YEREMIA 44:6 - KITTA' MATANGKASA'

⁶ Iaminjo saba'na naKutumpa lussakKu siagang pangngalarroingKu mae ri kota-kota Yehuda siagang agang-aganga ri Yerusalem. Yangasenna Kutunui sa'genna a'jari loro-loro siagang kalotoro' sangkamma akkullea nicini' kamma-kamma anne.

YEREMIA 44:6 Referans Kwoze

YEREMIA 7:20

INakke, Batara Kaminang Tinggia, lampitujui pangngalarroi lompoKu anne balla' panynyombanga, rupataua siagang olo'-oloka, kammayatompa poko'-poko' kayua siagang wassele' buttaya. La'rinra-rinrai larroKu rapang pepe' tenaya nakkulle nibuno.”

YEHEZKIEL 8:18

Lanapisa'ringi ke'nanga pangngalarroi lompoKu! Tena nalaKumaapakkang siagang laKupammopporang ke'nanga. Manna pole na'gora-gora lompo tojeng ke'nanga appala' doang ri Nakke, tena nalaKupilangngeri ke'nanga!”

YEREMIA 42:18

Sangkamma iNakke, Karaeng Allata'alana Israel Kutumpai kalarroangKu siagang kalussakkangKu mae ri pandudu'na Yerusalem, kamma tomminjo laKutumpai kalussakkangKu mae ri kau ngaseng a'lampaya mange ri Mesir. Lamallaki taua ancinikko; lanihinako, siagang lanipakei arennu a'jari kana pattunra. Tenamo nalanucini' pole butta passolongang cera'nu.”

YEREMIA 21:5

KalengKu lambundukiko siagang kagassingangKu, lalang allumpana larroKu.

YEREMIA 7:34

Anne pa'rasanganga la'jari parang kalotoro' naroso'. LaKupammari sa'ra rannua siagang sa'ra passua'-suarrang pa'buntinganga ri kota-kota Yehuda siagang ri agang-agang niaka ri Yerusalem.

YESAYA 51:20

Tunggala' ri cappa'na aganga tu'guru' ngasengi taunnu lanri cappu'mi kagassinganna rapang jonga nialle ri tado'. Nitujui ke'nanga ri pangngalarroiNa Batara, siagang nitabai ri pangga'gara'Na Allata'alanu.

YESAYA 51:17

Ambangungko, he Yerusalem, ambangung mako! Hukkungang Napabattua Batara lanri larroNa le'ba'mi nujappai sa'genna la'busu'.

YESAYA 6:11

Akkuta'namma' angkana, “Siapa sallona lakajariang anne kammaya, Batara?” Appialimi angkana, “Sa'genna a'jari rumbangngang anjo kota-kotaya natena taunna, tenamo nipammantangngi sikamma ballaka, siagang la'jari sino sikalimi na roso' buttaya.

NAHUM 1:2

Taerokai Karaeng Allata'ala punna nia' ambaliangi, inai-nai angngewai, ma'nassa anggappai hukkungang. Sanna' larroNa, Na'balasa' mae ri ke'nanga.

DANIEL 9:12

TindakanTa sicoco' le'baki apa le'baka Kipa'janjiang mae ri kambe siagang mae ri pamarentana ikambe. Le'ba'mi Kihukkung kota Yerusalem la'bi sannakkangngang nakota maraenga ri anne linoa.

YEHEZKIEL 24:13

He Yerusalem, anjo panggaukang-panggaukang kodinu nara'massimi kalennu. Kucobami antangkasiko, mingka tena matu-matunna, lanri tuli ra'masa'nu. Tena nulatangkasa' ammotere' sa'genna ammari pangngalarroingKu mae ri kau.

YEHEZKIEL 24:8

Anjo ceraka kubalang parekangi anjoreng sa'genna akkulle nicini' siagang a'boya pa'balasa'.”

YEHEZKIEL 20:33

“Lanri iNakke, Allata'ala Mattallasaka, Batara Kaminang Tinggia, Kupakaingakko angkanaya lanri larroKu, laKuparentako siagang terasa' sa'genna nukasia' kakoasangKu. LaKupa'rappungko siagang laKuerangko ammotere' battu ri sikontu pa'rasangang tampa'nu nipasisa'la'-sa'la'.

YEHEZKIEL 6:12

Lanakasia' ngasengi ke'nanga jallo'na kalarroangKu. Sikamma tau bellaya ri butta pammelakkanga latu'guru' garringi nampa mate; tau ambania lamatei lalang bundu', siagang la'binnaya lamate naallei garring.

YEHEZKIEL 5:13

Lanupisa'ringi antekamma lompona pangngalarroingKu siagang pa'jallokangKu sa'genna sukku' Kusa'ring. Punna le'ba' ngasemmo kajariang anjo sikammaya, nampa mako latappa' angkanaya iNakke, Batara, anne a'bicara mae ri kau lanri larroKu mae ri sipa' tenana namattantu pa'mai'nu.

