukang ja'dala'na ke'nanga.

YEHEZKIEL 9:6

Bunoi sikontu tu bura'nea siagang tubainea, tau toa tau rungka, tau toa siagang ana'-ana'. Mingka tea sikaliko apa-apai sikamma tau niaka pammateinna ri abanna. Appakkaramula mako anrinni, ri anne BallakKu.” Jari napakaramulaimi tugasa'na ke'nanga na nabuno sikamma pamimpinna Israel niaka sitabang ammenteng ri Balla'Na Batara.

YEHEZKIEL 33:11

Paui mae ri ke'nanga angkanaya lanri iNakke, Allata'ala mattallasaka, Batara Kaminang Tinggia, tena naKusannang punna mate tau ja'dalaka; kabalekanna Kukellai nabokoi ke'nanga dosa-dosana sollanna tuli attallasa'. He bansa Israel, ammari mako a'gau' ja'dala'! Angngapa nuero' mate?