YEREMIA 36:7

Gassingka lanri kammana anjo nalappala' doang ke'nanga mae ri Batara, siagang toba' battu ri panggaukang-panggaukang ja'dala'na ke'nanga. Teai sipato' larroNa Batara mae ri ke'nanga siagang Naancangi ke'nanga.”

YEREMIA 4:4

Ta'gala' jarreki janjinnu siagang iNakke, Batara, siagang sa'laki kalennu untu' iNakke, he pandudu' Yehuda siagang Yerusalem. Punna tena, lallumpai larroKu siagang la'rinrai rapang pepe' tenaya nakkulle nibuno manna pole ri nai. Yangasenna anjo kammaya lanatujuko lanri panggaukang-panggaukang ja'dala'nu.”

KAIMANGNGANG 26:28

la'jari larroMa' ampangngajariko, siagang laKuhukkungko pole a'lappi tuju la'bi battala'na na hukkungang rioloa.

KAIMANGNGANG 26:31

naKuancuru' kota-kotanu, tampa'-tampa' panynyombannu, siagang tena naKutarimai sikamma koro'bannu.

YESAYA 1:7

Pa'rasangannu nipanrakimi; kota-kotanu la'busu'mi nitunu. Ri dallekang matannui nialle tampa'nu ri bansa maraeng siagang naancuru' ngaseng sikamma apa niaka.

YEREMIA 4:27

Napaui Batara angkanaya sikontu linoa la'jari parang lompoi, mingka tena nalaNapanraki taba sikali.)

YEREMIA 7:17

Nucini'mi kalennu apa nagaukanga ke'nanga ri kota-kota Yehuda siagang ri agang-aganga ri Yerusalem!

YEREMIA 34:22

LaKusuroi ke'nanga sollanna ammotere' mae ri anne kotaya, nampa nabunduki, nabeta, siagang natunui. Kota-kota Yehuda laKupa'jari sangkamma parang lompo tenaya nipammantangngi ri tau. INakke, Batara, anne akkana.”

PIRAUNG 1:13

Napaturungi pepeka battu ri langi' akkanrea sa'genna antama' ri atingku. Attannangi sikko' ri dallekangku untu' antu'guranga'. Nampa Nalappassanga' kale-kalengku ballasa' sila'busu' allo.

ZAKHARIA 1:2

Naparentakangi Batara mae ri nakke untu' akkana kamma anne mae ri umma'Na, “Ri jammang allaloa, iNakke, Batara Kaminang Koasaya, sanna' larroKu mae ri boe-boenu.

ZAKHARIA 7:14

Sanrapang anging barubu, Kubarrasaki ke'nanga sa'genna tarpassa ammantang ri sikamma pa'rasangang-pa'rasangang maraenga. Anne butta copponga a'jari sino sikalimi, tena sikali tau ammantang, siagang roso'mi buttana.”

YEREMIA 8:3

Na sikamma tau attallasaka ija battu ri anne bansa ja'dalaka, le'baka Kupasiara' mange-mange, lala'bi erokangngangi matea kala attallasaka. INakke, Batara Kaminang Koasaya, anne akkana.”

YEREMIA 44:22

Tenamo Natahangi Batara ancinikko assare koro'bang mae ri rewata-rewata maraenga. Anjo panggaukannu ja'dalaki siagang tunai. Doraka mako mae ri Batara siagang tenamo numannuruki ri parenta-parentaNa. Lanri kammana anjo, kamma-kamma memang anne ancuru'mi pa'rasangannu sa'genna tenamo nakkulle nipammantangngi, siagang arenna nipakemi a'jari kana pattunra. Tau ancinikai a'jari sanna'mi malla'na.”

PIRAUNG 1:1

Tamaka sinona Yerusalem anne kamma, kota suara' dudua riolo. Tamaka porena riolo ri alla'na bansa-bansaya, anne kamma rapammi janda. Riolo kontui kota kaminang nisomba, anne kamma nipa'jarimi ata.

ZAKHARIA 1:6

Tete ri sikamma anjo na'bi atangKu ngaseng, Kupabattumi sikamma parentaKu siagang sikamma pappakaingakKu mae ri boe-boenu. Mingka tena najampangi ke'nanga sa'genna musti natanggongi ke'nanga kale'bakkang kajariang kodina. Nampa assesse' lalammo ke'nanga, siagang mangakumi ke'nanga mae ri Nakke angkanaya iNakke, Batara Kaminang Koasaya, le'ba' anghukkungi ke'nanga situru' kasalanna ke'nanga, siagang sangkamma apa le'baka Kupattantu.”